മുസാഫര്നഗര്: മോട്ടോര് ബൈക്ക് മോഷ്ടാക്കളുടെ സംഘത്തില് പെടുന്നയാള് യോഗി ആദിത്യനാഥിനോട് മാപ്പപേക്ഷിക്കുന്ന ബോര്ഡും പിടിച്ച് പോലീസില് കീഴടങ്ങിയത് കഴിഞ്ഞ ദിവസമായിരുന്നു. യോഗി മുഖ്യമന്ത്രിയായ ശേഷം ആറു വര്ഷം കൊണ്ട് ഉത്തര്പ്രദേശില് ക്രിമിനലുളുമായി നടന്നത് 10,000 പോലീസ് എന്കൗണ്ടറുകളെന്ന് റിപ്പോര്ട്ട്. യോഗി സര്ക്കാരിന്റെ എന്കൗണ്ടറുകളില് ഏറ്റവും മുന്നില് മീററ്റ് സോണായിരുന്നെന്നും ഒരു ദേശീയമാധ്യമം പുറത്തുവിട്ട റിപ്പോര്ട്ടില് പറയുന്നു.
യുപിയില് ഉടനീളമായി ക്രിമിനല് പട്ടികയിലുള്ള 178 പേരെയാണ് പോലീസ് ഇല്ലാതാക്കിയത്. ഇവരില് കൂടുതല് പേരും തലയ്ക്ക് 75,000 മുതല് 5 ലക്ഷം വരെ ഇനാം പ്രഖ്യാപിക്കപ്പെട്ടവരാണ്. 2017 മുതല് തുടങ്ങിയ എന്കൗണ്ടര് നടപടികളില് മീററ്റില് എന്കൗണ്ടറിന് ഇരയായത് 3152 പേരാണ്. 63 ക്രിമിനലുകള് കൊല്ലപ്പെട്ടപ്പോള് 1,708 പേര്ക്ക് പരിക്കേല്ക്കുകയും ചെയ്തു. യു.പി. പോലീസിന്റെ കണക്കുകള് പ്രകാരം എന്കൗണ്ടര് തുടങ്ങിയ 2017 മാര്ച്ച് 20 നും 2023 മാര്ച്ചിനും ഇടയില് 23,069 പേര് അറസ്റ്റിലായി. 4,911 പേര്ക്ക് സാരമായി പരിക്കേല്ക്കുകയും ചെയ്തു.
ഇതേകാലയളവില് 13 പോലീസുകാര്ക്കാണ് ജീവന് നഷ്ടമായത്. 1,424 പേര്ക്ക് വെടിയുണ്ട മുഖാന്തിരമുള്ള പരിക്കേല്ക്കുകയും ചെയ്തു. അഞ്ചുലക്ഷം ഇനാം പറഞ്ഞിരുന്ന രണ്ടു ക്രിമിനലുകള് 2.5 ലക്ഷം വിലയിട്ട നാലു പേര്, രണ്ടുലക്ഷം വിലയിട്ട രണ്ടുപേര് 1.5 ലക്ഷം വില പറഞ്ഞ ആറുപേര്, ഒരുലക്ഷം വിലയിട്ട 27 പേര് 75,000 ഇനം പറഞ്ഞ അനേകരെയും ആറു വര്ഷം കൊണ്ട് പോലീസ് വീഴ്ത്തുകയും ചെയ്തു.
പോലീസ് എന്കൗണ്ടര് ഭയന്ന് കഴിഞ്ഞ ദിവസം മുസാഫര്നഗറിലെ മന്സൂര്പൂര് പോലീസ് സ്റ്റേഷനില് കീഴടങ്ങിയത് ബൈക്ക് മോഷണ സംഘത്തിലെ അങ്കൂര് എന്ന യുവാവാണ്. 'എന്നോട് ക്ഷമിക്കൂ.. യോഗിജി, ഞാന് തെറ്റു ചെയ്തു' എന്നെഴുതിയ പ്ലക്കാര്ഡ് കയ്യില് കരുതി ഗ്രാമ മുഖ്യനൊപ്പമാണ് പ്രതി പൊലീസ് സ്റ്റേഷനിലെത്തിയത്.
യുപിയില് ക്രിമിനലുകള്ക്ക് നേരെയുള്ള നടപടികള് കൂടുന്നത് ഭയന്നാണ് അങ്കുര് സ്റ്റേഷനില് ഹാജരായതെന്ന് പൊലീസ് ഉദ്യോഗസ്ഥരെ ഉദ്ധരിച്ച് ടൈംസ് ഓഫ് ഇന്ത്യ റിപ്പോര്ട്ട് ചെയ്യുന്നു. കൊലപാതക ശ്രമം, കവര്ച്ച തുടങ്ങി നിരവധി കേസുകള് ഉള്ളയാളാണ് പ്രതി. നിരവധി ക്രിമിനല് കേസുകളില് പ്രതികളായ ഒരു സംഘവുമായുള്ള പോലീസ് ഏറ്റുമുട്ടല് നടന്നതിന്റെ പിറ്റേ ദിവസമാണ് ഇയാള് കീഴടങ്ങിയത്.
