പാരീസ്: സൂപ്പര്താരങ്ങളായ മെസ്സിയ്ക്കും എംബാപ്പേയ്ക്കും കാണികളുടെ കൂക്കുവിളി കിട്ടിയ മത്സരത്തില് പിഎസ്ജി ഏകപക്ഷീയമായ രണ്ടു ഗോളിന് തോറ്റു. ഫ്രഞ്ച് ലീഗ് വണ്ണില് റെന്നേഴ്സിനോടാണ് മെസ്സിയും എംബാപ്പേയും അടങ്ങിയ പിഎസ്ജി തോറ്റു തുന്നംപാടിയത്. എംബാപ്പേ കലിപ്പടിച്ചപ്പോള് മെസ്സിയെ കാണികള് കൂകി വിളിച്ചാണ് ടണലിലേക്ക് അയച്ചത്. സ്വന്തം ഗ്രൗണ്ടിലാണ് തോല്വി എന്നത് അവരെ കൂടുതല് നോവിച്ചു.
യുവേഫാ ചാംപ്യന്സ് ലീഗില് പരാജയം രുചിച്ചതിന് പിന്നാലെയാണ് പിഎസ്ജിയെ വീണ്ടും തോല്വി തുറിച്ചു നോക്കുന്നത്. കാള്ടോക്കോ എക്കാമ്പിയുടേയും ആര്നോഡ് കലിമുണ്ടോയുമാണ് പിഎസ്ജിയെ തകര്ത്ത് റെന്നേഴ്സിന്റെ ഗോളുകള് നേടിയത്. ആദ്യ 15 മിനിറ്റിനുള്ളില് തന്നെ ഗോള് നേടാന് മെസ്സിയ്ക്ക് അനേകം അവസരങ്ങള് കിട്ടിയെങ്കിലും താരം നഷ്ടപ്പെടുത്തി. കിട്ടിയ പന്തുകളാകട്ടെ എംബാപ്പേയ്ക്ക് പാസ് നല്കാനായിരുന്നു മെസ്സി കൂടുതല് ശ്രമിച്ചതെന്നും ആരാധകരുടെ വിമര്ശനം ഉയര്ന്നിട്ടുണ്ട്.
കിലിയന് എംബാപ്പേ പന്ത് നെറ്റില് എത്തിച്ചെങ്കിലും ഓഫ്സൈഡായി പോയി. ലീഗില് അപരിചിതരായി കഴിഞ്ഞവര്ഷം മുഴുവന് പോയ പിഎസ്ജിയ്ക്ക് 2023 പിറന്ന ശേഷം ശനിദശയാണ്. ഈ വര്ഷം ഇത് ടീം നേരിടുന്ന നാലാം തോല്വിയാണ്. ഇതോടെ കളിക്ക് മുമ്പ് രണ്ടാം സ്ഥാനക്കാരായ മാഴ്സയിയുമായി 12 വ്യത്യാസം നില നിന്ന പിഎസ്ജിയ്ക്ക് ഈ തോല്വിയോടെ വ്യത്യാസം ഏഴായി മാറി. ഇനി പത്തു മത്സരങ്ങള് മാത്രം ബാക്കി നില്ക്കേ പിഎസ്ജിയ്ക്ക് ലീഗ് കിരീടത്തിലേക്കും സമ്മര്ദ്ദമേറിയിട്ടുണ്ട്. പ്രമുഖതാരങ്ങളെല്ലാം പരുക്കില് വലയുന്ന സാഹചര്യത്തില് പ്രത്യേകിച്ചും.
പരിക്ക് മൂലം നെയ്മറിന് ഈ സീസണ് തന്നെ നഷ്ടമാകുമെന്ന സംശയം ഉയരുന്ന സാഹചര്യത്തില് ഹക്കീമി, കിംബബേ, മാര്ക്കിനോസ്, റാമോസ്, നോര്ദി മുക്കിലേ എന്നിവരെല്ലാം കഴിഞ്ഞ മത്സരത്തില് സൈഡ്ലൈനില് ആ്യിരുന്നു. 17 കാരന് എല് ചാഡ്ലി ഉള്പ്പെടെയുള്ളവരാണ് പ്രതിരോധ നിരയില് ഉണ്ടായിരുന്നത്. തോല്വി പരിശീലകന് ഗാള്ട്ടിയര്ക്കും തിരിച്ചടിയാകും.
