ന്യൂഡല്ഹി : പ്രതിപക്ഷ നേതാക്കളെ ഇ.ഡി.യും സിബിഐയേയും ഉപയോഗിച്ച് റെയ്ഡും അറസ്റ്റും നടത്തുന്ന കേന്ദ്രസര്ക്കാരിന് രാജ്യത്ത് വമ്പന് സാമ്പത്തീക തട്ടിപ്പ് നടത്തിയ മെഹുല് ചോക്സിയ്ക്ക് ഇന്റര്പോള് ഇടപെടല് പോലുമില്ലെന്നു വിമര്ശിച്ച് കോണ്ഗ്രസ് നേതാവ് മല്ലികാര്ജ്ജുന ഖാര്ഗേ. റെഡ്നോട്ടീസ് പുറപ്പെടുവിക്കാനുള്ളവരുടെ പട്ടികയില് നിന്നും മെഹുല് ചോക്സിയുടെ പേര് ഇന്റര്പോള് ഒഴിവാക്കിയതിന് പിന്നാലെയാണ് വിമര്ശനവുമായി ഖാര്ഗേ എത്തിയത്.
ഇഡിയും സിബിഐയും പ്രതിപക്ഷ നേതാക്കളെ വേട്ടയാടുമ്പോള് മോഡിജിയുടെ മെഹുല്ഭായിയ്ക്ക് ഇന്റര്പോളില് നിന്നും ആശ്വാസം കിട്ടിയെന്ന് ഖാര്ഗേ പരിഹസിച്ചു. അഞ്ചു വര്ഷം മുമ്പ് രാജ്യം വിട്ടോടാന് സഹായം നല്കിയ പഴയ സുഹൃത്ത് ഒരു സഹായം ചോദിക്കുമ്പോള് എങ്ങിനെ അദ്ദേഹത്തിന് തിരസ്ക്കരിക്കാനാകുമെന്നും പ്രിയപ്പെട്ടവന് വേണ്ടി വേണമെങ്കില് പാര്ലമെന്റിനെ തളര്ത്തിയിടാനും മോഡി തയ്യാറാകുമെന്നും ഖാര്ഗെ പറഞ്ഞു.
പഞ്ചാബ് നാഷണല് ബാങ്കില് നിന്നും 11,356.84 കോടിയുടെ വായ്പാ തട്ടിപ്പ് നടത്തി ഇന്ത്യയില് നിന്നും മുങ്ങിയ മെഹുല് ചോക്സിയ്ക്കെതിരേ 2018 ഡിസംബറില് ഇന്റര്പോള് റെഡ് കോര്ണര് നോട്ടീസ് പുറപ്പെടുവിച്ചിരുന്നു. എന്നാല് പുതിയ പട്ടികയില് നിന്നും ഒഴിവാക്കി. ഇന്റര്പോളിന്റെ നീക്കത്തെ ഇന്ത്യന് സര്ക്കാര് എതിര്ത്തതായിട്ടാണ് വിവരം. പക്ഷേ ഇത് നിഷേധിക്കപ്പെട്ടിട്ടുണ്ട്. അതേസമയം ഈ നീക്കം ചോക്സിയുടെ പുറത്താക്കല് കാത്തിരിക്കുന്ന ഇഡിയ്ക്കും സിബിഐ യ്ക്കും തിരിച്ചടിയായിട്ടുണ്ട്.
അതേസമയം ആന്റിഗ്വയില് നിന്നും ചോക്സിയെ പുറത്താക്കല് നടപടിയില് ഇതൊന്നും പ്രതിബന്ധമാകില്ലെന്നാണ് ഔദ്യോഗിക വിവരം. നിലവില് കരീബിയന് ദ്വീപുകളിലാണ് ചോക്സി. ഇന്ത്യന് സര്ക്കാര് ചോക്സിയെ ഇന്ത്യയ്ക്ക് കൈമാറണമെന്നു ആന്റിഗ്വ അധികൃതരെ അറിയിച്ചിട്ടുണ്ട്.
