തൃശൂര്; വടക്കുന്നാഥ ക്ഷേത്രത്തില് റിപ്പര് ജയാനന്ദന്റെ മകളുടെ വിവാഹം നടന്നു. ജയിലില് നിന്നും മകളുടെ വിവാഹത്തില് പങ്കെടുക്കുന്നതിനായി ജയാനന്ദന് എത്തി. ചടങ്ങില് പങ്കെടുപ്പിച്ചത് കനത്ത പൊലീസ് സംരക്ഷണത്തോടെയാണ്. മകളുടെ വിവാഹത്തിന് പങ്കെടുക്കുന്നതിന് വേണ്ടിയാണ് കടുത്ത ഉപാധികളോടെ ഹൈക്കോടതി പരോള് അനുവദിച്ചത്. 17 വര്ഷത്തിന് ശേഷം ആദ്യമായാണ് റിപ്പര് ജയാനന്ദന് പരോളിലിറങ്ങുന്നത്.
വിയ്യൂര് സെന്ട്രല് ജയിലില് അതീവ സുരക്ഷയോടെ കഴിയുകയായിരുന്നു റിപ്പര് ജയാനന്ദന്.ചൊവ്വാഴ്ച രാവിലെ ഒമ്പത് മണിക്കാണ് ജയാനന്ദനെ പുറത്തിറക്കിയത്. ഹൈക്കോടതി അഭിഭാഷകയായ മകളുടെ അപേക്ഷ പരിഗണിച്ചാണ് രണ്ട് ദിവസത്തെ എസ്കോട്ട് പരോള് അനുവദിച്ചത്. 15 ദിവസത്തെ പരോളിനായി അപേക്ഷിച്ചിരുന്നതെങ്കിലും സര്ക്കാര് എതിര്ക്കുകയായിരുന്നു.
പിന്നീട് വിവാഹത്തില് പങ്കെടുക്കാന് മാത്രം അനുമതി ആവശ്യപ്പെട്ടെങ്കിലും സര്ക്കാര് വഴങ്ങിയില്ല. തന്റെ വിവാഹമാണ് നടക്കുന്നതെന്നും അച്ഛന് വിവാഹത്തിന് എത്തണമെന്ന് വലിയ ആഗ്രഹമാണെന്നും മകള് കോടതിയില് പറഞ്ഞു. ജസറ്റിസ് ബെച്ചു കുര്യനാണ് റിപ്പറിനെ കടുത്ത ഉപാധികളോടെ പരോള് അനുവദിച്ചത്.
24 കേസുകളിലെ പ്രതിയാണ് ജയാനന്ദന്. സ്ത്രീകളെ തലക്കടിച്ച് വീഴ്ത്തിയതിന് ശേഷം സ്വര്ണം മോഷ്ടിക്കുന്നതാണ് ഇയാളുടെ രീതി. കോടതി ഇയാള്ക്ക് ജീവിതാവസാനം വരെ കഠിന തടവിനാണ് വിധിച്ചത്.
