ആക്ടിവയില് കാലാതീതമായ മാറ്റങ്ങള് വരുത്തുന്നതില് ഹോണ്ട ഒരിക്കലും മടികാട്ടിയിട്ടില്ല. കുറച്ച് മാസങ്ങള്ക്ക് മുമ്പ് കമ്പനി ആക്ടിവയുടെ H-സ്മാര്ട്ട് പതിപ്പ് അവതരിപ്പിച്ചിരുന്നു. ഫിസിക്കല് കീ ഉപയോഗിക്കാതെ സ്കൂട്ടര് ലോക്ക് ചെയ്യാനും അണ്ലോക്ക് ചെയ്യാനും സ്മാര്ട്ട് കീ റൈഡറെ അനുവദിക്കുന്ന സംവിധാനമായിരുന്നു ഇത്. ജനങ്ങള്ക്കിടയില് നിന്നും വലിയ സ്വീകാര്യത നേടിയ ഈ സാങ്കേതികവിദ്യ 125 സിസി വേരിയന്റിലേക്കും പരിചയപ്പെടുത്താന് പോവുകയാണ് ഹോണ്ട.
ഹോണ്ട ആക്ടിവയ്ക്ക് ഡിജിറ്റല് ക്ലസ്റ്റര്, ബ്ലൂടൂത്ത് കണക്റ്റിവിറ്റി തുടങ്ങിയ കൂടുതല് ഫീച്ചറുകള് ലഭിക്കുമെന്ന വാര്ത്തകള് പുറത്തു വന്നതിനു പിന്നാലെയാണ് ആക്ടിവ 125 മോഡലിലേക്ക് പുതിയ സജ്ജീകരണങ്ങള് അവതരിപ്പിക്കാന് ഒരുങ്ങുന്നത്. ഇതിന്റെ വ്യക്തമായ സൂചനകള് നല്കുന്ന പോസ്റ്റര് ചിത്രങ്ങള് സമൂഹ മാധ്യമങ്ങളിലൂടെ ഡീലര്ഷിപ്പ് വൃത്തങ്ങള് പുറത്തുവിട്ടിട്ടുമുണ്ട്. സ്മാര്ട്ടിവ എന്ന വിശേഷണവുമായാണ് ആക്ടിവ 125 H-സ്മാര്ട്ട് പതിപ്പിന്റെ പുതിയ ചിത്രങ്ങള് പ്രത്യക്ഷപ്പെട്ടിരിക്കുന്നത്.
സ്മാര്ട്ട് ഫൈന്ഡ്, സ്മാര്ട്ട് അണ്ലോക്ക്, സ്മാര്ട്ട് സ്റ്റാര്ട്ട്, സ്മാര്ട്ട് സേഫ് തുടങ്ങിയ ഫീച്ചറുകള് പ്രവര്ത്തനക്ഷമമാക്കുന്ന പുതിയ സ്മാര്ട്ട് കീയുടെ ലഭ്യതയായിരിക്കും പ്രധാന കൂട്ടിച്ചേര്ക്കല്. സ്മാര്ട്ട് കീയിലെ ആന്സര് ബാക്ക് സിസ്റ്റം വാഹനം എളുപ്പത്തില് കണ്ടെത്തുന്നതിനും സഹായകരമാവും. ആന്സര് ബാക്ക് ബട്ടണ് അമര്ത്തുമ്പോള് നാല് ടേണ് സിഗ്നലുകളും മിന്നിമറയുന്ന രീതിയിലാണ് ഈ ഫീച്ചര് ക്രമീകരിച്ചിരിക്കുന്നത്. വലിയ പാര്ക്കിംഗ് ഏരിയിലെല്ലാം സ്കൂട്ടര് കണ്ടുപിടിക്കുന്നതിന് ഇത് സഹായകരമാവും.
ഫിസിക്കല് കീ ഉപയോഗിക്കാതെ വാഹനം ലോക്ക് ചെയ്യാനും അണ്ലോക്ക് ചെയ്യാനും സ്മാര്ട്ട് കീ സഹായിക്കുന്നുവെന്നതും പ്രത്യേകതയാണ്. ഇത്തരത്തില് ആക്ടിവേഷന് കഴിഞ്ഞ് 20 സെക്കന്ഡിനുള്ളില് ഒരു പ്രവര്ത്തനവും സിസ്റ്റം കണ്ടെത്തുന്നില്ലെങ്കില് സ്കൂട്ടര് സ്വയമേവ ഓഫാവുന്ന രീതിയും ഹോണ്ട കോര്ത്തിണക്കിയിട്ടുണ്ട്. സ്കൂട്ടറിന്റെ 2 മീറ്റര് പരിധിയിലാണ് സ്മാര്ട്ട് കീ ഉള്ളതെങ്കില് ലോക്ക് മോഡിലെ നോബ് ഇഗ്നിഷന് പൊസിഷനിലേക്ക് തിരിക്കുകയും കീ പുറത്തെടുക്കാതെ സ്റ്റാര്ട്ട് ബട്ടണ് അമര്ത്തുകയും ചെയ്ത് റൈഡര്ക്ക് സുഗമമായി വാഹനം ഓടിച്ചുകൊണ്ട് പോവാം.
മാപ്പ് ചെയ്ത സ്മാര്ട്ട് ഇസിയു, സ്മാര്ട്ട് കീ എന്നിവ തമ്മില് ഇലക്ട്രോണിക് ആയി പൊരുത്തപ്പെടുത്തിക്കൊണ്ട് (ID) ഒരു സുരക്ഷാ ഉപകരണമായി പ്രവര്ത്തിക്കുന്നു. അതിനാല് വാഹന മോഷണം പോവുമെന്ന ഭയവും ഉടമയ്ക്ക് വേണ്ട. സ്മാര്ട്ട് കീയുമായി സുരക്ഷിതമായ കണക്ഷന് ഇല്ലെങ്കില് ഇമോബിലൈസര് സിസ്റ്റം സജീവമാകില്ലെന്നാണ് കമ്പനി പറയുന്നത്. ഈ ഫീച്ചറുകള് കൂട്ടിച്ചേര്ക്കുന്നത് മാറ്റിനിര്ത്തിയാല് ആക്ടിവ 125 പതിപ്പിന് മറ്റ് ഡിസൈന്, മെക്കാനിക്കല് പരിഷ്ക്കാരങ്ങളൊന്നും ഹോണ്ട അവതരിപ്പിക്കില്ല. എന്നാല് നിലവിലെ 124 സിസി എയര്-കൂള്ഡ് എഞ്ചിന് OBD2 നിയന്ത്രണങ്ങള് പാലിക്കുന്നതിനായി നവീകരിക്കും.
8.18 bhp കരുത്തില് 10.3 Nm torque നിര്മിക്കുന്ന രീതിയിലാണ് എഞ്ചിന് ട്യൂണ് ചെയ്തിരിക്കുന്നത്. സിംഗിള് പീസ് സീറ്റ്, ഗ്രാബ് ഹാന്ഡില്, ഫ്രണ്ട് ഏപ്രോണില് ഘടിപ്പിച്ചിരിക്കുന്ന ടേണ് ഇന്ഡിക്കേറ്ററുകള്ക്കിടയിലുള്ള ക്രോം ട്രിം, ചെറിയ ബ്ലാക്ക് ഫ്ലൈസ്ക്രീന്, എല്ഇഡി ഹെഡ്ലാമ്പ്, സൈഡ് സ്റ്റാന്ഡ് എഞ്ചിന് കട്ട് ഓഫ് ഫംഗ്ഷന്, അപ്-റൈറ്റ് ഹാന്ഡില്ബാര്, സെമി-ഡിജിറ്റല് ഇന്സ്ട്രുമെന്റ് ക്ലസ്റ്റര്, സിഗ്നേച്ചര് സൈഡ് ബോഡി വര്ക്ക്, ബ്ലാക്ക് അലോയ് വീലുകള്, റിയര്വ്യൂ മിററുകള് തുടങ്ങിയവ സവിശേഷതകളെല്ലാം സ്കൂട്ടറില് അതേപടി തുടരും. ഹോണ്ട ആക്ടിവ 125 H-സ്മാര്ട്ട് വേരിയന്റിന് അതിന്റെ സ്റ്റാന്ഡേര്ഡ് പതിപ്പുകളെ അപേക്ഷിച്ച് 3,000 രൂപ മുതല് 4,000 രൂപ വരെ അധികം മുടക്കേണ്ടിയും വന്നേക്കാം.
