അടുത്ത കാലത്തിറങ്ങിയ നിരവധി സമുദ്ര പഠനങ്ങള് പ്ലാസ്റ്റിക് മാലിന്യങ്ങള് കരയെപ്പോലെ കടലിനെയും മാലിന്യത്താല് നിറയ്ക്കുകയാണെന്ന് ചൂണ്ടിക്കാട്ടുന്നു. വിവിധ രാജ്യങ്ങളില് പ്ലാസ്റ്റിക് മാലിന്യ നിര്മ്മാര്ജ്ജനത്തിന് പല പദ്ധതികളും ആരംഭിച്ചെങ്കിലും ഒന്നും ഇതുവരെയും പൂര്ണ്ണ ഫലപ്രാപ്തിയിലേയ്ക്ക് എത്തിയിട്ടില്ലെന്നതാണ് യാഥാര്ത്ഥ്യം. എന്നാല് യുകെയിലെ ശാസ്ത്രജ്ഞര് ഈ പ്രശ്നത്തിന് ഒരു ശാശ്വത പരിഹാരവുമായി എത്തിയിരിക്കുകയാണ്.
യുകെയിലെ ശാസ്ത്രജ്ഞര് പ്ലാസ്റ്റിക്കില് നിന്നും വ്യാവസായിക അടിസ്ഥാനത്തില് ഹൈഡ്രജന് ഉത്പാദിപ്പിക്കാനുള്ള സാങ്കേതിക വിദ്യ വികസിപ്പിച്ചെന്നാണ് ഇപ്പോള് അവകാശപ്പെടുന്നത്. പുതിയ സാങ്കേതിക വിദ്യ ഉപയോഗിച്ച് പ്ലാസ്റ്റിക് മാലിന്യവും കാര്ബണ്ഡൈ ഓക്സൈഡ് ഉപയോഗിച്ച് സിന്തറ്റിക് ഗ്യാസ് അഥവാ 'സിംഗസ്' ഉത്പാദിപ്പിക്കാനാകും. ഇതോടെ ഒരു ദിവസം ടണ് കണക്കിന് പ്ലാസ്റ്റിക്കിനെ ഹൈഡ്രജനാക്കി മാറ്റാമെന്നും ഇത് വാഹനങ്ങള്ക്ക് ഇന്ധനമാക്കി പുനരുപയോഗിക്കാമെന്നും ഇവര് പറയുന്നു. ഇത് വഴി വലിയ തോതിലുള്ള പ്ലാസ്റ്റിക്ക് മാലിന്യം ഭൂമുഖത്ത് നിന്ന് നിര്മ്മാര്ജ്ജം ചെയ്യാന് സാധിക്കും.
40 കോടി ടണ് പ്ലാസ്റ്റിക്കാണ് ഒരു വര്ഷം ലോകത്ത് ഉത്പാദിപ്പിക്കുന്നതെന്ന് യുണൈറ്റഡ് നേഷന്സ് എന്വയോണ്മെന്റ് പ്രോഗ്രാമിന്റെ കണക്കുകള് സൂചിപ്പിക്കുന്നു. ഇതില് 85 ശതമാനവും മാലിന്യനിക്ഷേപമായി മാറുന്നു. അതായത് ഭൂമിയിലേക്കും അത് വഴി കടലിലേക്കും ഇവ വലിച്ചെറിയപ്പെടുന്നുവെന്നര്ത്ഥം. നൂറുകണക്കിന് വര്ഷങ്ങളാണ് ഈ പ്ലാസ്റ്റിക്കുകള് വിഘടിക്കാന് വേണ്ടിവരുന്നത്. അതിനാല് തന്നെ ഈ മാലിന്യത്തില് നിന്നും ഹൈഡ്രജന് ഉത്പാദിപ്പിക്കാന് കഴിഞ്ഞാല് പാരിസ്ഥിതിക രംഗത്തും ശാസ്ത്രരംഗത്തും ഇത് വലിയൊരു കുതിച്ച് ചാട്ടമാകും. അതോടൊപ്പം പ്രകൃതി മലിനീകരണത്തിന്റെ തോത് കുറയ്ക്കാനും സാധിക്കുന്നു.
ലായനികളും, പെയിന്റുകളുമാക്കി പ്ലാസ്റ്റിക്കിനെ പുനരുപയോഗിക്കാറുണ്ട്. കൂടാതെ ചില അഡിറ്റീവുകള് ചേര്ത്ത് പ്ലാസ്റ്റിക്ക് റീസൈക്കിള് ഗ്യാസോലിനാക്കിയും മാറ്റുന്നു. കേംബ്രിഡ്ജ് സര്വകലാശാലയിലെ ഒരു സംഘം ഗവേഷകര് പ്ലാസ്റ്റിക്കിനോടൊപ്പം കാര്ബണ് ഡൈഓക്സൈഡും സംയോജിപ്പിച്ച് ഹൈഡ്രജന്റെ ഉറവിടമായ സിങ്കാസ്, സൗന്ദര്യവര്ദ്ധക വ്യവസായത്തില് വ്യാപകമായി ഉപയോഗിക്കുന്ന ഗ്ലൈക്കോളിക് ആസിഡ് എന്നിവ ഉത്പാദിപ്പിക്കാമെന്ന് അവകാശപ്പെടുന്നത്. ഈ പ്രക്രിയയ്ക്കായി സൗരോര്ജ്ജമാകും ഉപയോഗിക്കുക.
