സിഡ്ണി: മാമത്ത് ഇറച്ചി തയാര്, കഴിക്കാന് ആളുണ്ടോ? 10,000 വര്ഷങ്ങള്ക്ക് മുമ്പ് വംശനാശം സംഭവിച്ച വൂള് മാമത്തിന്റെ കോശങ്ങളാണ് ഓസ്ട്രേലിയന് കമ്പനി വളര്ത്തിയെടുത്തത്. നെതര്ലാന്ഡിലെ സയന്സ് മ്യൂസിയമായ നെമോയില് ഇന്ന് മാമത്ത് മീറ്റ്ബോള് പുറത്തിറക്കും.
മാമത്ത് ഫോസിലുകളില്നിന്നു ലഭിച്ച കോശങ്ങള് ഉപയോഗിച്ചാണ് ഇറച്ചി തയാറാക്കിയത്. ചെമ്മരിയാടിന്റെ മൂലകോശങ്ങളില് മാമത്തിന്റെ ഡി.എന്.എ. ഉള്ക്കൊള്ളിച്ചാണു ഇറച്ചി നിര്മിച്ചെടുത്തത്. 2000 കോടി കോശങ്ങളാണ് അവയില് ഉള്ക്കൊള്ളുന്നത്. പക്ഷേ, മാമത്ത് കോശങ്ങള് ഭക്ഷിക്കാന് ആര്ക്കും െധെര്യംപോരാ. മാമത്ത് ഇറച്ചിയോട് മനുഷ്യശരീരം എങ്ങനെ പ്രതികരിക്കുമെന്ന് അറിയാത്തതാണു ഭയത്തിനു കാരണം.
എങ്കിലും മാമത്ത് ഇറച്ചിക്കു മികച്ച രുചിയുണ്ടാകാന് സാധ്യതയുണ്ടെന്നാണു ശാസ്ത്രജ്ഞര് പറയുന്നത്. സമാന രീതിയില് ഡോഡോ ഇറച്ചി സൃഷ്ടിക്കുകയാണു ലക്ഷ്യമെന്നു ക്വീന്സ് ലന്ഡ് സര്വകലാശാലയിലെ ഓസ്ട്രേലിയന് ഇന്സ്റ്റിറ്റ്യൂട്ട് ഫോര് ബയോ എന്ജിനീയറിങ്ങിലെ പ്രഫസര് വോള്വെറ്റാങ് പറഞ്ഞു. ഡോഡോകള് വംശനാശം വന്നിട്ടു വര്ഷങ്ങളായി. ഇതിന് ആവശ്യമായ ഡി.എന്.എ. സീക്വന്സുകള് ലഭ്യമല്ലാത്തതാണു പദ്ധതിക്കു തടസം.
കൃത്രിമ ഇറച്ചിക്കു സാധ്യതയേറെയാണെന്നാണു പ്രഫ. വോള്വെറ്റാങ്ങിന്റെ നിലപാട്. മൃഗങ്ങളെ കൊലപ്പെടുത്തി മാംസം ഉത്പാദിപ്പിക്കാന് കൂടുതല് ഭൂമിയും വെള്ളവും ആവശ്യമാണ്. അവ മീഥെയ്നും പുറംതള്ളുന്നില്ല. കൃത്രിമ മാംസം ഉത്പാദനം ഹരിതഗൃഹ വാതക പുറന്തള്ളല് 78-96 ശതമാനം കുറയ്ക്കും. ഭൂവിനിയോഗം 99 ശതമാനവും ജല ഉപയോഗം 82-96 ശതമാനവും കുറവ് മതിയാകും.
