കട്ടക്ക്: രാജ്യത്തെ തൊഴിലാളികളെ ലക്ഷ്യമിട്ട് കേന്ദ്ര സംസ്ഥാന സര്ക്കാരുകള് വമ്പന് പദ്ധതികളാണ് ഓരോ ബജറ്റിലും പ്രഖ്യാപിക്കുന്നത്. എന്നാല് ക്ഷേമപരിപാടികളെല്ലാം പേപ്പറിലും പേനയിലുമായി ഒതുങ്ങുകയാണ്. പണിയെടുത്തതിന്റെ കൂലിയോ ഭക്ഷണമോ കിട്ടാതെ വലഞ്ഞ അന്യ സംസ്ഥാന തൊഴിലാളി വീട്ടില് തിരിച്ചെത്താന് പട്ടിണിയില് വലഞ്ഞ് നടക്കേണ്ടി വന്നത് 1100 കിലോമീറ്റര്.
ഒഡീഷക്കാരായ കൂലിപ്പണിക്കാരനാണ് ഇത്രയും ദൂരം നടന്ന് നാട്ടില് തിരിച്ചെത്തിയത്. ചെയ്ത ജോലിക്ക് ഒരു പൈസ പോലും കൂലി കിട്ടാതെ വരികയും മതിയായ ഭക്ഷണം പോലും കിട്ടാതെ തൊഴിലുടമയില് നിന്നും ദുരിതം സഹിക്കേണ്ടി വന്ന സാഹചര്യത്തിലാണ് ഇവര് നാട്ടിലേക്ക് മടങ്ങിയത്. ഒഡീഷയില് പണിയില്ലാതെ വന്നതോടെ ഒഡീഷയിലെ കലഹണ്ടി ജില്ലയില് നിന്നും ജയപത്ന ബ്ളോക്കിന് കീഴിലെ ടിംഗപട്ടണ ഗ്രാമത്തില് നിന്നും ജോലി തേടി ബംഗലുരുവിലേക്ക് പോയവരാണ് തിരിച്ചു നടന്നു പോരേണ്ടി വന്നത്. ബംഗലുരുവില് നിന്നും ഇവര് നാട്ടിലേക്ക് നടന്നു പോയി.
പിടിച്ചുനില്ക്കാന് യാതൊരു മാര്ഗ്ഗവുമില്ലാതായതോടെയാണ് ഇവര് നടന്നു വീട്ടിലേക്ക് പോകാന് തീരുമാനിച്ചത്. തുടര്ന്ന് ഗ്രാമത്തിലെത്താന് എട്ടു ദിവസമെടുത്തു. ഇവരുടെ ദുരിതം കണ്ട് മനസ്സലിഞ്ഞ ചിലര് ഭക്ഷണവും പണവും നല്കി സഹായിക്കുകയും ചെയ്തിരുന്നു. ഒഡീഷയില് തൊഴിലുറപ്പ് ജോലിക്ക് കീഴില് പണി ചെയ്തിരുന്ന ഇവര് അത്തരം പണികള് കിട്ടാതെ വന്നപ്പോഴാണ് ബംഗലുരുവിലേക്ക് തൊഴില് തേടി പോയത്.
