ന്യൂഡല്ഹി: ഏറ്റവും സ്വാധീനിക്കപ്പെട്ട 100 പേരുടെ പട്ടികയില് തലപ്പത്ത് ബോളിവുഡ് സൂപ്പര്താരം ഷാരൂഖിനെ അവരോധിച്ച് ടൈം മാസിക. വായനക്കാരില് നിന്നുള്ള വോട്ടെടുപ്പിന്റെ അടിസ്ഥാനത്തില് തയ്യാറാക്കിയ പട്ടികയില് 1.2 ദശലക്ഷം വോട്ടുകളില് നാലു ശതമാനവും നേടിയാണ് ഷാരൂഖ് മുന്നിലെത്തിയത്. രണ്ടാം സ്ഥാനത്ത് മരണമടഞ്ഞ ഇറാനിയന് മനുഷ്യാവകാശ പ്രവര്ത്തക മഹ്സാ അനീമി എത്തി.
അടുത്തിടെ പത്താനിലൂടെ ഹിറ്റ് ചാര്ട്ടിലേക്ക് തിരിച്ചെത്തിയ ഷാരൂഖ് ഇന്ത്യയിലും പുറത്തും വന് തരംഗം ഉണ്ടാക്കിയിരുന്നു. 1000 കോടി രൂപയാണ് സിനിമ വാരിയത്. സിനിമ 57 കാരനായ താരത്തിന്റെ വലിയ തിരിച്ചുവരവായി മാറുകയും ചെയ്തു. നാലു വര്ഷത്തിന് ശേഷമായിരുന്നു ഷാരൂഖ് നായകനായി ഒരു സിനിമയില് എത്തുന്നത്. അത് ബോക്സോഫീസില് വെന്നിക്കൊടിയും പാറിച്ചു.
ഇറാനിലെ സ്വാതന്ത്ര്യപ്രവര്ത്തകയായി ചെറു പ്രായത്തില് തന്നെ ശ്രദ്ധനേടിയ മഹ്സാ അമീനിയാണ് രണ്ടാമത് വന്നത്. ഹിജാബ് ധരിക്കാത്തതിന്റെ പേരില് ഇറാനിലെ സദാചാരപോലീസ് കഴിഞ്ഞ സെപ്തംബറില് പിടികൂടിയ മഹ്സ പോലീസ് സ്റ്റേഷനില് കുഴഞ്ഞുവീഴുകയും മൂന്ന് ദിവസം കഴിഞ്ഞപ്പോള് മരണപ്പെടുകയുമായിരുന്നു. മൂന്ന് ശതമാനം വോട്ടുകളാണ് മഹ്സാ അമീനി നേടിയത്. ടൈമിന്റെ 2022 ലെ ഹീറോസ് ഓഫ് ദി ഇയറും കഴിഞ്ഞ വര്ഷത്തെ പേഴ്സണ് ഓഫ് ദി ഇയര് റീഡര് പോളും ഇറാനിയന് യുവതിയാണ് നേടിയത്.
1.9 ശതമാനം വോട്ടു നേടിയ ഹാരി രാജകുമാരനും ഭാര്യ മേഗന് മെര്ക്കലും മൂന്നും നാലും സ്ഥാനത്ത് എത്തി. ബ്രിട്ടീഷ് രാജകുടുംബത്തിന്റെ സ്റ്റാറ്റസ് വേണ്ടെന്ന് വെച്ച ഹാരിയുടെ കൊട്ടാര ഓര്മ്മകളായ 'സ്പേയര്' ജനുവരിയില് പുറത്തിറക്കിയത് വലിയ വാര്ത്താപ്രാധാന്യമാണ് നേടിയത്.
അര്ജന്റീനയെ ലോകകപ്പ് വിജയത്തിലേക്ക് നയിച്ച ഫുട്ബോള് ഇതിഹാസം ലിയോണേല് മെസ്സിയാണ് അഞ്ചാം സ്ഥാനത്ത് എത്തിയത്. 1.8 ശതമാനം വോട്ടുകളാണ് മെസ്സി നേടിയത്. ഓസ്ക്കര് ജേതാവ് മിഷേല് യോ, മുന് ടെന്നീസ് താരം സെറീനാ വില്യംസ്, മേട്ടാ സിഇഒ മാര്ക്ക് സക്കര്ബര്ഗ്, ബ്രസീലിയന് പ്രസിഡന്റ് ലൂയിസ് ഇനാഷ്യോ ലുല ഡാസില്വ എന്നിവരാണ് തൊട്ടടുത്ത സ്ഥാനങ്ങളില്.
