ഹൈദരാബാദ്: പ്രധാനമന്ത്രിയുടെ സന്ദര്ശനത്തെ പൂര്ണ്ണമായും അവഗണിച്ച് തെലുങ്കാന മുഖ്യമന്ത്രി ചന്ദ്രശേഖര റാവു. നരേന്ദ്രമോഡിയുടെ ദക്ഷിണേന്ത്യന് സന്ദര്ശനത്തിന്റെ ഭാഗമായുള്ള തെലുങ്കാനയിലെ ഔദ്യോഗിക പരിപാടികളില് നിന്നും വിട്ടു നിന്ന ചന്ദ്രശേഖര റാവു പ്രധാനമന്ത്രിയെ സ്വീകരിക്കാനും എത്തിയില്ല. വഴിയിലുടനീളം മോഡിയേയും കേന്ദ്രസര്ക്കാരിനെയും വിമര്ശിക്കുന്ന പോസ്റ്ററുകളും പതിച്ചിരുന്നു.
11,300 കോടിയുടെ സെക്കന്ദരബാദ് - തിരുപ്പതി വന്ദേഭാരത് എക്സ്പ്രസിന്റെ ഉദ്ഘാടനത്തിന്റെ ഭാഗമായിട്ടായിരുന്നു പ്രധാനമന്ത്രി തെലുങ്കാനയില് എത്തിയത്. പ്രോട്ടോകോള് പ്രകാരം പ്രധാനമന്ത്രിയുടെ സന്ദര്ശനം സംബന്ധിച്ച വിവരങ്ങള് മുഖ്യമന്ത്രിയുടെ ഓഫീസിനെ ധരിപ്പിക്കുകയും പരിപാടിയിലേക്ക് കെ.സി.ആറിന് ക്ഷണം അയയ്ക്കുകയും ചെയ്തതാണ്. എന്നാല് തെലുങ്കാന മുഖ്യമന്ത്രി പരിപാടി ബഹിഷ്ക്കരിച്ചു.
പ്രധാനമന്ത്രിയെ ബഗുംപേട്ട് വിമാനത്താവളത്തില് സ്വീകരിക്കാനും മുഖ്യമന്ത്രി എത്തിയില്ല. പകരം പ്രധാനമന്ത്രിയെ സ്വീകരിക്കാന് എത്തിയത് മറ്റൊരു മന്ത്രിയായ തലസാനി ശ്രീനിവാസ് യാദവ് ആയിരുന്നു. ഇതോടെ ചന്ദ്രശേഖരറാവു തന്നെ അവഗണിച്ചതിന്റെ കലിപ്പ് പ്രസംഗത്തിലൂടെ മോഡി തീര്ക്കുകയും ചെയ്തു. കേന്ദ്രം കൊണ്ടുവരുന്ന പദ്ധതിയോട് സംസ്ഥാനം സഹകരിക്കാത്തതില് തനിക്ക് വേദനയുണ്ടെന്ന് പറഞ്ഞു.
ഹൈദരാബാദിലെ പരേഡ് ഗ്രൗണ്ടില് ബിബിനഗര് എയിംസ് തറക്കല്ലിട്ടുകൊണ്ട് നടന്ന പൊതുപരിപാടിയിലായിരുന്നു പ്രധാനമന്ത്രി തെലുങ്കാന മുഖ്യമന്ത്രിയെ വിമര്ശിച്ചത്. വംശവാഴ്ച രാഷ്ട്രീയമാണ് അഴിമതി വളര്ത്തുന്നതെന്നും പറഞ്ഞു. കുടുംബവാഴ്ച വരുന്നിടത്ത് അഴിമതി വളരുമെന്നും പറഞ്ഞു. തെലുങ്കാന ജനതയുടെ വികസനത്തിന് വേണ്ടിയുള്ള പദ്ധതികള്ക്ക് തടസ്സം വരുത്താന് ആരേയും അനുവദിക്കരുതെന്ന് താന് സംസ്ഥാന സര്ക്കാരിനോട് അഭ്യര്ത്ഥിക്കുകയാണെന്നും പറഞ്ഞു.
അതേസമയം കഴിഞ്ഞ 14 മാസത്തിനിടയില് അഞ്ചാം തവണയാണ് മോഡിയെ ചന്ദ്രശേഖര റാവു അവഗണിക്കുന്നത്. 2021 സെപ്തംബറില് ആയിരുന്നു ഇരുവരും അവസാനമായി ഒരുമിച്ച് ഒരു പരിപാടിയില് പങ്കെടുത്തത്. പ്രോട്ടോകോള് പ്രകാരം പ്രധാനമന്ത്രിയുടെ പരിപാടികളില് അദ്ദേഹത്തെ സ്വീകരിക്കാന് മുഖ്യമന്ത്രി എത്തണമെന്നാണ്. എന്നാല് 2022 ഫെബ്രുവരി 5 ന് ഹൈദരാബാദിലെ തുല്യതാ പ്രതിമ ഉദ്ഘാടനം ചെയ്യാന് എത്തിയത് മുതല് കെസിആര് പ്രധാനമന്ത്രിയെ സ്വീകരിക്കാന് എത്തിയിട്ടില്ല.
അതേസമയം പ്രധാനമന്ത്രി ദക്ഷിണേന്ത്യ സന്ദര്ശിക്കാന് എത്തുന്നതിന് തൊട്ടു മുമ്പാണ് ബിജെപി പ്രസിഡന്റ് ബണ്ടി സഞ്ജയ് കുമാറിന്റെ അറസ്റ്റ് വന്നത്. 10 ാം ക്ലാസ്സ് ചോദ്യപേപ്പര് ചോര്ന്ന കേസില് ഏപ്രില് 6 നായിരുന്നു അറസ്റ്റ്. പിറ്റേന്ന് തന്നെ വിടുകയും ചെയ്തു.
