എലത്തൂര് ട്രെയിന് തീവണ്ടി തീവെപ്പ് കേസിലെ പ്രതി ഷാരൂഖ് സെയ്ഫിയ്ക്ക് ആരോഗ്യ പ്രശ്നങ്ങള് ഇല്ലെന്ന് പരിശോധിച്ച ഡോക്ടര് വെളിപ്പെടുത്തി. തെളിവെടുപ്പിനോ, ചോദ്യം ചെയ്യലിനോ തടസ്സമില്ലെന്നും ഡോക്ടര് അറിയിച്ചു. ചോദ്യം ചെയ്യലിനിടെ ഷാറൂഖ് തനിയ്ക്ക് ശാരീരിക അസ്വസ്തതകള് ഉണ്ടെന്നു പറഞ്ഞത് പ്രതിയുടെ തന്ത്രമാണെന്ന വിലയിരുത്തലിലാണ് പൊലീസ്.
നിരവധി ചോദ്യങ്ങള്ക്കാണ് ഷാരൂഖില് നിന്ന് ഉത്തരം കിട്ടേണ്ടത്. എന്നാല് നിര്ണായക ചോദ്യം ചെയ്യല് അന്വേഷണ സംഘം തുടങ്ങാനിരിക്കെ പ്രതി തുടര്ച്ചയായി ആരോഗ്യ പ്രശ്നങ്ങള് ഉന്നയിക്കുന്നത് അന്വേഷണ സംഘത്തിന് വെല്ലുവിളിയാകുന്നുണ്ട്. തലവേദന, വയറ് വേദനയും, നിരന്തര മൂത്രശങ്ക ഇവയൊക്കെയാണ് എല്ലായ്പ്പോഴും പ്രതി പറയുന്നത്. ഈ സാഹചര്യത്തിലാണ് മെഡിക്കല് ചെക്കപ്പ് വേണമെന്ന് അന്വേഷണ സംഘം ആവശ്യപ്പെട്ടത്. അത് അനുസരിച്ചു മെഡിക്കല് കോളേജില് നിന്നുള്ള ഡോക്ടര് പ്രതിയുടെ ആരോഗ്യ നില വിലയിരുത്തി.
എന്നാല് ഗുരുതരമായ യാതൊരു ആരോഗ്യപ്രശ്നങ്ങളും ഇയാള്ക്ക് ഇല്ലെന്ന് ഡോക്ടറുടെ റിപ്പോര്ട്ട് പുറത്തു വന്നു. ചോദ്യംചെയ്യിലിനോ തെളിവെടുപ്പിനോ യാതൊരു തടസ്സവുമില്ലെന്നും ഡോക്ടര് അറിയിച്ചു. ചോദ്യം ചെയ്യല് ഒഴിവാക്കുന്നതിനും വൈകിയ്ക്കുന്നതിനുമുള്ള തന്ത്രമാണ് ഷാരൂഖ് പയറ്റിയതെന്ന വിലയിരുത്തലിലാണ് അന്വേഷണ സംഘം.
വരാനിരിയ്ക്കുന്ന ഒരു വലിയ ഒരു ആക്രമണത്തിന് മുന്നോടിയായുള്ള പരീക്ഷണമായിരുന്നോ എലത്തൂര് ട്രെയിന് ആക്രമണം എന്ന സംശയവും അന്വേഷണസംഘം പ്രകടിപ്പിക്കുന്നു. ആക്രമണം നടത്താന് ഷാരൂക്കിന് പരിശീലനം ലഭിച്ചിട്ടില്ല എന്ന വിലയിരുത്തലും അന്വേഷണ സംഘത്തിനുണ്ട്. കാരണം വേണ്ടത്ര പരിശീലനം ലഭിച്ചിരുന്ന വ്യക്തിയാണ് ഷാരൂഖ് എങ്കില് ആക്രമണ സമയത്ത് ഇയാള്ക്ക് പൊള്ളലേല്ക്കില്ല എന്നതാണ് അന്വേഷണസംഘം ചൂണ്ടിക്കാട്ടുന്നത്.
നിര്ണായക വിവരങ്ങള് അടങ്ങിയ ബാഗ് ഷാരൂഖ് അലക്ഷ്യമായി വലിച്ചെറിഞ്ഞതും പരിശീലനത്തിന്റെ കുറവായി അന്വേഷണസംഘം ചൂണ്ടിക്കാട്ടുന്നു. ഷൊര്ണൂരില് ഇയാള്ക്ക് ലഭിച്ച പ്രാദേശിക സഹായം സംബന്ധിച്ചും അന്വേഷണം വ്യാപിപ്പിച്ചിട്ടുണ്ട്. സംസ്ഥാനത്തിന് പുറത്തേക്ക് ഉള്പ്പെടെ ഷാരൂഖിനെ തെളിവെടുപ്പിന് എത്തിക്കേണ്ടി വരും എന്നും അറിയിച്ചു.
