ന്യൂഡല്ഹി: ജമ്മുകശ്മീര് മുന് ഗവര്ണ്ണര് സത്യപാല് മാലികിന് പിന്നാലെ പുല്വാമ വിഷയത്തില് കേന്ദ്രസര്ക്കാരിനെ വിമര്ശിച്ച് രാജ്യത്തിന്റെ 18 ാം സൈനിക തലവന് ജനറല് ശങ്കര് റോയ് ചൗധരിയും. അനേകം സൈനികര്ക്ക് ജീവന് നഷ്ടമായ പുല്വാമ ആക്രമണത്തിന്റെ പ്രാഥമിക ഉത്തരവാദിത്വം പ്രധാനമന്ത്രി നേതൃത്വം നല്കുന്ന കേന്ദ്രസര്ക്കാരിന് തന്നെയാണെന്ന് അദ്ദേഹം പറഞ്ഞു.
ടെലിഗ്രാഫ് പത്രത്തിന് നല്കിയ അഭിമുഖത്തിലായിരുന്നു ഇക്കാര്യം പറഞ്ഞത്. ശ്രീനഗറില് ആക്രമണ സാധ്യത എല്ലായ്പ്പോഴും നില നില്ക്കുമ്പോള് സിആര്പിഎഫ് ജവാന്മാര് റോഡുമാര്ഗ്ഗം യാത്ര ചെയ്യരുതായിരുന്നു. പകരം യാത്രയ്ക്ക് വിമാനമാര്ഗം സ്വീകരിച്ചിരുന്നെങ്കില് പുല്വാമ കൂട്ടക്കൊല ഒഴിവാക്കാന് കഴിയുമായിരുന്നു. പ്രത്യേകിച്ചും പാകിസ്താന് അതിര്ത്തിയോട് ചേര്ന്നു കിടക്കുന്ന ഹൈവേ ഒരിക്കലും യാത്രയ്ക്കായി തെരഞ്ഞെടുക്കാന് പാടില്ലായിരുന്നു എന്ന് അദ്ദേഹം പറഞ്ഞു. 2019 ഫെബ്രുവരിയില് നടന്ന സംഭവത്തില് 40 സൈനികര്ക്കാണ് ജീവന് നഷ്ടമായത്.
സംഭവത്തില് എന്എസ്എ കുറ്റപ്പെടുത്തിയത് രഹസ്യാന്വേഷണ വിഭാഗത്തിന്റെ പരാജയമായിരുന്നു. പുല്വാമ ആക്രമണത്തിന്റെ ഉത്തരവാദിത്വം അന്ന് ജയ്ഷെ മുഹമ്മദ് തീവ്രവാദി സംഘം ഏറ്റെടുത്തിരുന്നു. ഇതിനു തിരിച്ചടിയായി പാകിസ്താനിലെ ബാലാകോട്ടില് ജയ്ഷെ മുഹമ്മദ് കേന്ദ്രങ്ങളില് വ്യോമസേന ആക്രമണം നടത്തിയിരുന്നു. ഇത് 2019 ലോക്സഭാ തെരഞ്ഞെടുപ്പിലും വലിയ ചര്ച്ചയായി മാറിയിരുന്നു. അന്ന് ബലാക്കോട്ട് ആക്രമണത്തിലെ സൈനികര്ക്കും പുല്വാമയിലെ സൈനികര്ക്കുമായി വോട്ട് ചെയ്യാനായിരുന്നു മോഡി അന്ന് കന്നിവോട്ടര്മാരോട് ആഹ്വാനം ചെയ്തത്.
കഴിഞ്ഞ ദിവസം ജമ്മുകശ്മീര് മുന് ഗവര്ണര് സത്യപാല് മാലിക്കും പുല്വാമ വിഷയത്തില് വെളിപ്പെടുത്തലുമായി രംഗത്ത് വന്നിരുന്നു. പ്രധാനമന്ത്രി നരേന്ദ്രമോദിക്കെതിരെ ആഞ്ഞടിച്ച സത്യപാല് മാലിക് പുല്വാമ ഭീകരാക്രമണത്തില് കേന്ദ്ര ആഭ്യന്തര മന്ത്രാലയത്തിന് സുരക്ഷാ വീഴ്ച സംഭവിച്ചെന്നും ഇക്കാര്യം മിണ്ടരുതെന്ന് മുന് ദേശീയ സുരക്ഷാ ഉപദേഷ്ടാവ് അജിത് ഡോവല് തന്നോട് ആവശ്യപ്പെട്ടെന്നും വെളിപ്പെടുത്തിയിരുന്നു.
'ദ വയറി'ന് നല്കിയ അഭിമുഖത്തിലാണ് മാലികിന്റെ ആരോപണങ്ങള് നടത്തിയത്. ''2500 ജവാന്മാരെ കൊണ്ടുപോകാന് സി.ആര്.പി.എഫ്. അഞ്ച് വിമാനങ്ങള് ആവശ്യപ്പെട്ടിരുന്നു. എന്നാല്, കേന്ദ്ര ആഭ്യന്തര മന്ത്രാലയം അത് നിരസിച്ചു. ഒരുപക്ഷെ വിമാനത്തിലായിരുന്നു ജവാന്മാരെ കൊണ്ടുപോയതെങ്കില് ആക്രമണം നടക്കില്ലായിരുന്നു. ഈ വീഴ്ച മറച്ചുവെക്കാന് പ്രധാനമന്ത്രി നരേന്ദ്രമോദിയും ദേശീയ സുരക്ഷാ ഉപദേഷ്ടാവ് അജിത് ദോവലും നേരിട്ട് ആവശ്യപ്പെട്ടു'' -മാലിക് പറഞ്ഞു.
പ്രധാനമന്ത്രിയുടെ കൂടെ നില്ക്കുന്നവര് അഴിമതിയിലൂടെ പണമുണ്ടാക്കുകയാണെന്നും സത്യപാല് മാലിക് അഭിമുഖത്തില് പറഞ്ഞു. ആരോപണത്തില് പ്രതികരിക്കാന് ഇതുവരെ ബി.ജെ.പി തയ്യാറായിട്ടില്ല. സത്യപാല് മാലിക്കിന്റെ വെളിപ്പെടുത്തല് രാഷ്ട്രീയ ആയുധമാക്കാണ് പ്രതിപക്ഷ പാര്ട്ടികളുടെ തീരുമാനം.
