ബിജ്നോര്: ഉത്തര്പ്രദേശിലെ നഗര തെരഞ്ഞെടുപ്പില് സീറ്റ് നിഷേധിച്ചതിനെ തുടര്ന്ന് ബിജെപി പ്രവര്ത്തകന് വിഷം കഴിച്ചു. ഞായറാഴ്ച നടന്ന സംഭവത്തില് 55 കാരനാണ് ആത്മഹത്യയ്ക്ക് ശ്രമിച്ചത്. മെയ് 4 ന് നടക്കുന്ന തെരഞ്ഞെടുപ്പില് 27 ാം വാര്ഡില് നിന്നും മത്സരിക്കാനുള്ള മുകേഷ് സക്സേന എന്നയാളുടെ മോഹമാണ് പാര്ട്ടി പുതിയ സ്ഥാനാര്ത്ഥികളെ ഇറക്കി പൊളിച്ചത്.
അംറോഹയിലെ സിറ്റി ജനറല് സെക്രട്ടറിയാണ് മുകേഷ് സക്സേന. തെരഞ്ഞെടുപ്പില് മാണ്ഡി ചൗബ് ഏരിയയില് നിന്നും മത്സരിക്കാന് മാസങ്ങള്ക്ക് മുമ്പ് തന്നെ മുകേഷ് കരുനീക്കം നടത്തിയിരുന്നു. എന്നാല് അന്തിമ സ്ഥാനാര്ത്ഥി പട്ടികയില് ഇയാളുടെ പേര് ഉണ്ടായിരുന്നില്ല. സീറ്റ് മറ്റൊരാള്ക്ക് നല്കുകയും ചെയ്തു. ഇതേ തുടര്ന്നായിരുന്നു ഇയാള് വീട്ടിലെത്തി വിഷം കഴിച്ചത്. ഉടന് തന്നെ ആുെപത്രിയില് പ്രവേശിപ്പിച്ചതിനാല് അപകടം കൂടാതെ കാര്യങ്ങള് അവസാനിച്ചു.
കഴിഞ്ഞ രണ്ടു ദശകമായി പാര്ട്ടിയുടെ ഏറ്റവും വിശ്വസ്തനായ പ്രവര്ത്തകരില് ഒരാളായിരുന്നു മുകേഷെന്നും സീറ്റിനായി ശക്തമായി മത്സരിച്ചിരുന്നയാളുമാണെന്ന് പാര്ട്ടിയുടെ ജില്ലാ ജനറല് സെക്രട്ടറി രാകേഷ് വര്മ്മ പറഞ്ഞു. എന്നാല് അവസാന നിമിഷമാണ് ഇവിടെ ഷാനി സക്സേന മത്സരിക്കുമെന്ന് പാര്ട്ടി ഔദ്യോഗികമായി പ്രഖ്യാപിച്ചത്. പാര്ട്ടിയിലേക്ക് പുതിയതായി വന്നയാളാണ് ഷാനി. ഇതിന്റെ നിരാശയിലാണ് മുകേഷ് ജീവിതം അവസാനിപ്പിക്കാന് നോക്കിയതെന്ന് പോലീസ് പറഞ്ഞു.
