ഷാംലി: യുപിയിലെ ക്രിമിനല് രാഷ്ട്രീയക്കാരന് ആതിഖിന്റെ കൊലപാതകം വലിയ ചര്ച്ചയായി മാറിയിരിക്കെ കൊലപാതകത്തിന്റെ ക്രെഡിറ്റ് ഏറ്റെടുത്ത് ബിജെപി എംഎല്എ. ഷഹരന്പൂരില് നടന്ന ഒരു പൊതുപരിപാടിയില് ബിജെപി എംഎല്എ രാജീവ് ഗംമ്പറാണ് വിവാദ പ്രസ്താവന നടത്തിയത്. 'ഞങ്ങള് അവനെ മുകളിലേക്ക് അയച്ചു' എന്നായിരുന്നു പരാമര്ശം.
പ്രസംഗത്തിന്റെ വീഡിയോ വൈറലായി മാറിയിട്ടുണ്ട്. ''ആതിഖ് അഹമ്മദിനെ ഞങ്ങളല്ലേ മുകളിലോട്ട് വിട്ടത്. അഷ്റഫ് അഹമ്മദിനെ ഞങ്ങളല്ലേ മുകളിലേക്ക് വിട്ടത്. ഇനി അടുത്ത ഊഴം ഷഹരന്പൂരിലെ ഗുണ്ടകളുടേതാണ്. അതുകൊണ്ട് ഞങ്ങളുടെ സ്ഥാനാര്ത്ഥിക്ക് നിങ്ങള് വോട്ട് ചെയ്യണം.'' വീഡിയോയില് രാജീവ് ഗമ്പര് പറയുന്നു.
പാര്ട്ടിയുടെ മേയര് സ്ഥാനത്തേക്കുള്ള സ്ഥാനാര്ത്ഥി അജയ്കുമാറിന്റെ തെരഞ്ഞെടുപ്പ് ഓഫീസ് ഉദ്ഘാടനം ചെയ്തു സംസാരിക്കുകയായിരുന്നു രാജീവ് ഗമ്പര്. യോഗി ആദിത്യനാഥ് സര്ക്കാരിന്റെ വലിയ നേട്ടമായിട്ടാണ് ആതിഖിന്റെ കൊലപാതകം രാജീവ് ഗമ്പര് എടുത്തുവെച്ചത്. വിവാദ പ്രസ്താവന ഉടന് തന്നെ സാമൂഹ്യമാധ്യമങ്ങളില് വന് വിവാദത്തിന് തിരികൊളുത്തുകയും ചെയ്തു. നിയമവിരുദ്ധ കൊലപാതകങ്ങളെ ജനപ്രതിനിധി മഹത്വവല്ക്കരിക്കുന്നു എന്നാണ് ഉയര്ന്നുവന്ന വിമര്ശനം.
പ്രതിപക്ഷവും ഇത് ഏറ്റുപിടിച്ചിട്ടുണ്ട്. സര്ക്കാര് സ്പോണ്സേഡ് കൊലപാതകം എന്നാണ് ആക്ഷേപം. എംഎല്എ സര്ക്കാരിന്റെ പ്രതിനിധിയാണെന്നും അദ്ദേഹത്തിന്റെ പ്രസ്താവന അസ്വസ്ഥമാക്കുന്ന പല ചോദ്യങ്ങളും ഉയര്ത്തിവിടുന്നുണ്ടെന്നും അദ്ദേഹം പറഞ്ഞത് അന്വേഷണ വിധേയമാക്കേണ്ട കാര്യമാണെന്നും സമാജ്വാദ് പാര്ട്ടി നേതാവും മൂന് സംസ്ഥാന മന്ത്രിയുമായ രാജ്പാല് സിംഗ് പറഞ്ഞു. വീഡിയോ പരിശോധിച്ച് കോടതി കൃത്യമായ നടപടിയെടുക്കണമെന്നും പറഞ്ഞു.
