കേരളത്തിലെ അതിദാരിദ്ര്യം തുടച്ചുനീക്കുന്നതിന്റെ ഭാഗമായി നടപ്പിലാക്കുന്ന മൈക്രോപ്ലാന് രൂപീകരണം, അവകാശം അതിവേഗം പദ്ധതിയുടെ പൂര്ത്തീകരണം എന്നിവയുടെ സംസ്ഥാനതല പ്രഖ്യാപനം നാളെ മുഖ്യമന്ത്രി പിണറായി വിജയന് പത്തനംതിട്ട ജില്ലാ സ്റ്റേഡിയത്തില് നിര്വഹിക്കും. മന്ത്രി എം.ബി.രാജേഷ് അദ്ധ്യക്ഷതവഹിക്കും.
ഭക്ഷ്യ പൊതുവിതരണ വകുപ്പ് മന്ത്രി ജി. ആര്.അനില് അതിദരിദ്രര്ക്കുള്ള റേഷന് കാര്ഡ് വിതരണവും, വനിതാ ശിശുവികസന വകുപ്പ് മന്ത്രി വീണാജോര്ജ് അതിദരിദ്രര്ക്കുള്ള ആരോഗ്യ ഉപകരണ വിതരണവും, അതിദരിദ്രര്ക്കുള്ള ഉപജീവന ഉപാധി വിതരണം ഡെപ്യൂട്ടി സ്പീക്കര് ചിറ്റയംഗോപകുമാറും നിര്വഹിക്കും. ചടങ്ങില് ആന്റോ ആന്റണി എം പി മുഖ്യ അതിഥിയാകും.
സുരക്ഷിതമായ വാസസ്ഥലം, ഭക്ഷണം, അടിസ്ഥാന വരുമാനം, ആരോഗ്യം എന്നീ ഘടകങ്ങളെ അടി സ്ഥാനമാക്കിയാണ് അവകാശം അതിവേഗം പദ്ധതി അതിദാരിദ്ര്യരെ കണ്ടെത്തുന്നതിനുള്ള മാനദണ്ഡങ്ങള് തയാറാക്കിയിട്ടുള്ളത്. ഇതുപ്രകാരം സംസ്ഥാനത്ത് 64,006 അതിദരിദ്രരെയാണ് ഇതുവരെ കണ്ടെത്തിയിരിക്കുന്നത്. ഈ പദ്ധതി പ്രകാരം ഓരോ കുടുംബത്തിന്റെയും അതിദാരിദ്ര്യാവസ്ഥ മാറ്റുന്നതിനുള്ള നടപടികള് ഉള്പ്പെടുത്തി മൈക്രോ പ്ലാനുകള് തയാറാക്കുകയും അവകാശരേഖകള് ഇല്ലാത്ത ഗുണഭോക്താക്കള്ക്ക് അത് ലഭ്യമാക്കുന്നതിനായി അവകാശം അതിവേഗം എന്ന പ്രത്യേക പദ്ധതി രൂപപ്പെടുത്തുകയും ചെയ്തു.
സംസ്ഥാനത്ത് അടുത്ത അഞ്ചുവര്ഷം കൊണ്ട് അതിദാരിദ്ര്യം ഇല്ലാതാക്കുകയെന്നത് സര്ക്കാരിന്റെ പ്രധാന ലക്ഷ്യങ്ങളിലൊന്നാണ്. ആശ്രയ പദ്ധതിയില് ഉള്പ്പെടാതെ പോയവരായ അതിദരിദ്രരെ കണ്ടെത്തി അവരെ അതില് നിന്നും മോചിപ്പിക്കുന്നതിനുള്ള സഹായവും മറ്റും മൈക്രോപ്ലാനിലൂടെ നടപ്പാക്കുകയെന്നതാണ് അതിദാരിദ്ര്യ നിര്മാര്ജന ഉപപദ്ധതിയുടെ പ്രധാനലക്ഷ്യം.
