തിരുവനന്തപുരം: സര്ക്കാര് സ്കൂള് അധ്യാപകരുടെ സമാന്തര ട്യൂഷന് തടയിടാന് പൊതുവിദ്യാഭ്യാസ വകുപ്പ്. അധ്യാപകര് സമാന്തര വിദ്യാഭ്യാസ സ്ഥാപനങ്ങളില് ക്ലാസുകളും സ്വകാര്യ ട്യൂഷനും എടുക്കുന്നില്ലെന്ന് അവരില്നിന്ന് സത്യവാങ്മൂലം വാങ്ങുന്നതിനെക്കുറിച്ച് ആലോചിച്ച് നടപടി സ്വീകരിക്കാന് പൊതുവിദ്യാഭ്യാസ ഡയറക്ടറെ മന്ത്രി വി. ശിവന്കുട്ടി ചുമതലപ്പെടുത്തി. എസ്.എസ്.എല്.സി. ഫലം ഈമാസം 20-നും ഹയര്സെക്കന്ഡറി ഫലം 25-നും പ്രസിദ്ധീകരിക്കുമെന്നും മന്ത്രി അറിയിച്ചു.
അധ്യാപകരുടെ സമാന്തര വിദ്യാഭ്യാസ സ്ഥാപനങ്ങളിലെ ക്ലാസെടുപ്പും സ്പെഷല് ട്യൂഷനും വളരെ ഗൗരവമായാണ് സര്ക്കാര് കാണുന്നതെന്നും മന്ത്രി വ്യക്തമാക്കി. ഈ നിയമവിരുദ്ധ പ്രവര്ത്തനം പൊതുവിദ്യാഭ്യാസ നിലവാരം തകരുന്നതിന് കാരണമായി മാറുന്നുണ്ട്. ഇത്തരത്തില് ക്ലാസുകള് എടുക്കുന്ന, പൊതുവിദ്യാലയങ്ങളിലെ അധ്യാപര്ക്കെതിരെ കര്ശന നടപടി സ്വീകരിക്കും.
അധ്യാപകര് ഇത്തരത്തില് ക്ലാസെടുക്കുന്നില്ല എന്ന് അവരില്നിന്ന് ഈ വര്ഷം സത്യവാങ്മൂലം വാങ്ങണോയെന്ന കാര്യം ആലോചിക്കുന്നുണ്ട്. ഇതിനാവശ്യമായ നടപടി സ്വീകരിക്കാന് പൊതുവിദ്യാഭ്യാസ ഡയറക്ടറെ ചുമതലപ്പെടുത്തിയെന്നും മന്ത്രി അറിയിച്ചു. സ്കൂള് തുറക്കലുമായി ബന്ധപ്പെട്ട് സംസ്ഥാനത്തെ പൊതുവിദ്യാഭ്യാസ വകുപ്പിലെ മുഴുവന് വിദ്യാഭ്യാസ ഓഫീസര്മാരും പങ്കെടുത്ത യോഗത്തിലാണ് മന്ത്രിയുടെ മുന്നറിയിപ്പ്.
പ്രവര്ത്തി ദിവസങ്ങളില് സ്കൂള് ഓഫീസുകള് െവെകിട്ട് അഞ്ചു മണി വരെ പ്രവര്ത്തിക്കണം. സാധ്യമായ ദിവസങ്ങളില് ശനിയാഴ്ച ഉള്പ്പെടെ പ്രിന്സിപ്പല് അല്ലെങ്കില് ചുമതലയുള്ള അധ്യാപകന്, സ്റ്റാഫുകള് എന്നിവര് ഓഫീസുകളിലുണ്ടാകണം. വര്ഷം 220 അധ്യയന ദിവസം ഉറപ്പാക്കണം. ഇതിനു വേണ്ട ക്രമീകരണം നടത്തും. എസ്.എസ്.എല്.സി. മൂല്യനിര്ണയത്തില് 2200 അധ്യാപകര് ഒരു കാരണവും കാണിക്കാതെ ഹാജരായില്ല. 1508 പേര് ഹയര് സെക്കന്ഡറിയിലും ഹാജരായില്ല. 3708 പേര്ക്കും കാരണം കാണിക്കല് നോട്ടീസ് നല്കുമെന്നും മന്ത്രി അറിയിച്ചു.ഒരു സ്കൂളിലും അധ്യാപകര് ഇല്ലാത്ത അവസ്ഥ ഉണ്ടാകരുത്.
രക്ഷകര്ത്താക്കളില്നിന്നും പൊതുസമൂഹങ്ങളില്നിന്നും സ്കൂളുകളുടെ പ്രവര്ത്തനങ്ങളുമായി ബന്ധപ്പെട്ട് ലഭിക്കുന്ന പരാതികളില് അടിയന്തര ഇടപെടല് നടത്തണം. പി.ടി.എയുടെ പ്രവര്ത്തനം സംബന്ധിച്ച പരാതികളില് അടിയന്തര പരിഹാരം കാണണമെന്നും മന്ത്രി നിര്ദേശിച്ചു.
അക്കാദിക നിലവാരം ഉയര്ത്തുന്നതിനാവശ്യമായ പദ്ധതികള് ഓരോ സ്കൂളിന്റെയും സാഹചര്യം അനുസരിച്ച് ആസൂത്രണം ചെയ്ത് നടപ്പാക്കണം. 2023 ജൂണ് ആറിനകം സ്കൂള് തല വാര്ഷിക പ്ലാന് തയാറാക്കണം. കലാ മേളകള്, കായിക മേളകള്, ശാസ്ത്രമേളകള് എന്നിവ മുന്കൂട്ടി തന്നെ ഇതിന്റെ ഭാഗമായി തീരുമാനിക്കണം. ഒന്നാം ടേം ആസൂത്രണവും ഇതോടൊപ്പം പൂര്ത്തിയാക്കണം.
എല്ലാ ആഴ്ചയും സ്കൂള് റിസോഴ്സ് ഗ്രൂപ്പ് (എസ്.ആര്.ജി.) യോഗം ചേര്ന്ന് പാഠ്യ പാഠ്യാനുബന്ധ പ്രവര്ത്തനങ്ങള് വിലയിരുത്തുകയും മിനിട്സ് രേഖപ്പെടുത്തുകയും വേണം. ഓരോ മാസവും സ്കീം ഓഫ് വര്ക്ക് കൃത്യമായി പിന്തുടരുന്നുണ്ടോ എന്ന് ഉറപ്പു വരുത്തണം. സ്കൂള് കുട്ടികളെ മറ്റ് പരിപാടികളില് സംഘടിപ്പിക്കുവാന് പാടില്ല എന്ന് സര്ക്കാര് നിര്ദേശം നല്കിയിട്ടുണ്ട്. ഇക്കാര്യം കര്ശനമായി പാലിക്കണമെന്നും മന്ത്രി നിര്ദേശിച്ചു.
