കൊച്ചി: കേരളത്തെ ഞെട്ടിച്ച ജിഷാ വധക്കേസ്, ആറ്റിങ്ങല് ഇരട്ടക്കൊലക്കേസ് എന്നിവയിലെ വധശിക്ഷ ഹൈക്കോടതി പുന:പരിശോധിക്കുന്നു. കേസിലെ അമീര് ഉള് ഇസ്ളാം, നിനോ സേവ്യര് മാത്യു എന്നിവര്ക്കാണ് ഈ കേസുകളില് വധശിക്ഷ നല്കിയത്. കേസില് മിറ്റിഗേഷന് അന്വേഷണത്തിന് ഹൈക്കോടതി ഉത്തരവിട്ടിരിക്കുകയാണ്. ഇവര് വധശിക്ഷയ്ക്ക് എതിരേ സുപ്രീംകോടതിയില് പോയിരുന്നു.
മിറ്റിഗേഷന് അന്വേഷണം നടത്താന് ജസ്റ്റിസ് അലക്സാണ്ടര് തോമസ്, ജസ്റ്റിസ് സി. ജയചന്ദ്രന് എന്നിവരടങ്ങിയ ഹൈക്കോടതി ഡിവിഷന് ബെഞ്ച് ഉത്തരവിട്ടത്. കേരളത്തില് ആദ്യമായിട്ടാണ് മിറ്റിഗേഷന് ഇന്വെസ്റ്റിഗേഷന് ഹൈക്കോടതി ഉത്തരവിടുന്നത്. കുറ്റവാളികളുടെ ജയിലിലെ സ്വഭാവത്തെക്കുറിച്ചു അന്വേഷണം നടത്തി റിപ്പോര്ട്ട് നല്കാന് ജയില് വകുപ്പിന് നിര്ദേശം നല്കിയിട്ടുണ്ട്.
കൂടാതെ ഇവരുടെ മാനസീക-ശാരീരിക നില, സാമൂഹ്യസാമ്പത്തീക സാഹചര്യങ്ങള്, നേരിട്ടിട്ടുള്ള പീഡനങ്ങള് എന്നിവയെല്ലാം ഇതിന്റെ ഭാഗമായി പരിശോധനയ്ക്ക് വിധേയമാക്കും. പ്രതികളുടെ മറ്റു പശ്ചാത്തലങ്ങള് കൂടി പരിഗണിക്കണമെന്ന സുപ്രീംകോടതി മാര്ഗ്ഗനിര്ദേശം അനുസരിച്ചാണ് നടപടി. കുറ്റകൃത്യം നടത്തുന്നതിന് മുമ്പും പിമ്പുമായുള്ള പ്രതികളുടെ സാമ്പത്തീക - സാമൂഹിക പശ്ചാത്തലങ്ങള് പ്രത്യേകം പഠനത്തിന് വിധേയമാക്കും. 2014 ലായിരുന്നു ആറ്റിങ്ങല് ഇരട്ടകൊലപാതകം നടന്നത്. 2016 ലായിരുന്നു ജിഷാവധക്കേസ് ഉണ്ടാകുന്നത്.
