തിരുവനന്തപുരം: വെള്ളായണി കാര്ഷിക കോളജിലെ വനിതാ ഹോസ്റ്റലില് ഒരേ മുറിയില് താമസിച്ചിരുന്ന സഹപാഠിക്കുനേരേ ആന്ധ്ര സ്വദേശിയായ വിദ്യാര്ഥിനി ലോഹിത(22) നടത്തിയത് അതിക്രൂരമായ പീഡനമുറകള്. ആന്ധ്ര ചിറ്റൂര് സ്വദേശിനിയായ സീലം ദീപികയ്ക്കുനേരേ ലോഹിത അഴിച്ചുവിട്ടത് കേട്ടുകേഴവി പോലുമില്ലാത്ത പീഡനങ്ങളാണെന്ന് എഫ്.ഐ.ആറില് പറയുന്നു.
ദീപികയെ കസേരയില് കെട്ടിയിട്ടശേഷം തക്കാളിക്കറി ഉണ്ടാക്കിയ പാത്രം കറിയോടെ എടുത്ത് മുഖത്ത് പൊള്ളിക്കാന് ശ്രമിച്ചെന്നും റിപ്പോര്ട്ടില് പറയുന്നു. ലോഹിത(22)യെ ജാമ്യമില്ലാത്ത വകുപ്പുകള് അനുസരിച്ചാണ് തിരുവല്ലം പോലീസ് അറസ്റ്റ് ചെയ്തത്. ഈ മാസം 18-നാണ് ക്രൂരമായ പീഡനം നടന്നത്. പൊള്ളലേറ്റ ദീപിക നാട്ടിലേക്കു മടങ്ങി ചികില്സ തേടുകയും പൊള്ളലേറ്റ ഫോട്ടോകള് കോളജിലേക്ക് അയയ്ക്കുകയും ചെയ്തതോടെയാണ് സംഭവം പുറത്തറിഞ്ഞത്.
തുടക്കത്തില് പരാതി നല്കാന് തയാറാകാത്ത ദീപിക, ബന്ധുക്കള് നിര്ബന്ധിച്ചതിനെത്തുടര്ന്നാണ് അവര്ക്കൊപ്പം കോളജിലെത്തി പരാതി നല്കിയത്. തുടര്ന്ന് കോളജ് അധികൃതര് പോലീസില് വിവരം അറിയിക്കുകയായിരുന്നു.ഹോസ്റ്റലിലെ മുറിയില്വച്ച് ദീപികയുടെ മൊെബെല്ഫോണ് പിടിച്ചു വാങ്ങിയ ലോഹിത, തലയുടെ പലഭാഗത്തും ഫോണ് മുറുക്കിപ്പിടിച്ച് ഇടിച്ചു.
ദീപികയെ ബലമായി കസേരയില് പിടിച്ചിരുത്തി െകെകള് ഷാള് ഉപയോഗിച്ച് കെട്ടിയിട്ടു. തുടര്ന്ന് തക്കാളിക്കറി ഉണ്ടാക്കിവച്ചിരുന്ന പാത്രം കറിയോടെ എടുത്ത് മുഖത്ത് വയ്ക്കാന് നോക്കി. തല വെട്ടിച്ചപ്പോള് ചൂട് കറി ശരീരത്തിന്റെ പലഭാഗത്തും വീണ് ദീപികയ്ക്ക് പൊള്ളലേറ്റു. ലോഹിത ദീപികയുടെ വലത് െകെത്തണ്ടയില് പൊള്ളലേല്പ്പിച്ചു.
കറിപ്പാത്രം വീണ്ടും ചൂടാക്കിയശേഷം കഴുത്തില് കുത്തിപ്പിടിച്ച് ദീപികയെ കുനിച്ചിരുത്തി ധരിച്ചിരുന്ന ടീ ഷര്ട്ടിന്റെ പുറകുവശം പൊക്കി മുതുകില് പൊള്ളിച്ചു. പൊള്ളലേറ്റ ഭാഗങ്ങളില് മുളക് പൊടി വിതറി.
പൊള്ളലേറ്റ ഭാഗങ്ങളില് െകെമുറുക്കി ഇടിച്ചു. കെട്ടഴിച്ചുവിട്ടപ്പോള് ഉപദ്രവിക്കരുതെന്ന് ദീപിക യാചിച്ചപ്പോള് ലോഹിത കാല്കൊണ്ട് മുഖത്തടിച്ചു. ആരോടെങ്കിലും പറഞ്ഞാല് കൊല്ലുമെന്ന് ഭീഷണിപ്പെടുത്തിയതായും എഫ്.ഐ.ആറില് പറയുന്നു.
കോളജ് അധികൃതര് നടത്തിയ അനേ്വഷണത്തെത്തുടര്ന്ന് പ്രതി ലോഹിതയെക്കൂടാതെ മലയാളി സഹപാഠി ജിന്സി, ആന്ധ്രയില്നിന്നുള്ള മറ്റൊരു സഹപാഠി നിഖില് എന്നിവരെ സസ്പെന്ഡ് ചെയ്തു. പീഡനവിവരം അറിഞ്ഞിട്ടും അക്കാര്യം അധികൃതരെ അറിയിക്കാത്തതിനാണ് മറ്റു വിദ്യാര്ഥികളെ സസ്പെന്ഡ് ചെയ്തത്.
ദീപികയുടെ മാതാവിനെ അസഭ്യം പറഞ്ഞതുമായി ബന്ധപ്പെട്ട തര്ക്കമാണ് ആക്രമണത്തിനു കാരണമെന്ന് പോലീസ് പറഞ്ഞു. കോളജിലെ അവസാനവര്ഷ ബി.എസ്സി(അഗ്രികള്ച്ചര് സയന്സ്) വിദ്യാര്ഥികളാണ് എല്ലാവരും.
