ആഗ്ര: ബാല്യകാല സുഹൃത്ത് മരണമടഞ്ഞതില് മനം നൊന്ത കൂട്ടുകാരന് അയാളുടെ ചിതയില് ചാടി മരിച്ചു. ആഗ്രയില് നടന്ന സംഭവത്തില് കൂട്ടുകാരന്റെ ചിതയില് ചാടിയ 42 കാരനെ 90 ശതമാനം പൊള്ളലേറ്റ നിലയില് ആശുപത്രിയില് പ്രവേശിപ്പിച്ചെങ്കിലും രക്ഷപ്പെടുത്താനായില്ല. കഴിഞ്ഞ ദിവസം നടന്ന സംഭവത്തില് ആനന്ദ ഗൗരവ് രജപുത്ത് എന്നയാളാണ് കൂട്ടുകാരന്റെ ചിതയില് ചാടി മരിച്ചത്.
ഇയാളുടെ കൂട്ടുകാരനായ അശോക് കുമാര് ലോധി എന്ന 44 കാരന് കഴിഞ്ഞ ദിവസം കാന്സര് വന്ന് മരണമടഞ്ഞിരുന്നു. തുടര്ന്ന് ഇയാളുടെ മൃതദേഹം യമുനാനദിയുടെ തീരത്ത് ദഹിപ്പിക്കുമ്പോള് ആനന്ദ ഗൗരവും ചിതയില് എടുത്തു ചാടുകയായിരുന്നു. ഉടന് തന്നെ ആള്ക്കാര് ഗൗരവിനെ ചിതയില് നിന്നും എടുത്തെങ്കിലൂം ശരീരത്ത് 90 ശതമാനം പൊള്ളലേറ്റ നിലയിലാണ് ആശുപത്രിയില് എത്തിച്ചത്.
ഫിറോസാബാദിലെ നാഗ്ലാ ഖാംഗര് ഗ്രാമവാസിയാണ് അശോക് കുമാര്. തൊട്ടടുത്ത പ്രദേശമായ ഗഡിയ പഞ്ചവടി ഗ്രാമത്തില് നിന്നുള്ളയാളാണ് ഗൗരവ്. മൃതദേഹം ചിതയില് വെച്ച ശേഷം ആള്ക്കാര് പതിയെ പരിഞ്ഞു തുടങ്ങുമ്പോള് കൂട്ടുകാരാ ഞാനും വരുന്നെന്ന് പറഞ്ഞുകൊണ്ട് ഗൗരവ് അശോകിന്റെ ചിതയിലേക്ക് ചാടി. എന്നാല് ഉടന് തന്നെ ആള്ക്കാര് ഇയാളെ വലിച്ചു പുറത്തിട്ടെങ്കിലും അപ്പോഴേയ്ക്ക് നല്ലരീതിയില് പൊള്ളലേറ്റു. ഉടന് ജില്ലാ ആശുപത്രിയിലേക്കും പിന്നെ എസ്.എന്. മെഡിക്കല് കോളേജിലേക്കും മാറ്റി.
ചെറുപ്പം മുതല് പിരിയാത്ത സുഹൃത്തുക്കളായിരുന്നു അശോകും ഗൗരവും. രണ്ടുപേരും ഒരേ സ്കൂളിലാണ് പഠിച്ചതും. ഇരുവരും വിവാഹം കഴിച്ചതും ഒരേ ദിവസമായിരുന്നു. സംഗീതകാരന്മാരായ ഇരുവരും ഒരുമിച്ചാണ് പരിപാടികള് ചെയ്തിരുന്നതും. അശോക് കുമാര് ധോലക് വാദനത്തില് മിടുക്കനായിരുന്നു. ഇതിനൊപ്പം ഗൗരവ് സിംബല് വായിക്കും. ഇരുവരുടേയും സൗഹൃദം നാട്ടിലും പാട്ടായിരുന്നു.
രണ്ടുപേരും മറ്റുള്ളവരോട് ബഹുമാനവും സ്നേഹവുമുള്ളവരും ഭക്തിയുള്ളവരുമായിരുന്നെന്ന് ഗ്രാമത്തലവവനും പറയുന്നു. രണ്ടുവര്ഷം മുമ്പാണ് ലോധിയ്ക്ക് കാന്സറാണെന്ന വിവരം അറിഞ്ഞത്. അഞ്ചു പെണ്കുട്ടികളുടെ പിതാവായിട്ടും ഗൗരവ് സുഹൃത്തിനെ മരുന്നിനും മറ്റുമായി സഹായിച്ചിരുന്നു. ബാല്യകാലം മുതല് ഒരുമിച്ച് വളര്ന്നതിനാല് ലോധി മരിച്ചത് ഗൗരവിന് വലിയ ദു:ഖമുണ്ടാക്കിയ കാര്യമായിരുന്നു.
