ഇറ്റാലിയന് ക്ലബ്ബ് എ.എസ്. റോമയെ പെനാല്റ്റി ഷൂട്ടൗട്ടില് കീഴടക്കി സ്പാനിഷ് ക്ലബ്ബ് സെവിയ്യ യൂറോപ്പാ ലീഗ് കിരീടം ചൂടി. ഏഴാം തവണ സെവിയ ഈ കിരീടം നേടി സെവിയ്യ റെക്കോഡ്നേട്ടം കയ്യാളിയപ്പോള് തനിക്ക് കിട്ടിയ സില്വര് മെഡല് റോമയുടെ പരിശീലകന് ജോസ് മൊറീഞ്ഞോ കാണികള്ക്കിടയിലേക്ക് വലിച്ചെറിഞ്ഞു. സാധാരണസമയത്ത് ഇരുടീമും ഓരോ ഗോള് നേടി സമനില പാലിച്ചിരുന്നു.
കളിയുടെ തുടക്കത്തില് തന്നെ അര്ജന്റീനാതാരം പൗളോ ഡിബാലയിലൂടെ റോമ മുന്നിലെത്തയതാണ്. എന്നാല് റോമയുടെ ഗിയാന് ലൂക്ക മന്സീനിയുടെ അബദ്ധം എതിരാളികള്ക്ക് സമനില നല്കി. സെവിയ്യയുടെ മൊറാക്കാന് ഗോളി ബോണുവിന്റെ അതിഗംഭീരമായ പ്രകടനവും ടീമിന്റെ വിജയത്തില് നിര്ണ്ണായകമായി. ഷൂട്ടൗട്ടില് മാന്സീനിയുടെ കിക്ക് ബോണു തടഞ്ഞപ്പോള് ഇബാനസിന്റെ കിട്ട് പോസ്റ്റില് തട്ടിത്തെറിച്ചു. സെവിയയുടെ അവസാന കിക്ക് എടുക്കാന് വന്ന അര്ജന്റീനയുടെ ലോകകപ്പ് ജേതാവ് ഗോണ്സാലോ മോണ്ടിയേലിന് പിഴച്ചില്ല.
യൂറോപ്പാലീഗില് നാലാം കിരീടമാണ് സെവിയ്യ കുറിച്ചത്. മൂന്ന് യുവേഫാ കപ്പ് കൂടി ചേരുമ്പോള് ഏഴാം കിരീടമാണ് അവരുടേത്. ഈ നേട്ടത്തിലും സെവിയ റെക്കോഡിട്ടു. നേരത്തേ ഇന്റര്മലാന്, യുവന്റസ്, ലിവര്പൂള്, അത്ലറ്റിക്കോ മാഡ്രിഡ് എന്നിങ്ങനെ മൂന്ന് യുറോപ്പാലീഗ് കിരീടം നേടിയവര്ക്കൊപ്പമായിരുന്നു സെവിയ ഈ ഫൈനല് കളിക്കുന്നതിന് മുമ്പ്.
അതേസമയം യൂറോപ്പിലെ പ്രധാനപ്പെട്ട ആറാമത്തെ കിരീടമെന്ന റെക്കോഡ് പോര്ച്ചുഗീസുകാരനായ റോമയുടെ പരിശീലകന് മൊറീഞ്ഞോയ്ക്ക് നഷ്ടമായി. നിലവില് അഞ്ചു കിരീടങ്ങളുമായി ഇറ്റാലിയന് ഇതിഹാസ പരിശീലകന് ജിയോവാന്നി ട്രപ്പട്ടോണിയ്ക്ക് ഒപ്പമാണ്. തനിക്ക് കിട്ടിയ റണ്ണേഴ്സിന്റെ വെള്ളിമെഡല് താരം കാണികള്ക്കിടയിലെ ഒരു കുട്ടിയ്ക്ക് എറിഞ്ഞു കൊടുക്കുകയും ചെയ്തു. വെള്ളിമെഡല് തനിക്ക് വേണ്ടെന്നും അത് സൂക്ഷിക്കാന് ഇഷ്ടപ്പെടുന്നില്ലെന്നും ആയിരുന്നു സ്വന്തം പ്രവര്ത്തിയില് മൊറീഞ്ഞോയുടെ മറുപടി.
ഇരുടീമും കയ്യും മെയ്യും മറന്ന് പോരാടിയ മത്സരത്തില് ഫൗളുകള്ക്കും മഞ്ഞക്കാര്ഡുകള്ക്കും പഞ്ഞമില്ലായിരുന്നു. ഇംഗ്ളീഷ് റഫറി ആന്റണി ടെയ്ലര് 13 കളിക്കാര്ക്കാണ് മഞ്ഞക്കാര്ഡ് കാട്ടിയത്. റോമയുടെ ഏഴു പേര് മഞ്ഞക്കാര്ഡ് കണ്ടതോടെ അതും ഒരു റെക്കോഡായി. ഒരു ഫൈനലില് ഒരു ടീമിന്റെ ഏറ്റവും കൂടുതല് കളിക്കാര് മഞ്ഞക്കാര്ഡ് കണ്ടതിന്റെ റെക്കോഡ് റോമ പേരിലാക്കി. കളിക്കാരും ബഞ്ചിലിരുന്നവരും തമ്മില് ഏറ്റുമുട്ടി പല തവണ കളി തടസ്സപ്പെട്ടു. മഞ്ഞക്കാര്ഡ് കണ്ടവരില് മൂന്ന് പേര് ബഞ്ചിലുള്ളവരായിരുന്നു.
