കോട്ടയ്ക്കല്‍: നിര്‍ത്തിയിട്ട കാര്‍ നിയന്ത്രണം വിട്ടു പിന്നോട്ടുരുണ്ട് റോഡിന്റെ നടുക്ക് കൂടി വേഗത്തില്‍ ഓടിയപ്പോള്‍ രക്ഷകനായത് ബൈക്ക് യാത്രക്കാരന്‍. കോട്ടയ്ക്കല്‍ ടൗണില്‍ നടന്ന സംഭവത്തില്‍ ബൈക്കിലെത്തി പി. സുധീഷ് സാഹസീകമായി കാറിന്റെ ഡോര്‍ തുറന്ന് കയറി വണ്ടി നിര്‍ത്തുകയായിരുന്നു. സംഭവത്തിന്റെ സിസിടിവി ദൃശ്യങ്ങള്‍ പുറത്തുവന്നിട്ടുണ്ട്.
കാറില്‍ മറ്റു യാത്രക്കാരെ ഇരുത്തി ഡ്രൈവര്‍ നിര്‍ത്തി ഹാന്‍ഡ്‌ബ്രേക്കിട്ടിട്ട് പോയ വണ്ടിയാണ് പിന്നോട്ട് ഉരുണ്ടത്. തിരക്ക് പിടിച്ച റോഡില്‍ വലിയ അപകടമായിരുന്നു ഒഴിവായിപ്പോയത്. തിങ്കളാഴ്ചയായിരുന്നു സംഭവം. തൊട്ടടുത്ത ബാങ്കില്‍ പോകുന്നതിനായി കാര്‍ എഞ്ചിന്‍ ഓഫാക്കാതെ ഹാന്‍ഡ്‌ബ്രേക്കിട്ടിട്ട് ഡ്രൈവര്‍ പോകുകയായിരുന്നു. എന്നാല്‍ ഹാന്‍ഡ്‌ബ്രേക്ക് എങ്ങിനെയോ റിലീസായി വാഹനം പിന്നോട്ട് ഉരുണ്ടു പോകുകയായിരുന്നു.
കാര്‍ ഉരുണ്ട് റോഡിന് കുറുകേ ഓടി മറുവശത്ത് എത്തിയപ്പോഴാണ് ബൈക്കില്‍ സുധീഷ് എത്തിയത്. ഉടന്‍ തന്നെ അദ്ദേഹം വഴിയില്‍ തന്നെ ബൈക്ക് നിര്‍ത്തിയ ശേഷം ഹെല്‍മറ്റും പെട്ടെന്ന് ഊരി വഴിയില്‍ ഇട്ടശേഷം കാറിന്റെ ഡോര്‍ തുറന്ന് അകത്തു കയറി ഹാന്‍ഡ്‌ബ്രേക്ക് ഇടുകയായിരുന്നു. കാര്‍ പിന്നോട്ട് ഉരുളുമ്പോള്‍ കാറില്‍ സ്ത്രീകളും കുട്ടികളും ഉണ്ടായിരുന്നു. കാര്‍ പിന്നോട്ട് നീങ്ങാന്‍ തുടങ്ങിയതോടെ ഇവര്‍ നിലവിളിക്കുകയും ചെയ്തു.
Comments