കണ്ണൂര്: വ്യാജരേഖയുണ്ടാക്കി ഗസ്റ്റ് ലക്ചററായി ജോലി ചെയ്ത മുന് എസ്.എഫ്.ഐ. നേതാവ് കെ. വിദ്യയെ ഫേസ് ബുക്കില് പരിഹസിച്ച് അഖിലേന്ത്യാ ജനാധിപത്യ മഹിളാ അസോസിയേഷന് സംസ്ഥാന സെക്രട്ടറിയും സി.പി.എം. കേന്ദ്ര കമ്മിറ്റി അംഗവുമായ പികെ.ശ്രീമതി.
''എന്നാലും എന്റെ വിദ്യേ'' എന്നു മാത്രമാണ് ശ്രീമതി ഫേസ് ബുക്കില് കുറിച്ചതെങ്കിലും അതു കുറിക്കു കൊള്ളുന്നതായിരുന്നു. പോസ്റ്റ് ചെയ്ത് ഒരു മണിക്കൂറിനുള്ളില് മൂവായിരത്തോളം പേര് ലൈക്ക് ചെയ്യുകയും എണ്ണൂറിലേറെ കമന്റുകള് വരുകയും ചെയ്തു. മഹിളാ അസോസിയേഷന്റെ വേദിയില് വിദ്യക്ക് ശ്രീമതി പുരസ്കാരം നല്കുന്ന ഫോട്ടോയും ചിലര് കമന്റായി രേഖപ്പെടുത്തി.
എങ്കിലും എന്റെ വിദ്യേ പരാമര്ശത്തില് ഉറച്ചു നില്ക്കുന്നതായും പി.കെ. ശ്രീമതി പ്രതികരിച്ചു. ആലപ്പുഴ മഹിളാ അസോസിയേഷന് സമ്മേളനത്തില് സാഹിത്യ മത്സരത്തില് ഒന്നാം സ്ഥാനം കിട്ടിയ കുട്ടി ഉന്നത വിജയം നേടണം എന്ന് ആഗ്രഹിച്ചിരുന്നു. ആ കുട്ടി ഇങ്ങനെ ചെയ്തു എന്ന് കേട്ടപ്പോള് മനസ്സിന്റെ ഉള്ളില് നിന്നും വന്ന ആദ്യ പ്രതികരണം അങ്ങിനെയായിരുന്നു എന്നും അതാണ് സോഷ്യല് മീഡിയയില് ഇട്ടതെന്നും പറഞ്ഞു.
എന്നാലും എന്റെ വിദ്യേ നീ ഇത്തരത്തിലുള്ള കുടുക്കില് പെട്ടല്ലോ എന്നാണ് ഉദ്ദേശിച്ചത്. വ്യാജ രേഖ ആര് ഉണ്ടാക്കിയാലും തെറ്റാണെന്നും ശ്രീമതി ടീച്ചര് പറഞ്ഞു. വിശ്വസിക്കാന് കഴിയുന്നില്ലെങ്കിലും എന്റെ വിദ്യേ എന്നത് മനസ്സില് നിന്നുണ്ടായ പ്രതികരണമാണ്. അതില് തന്നെയാണ് ഇപ്പോഴും നില്ക്കുന്നതെന്നും ശ്രീമതി ടീച്ചര് പറഞ്ഞു.
