ബീജിംഗ് : ജനസംഖ്യാവര്ദ്ധനവ് പിടിച്ചുനിര്ത്താന് ചൈന കൊണ്ടുവന്ന പദ്ധതികളെല്ലാം ഇപ്പോള് അവര്ക്ക് തിരിച്ചടിയായി മാറുന്നു. ജനസംഖ്യ യിലും ജനനനിരക്കിലും വന് ഇടിവ് വന്നതിനെ തുടര്ന്ന് വിവാഹവും കുടുംബജീവിതവും പ്രോത്സാഹിപ്പിക്കാനുള്ള നടപടിയിലാണ് ചൈന.
ചൈനയിലെ വിവാഹങ്ങള് ചരിത്രത്തിലെ ഏറ്റവും താഴ്ന്ന നിലയിലേക്ക് വീണിരിക്കുകയാണ്. സിവില് അഫയേഴ്സ് മന്ത്രാലയത്തിന്റെ ജൂണ് 11 വരെയുള്ള കണക്കുകള് പ്രകാരം 2022 ല് വിവാഹ രജിസ്ട്രേഷന് പൂര്ത്തിയാക്കിയത് വെറും 6.83 ദശലക്ഷം ദമ്പതികള് മാത്രമാണ്. ഇതാകട്ടെ മുന് വര്ഷത്തേക്കാള് 800,000 കുറവാണ്. കഴിഞ്ഞ വര്ഷത്തെ വിവാഹങ്ങളുടെ എണ്ണം 2013-ലെ ഏറ്റവും ഉയര്ന്ന 13.47 ദശലക്ഷത്തിന്റെ പകുതിയോളം ആയിരുന്നുവെന്നാണ് റിപ്പോര്ട്ടുകള്.
വിവാഹങ്ങളിലെ കുറവിന് പുറമേ കഴിഞ്ഞവര്ം കോവിഡ് നിയന്ത്രണങ്ങളെ തുടര്ന്ന് ദശലക്ഷ കണക്കിന് ആള്ക്കാര് വീടിനുള്ളില് നിന്നും പുറത്തിറങ്ങാതെ കഴിഞ്ഞതും ജനനനിരക്ക് കുറയാനും ജനസംഖ്യയില് ഇടിവ് വരാനും കാരണമായതായി അധികൃതര് പറയുന്നു. കഴിഞ്ഞ കാലങ്ങളില് ജനസംഖ്യ കുറയ്ക്കാന് യുവതീയുവാക്കളുടെ വിവാഹപ്രായത്തില് മാറ്റം വരുത്തിയത് തിരിച്ചടിയായി. ഇതിനൊപ്പം യുവതികള് സ്വന്തംകാലില് നില്ക്കാന് കുടുതല് വിദ്യാഭ്യാസമുള്ളവരും സാമ്പത്തീക സ്വാതന്ത്ര്യമുള്ളവരായി മാറിയതും വിവാഹവും കുടുംബവും കുറയാന് കാരണമായതായി അന്താരാഷ്ട്ര മാധ്യമങ്ങളും ചൂണ്ടിക്കാട്ടുന്നു.
ഇക്കാര്യം പരിഹരിക്കാന് കഴിഞ്ഞമാസം ചൈനീസ് സര്ക്കാര് 20 നഗരങ്ങളില് പുതിയ പദ്ധതി അവതരിപ്പിച്ചു. പുതിയ കാലത്തിന് അനുസരിച്ചുള്ള വിവാഹം, കുട്ടികളെ പ്രോത്സാഹിപ്പിക്കുന്ന സംസ്ക്കാരം, കുട്ടികളെ വഹിക്കുന്നതിനുള്ള സൗഹൃദ സാഹചര്യം സൃഷ്ടിക്കല്. വിവാഹജീവിതവും കുട്ടികള് ഉണ്ടാകലിനെയും മാതാപിതാക്കളാകുന്നതിനെയും പ്രോത്സാഹിപ്പിക്കല്, കുട്ടികളെ വളര്ത്തുന്നതുമായി ബന്ധപ്പെട്ട ഉത്തരവാദിത്വ ബോധനം, ജീവിത സാഹചര്യത്തിലെ ചെലവ് കുറയ്ക്കല്, ആചാരങ്ങളെ പ്രോത്സാഹിപ്പിക്കല് എന്നിവയെല്ലാം അവതരിപ്പിച്ചിരുന്നു. പെയ്ഡ് മാര്യേജ് ലീവുകളും ചില പ്രവിശ്യകള് പുതിയതായി വിവാഹിതരായ ദമ്പതികള്ക്ക് നല്കുന്നുണ്ട്.
ആറു ദശകങ്ങള്ക്കിടയില് കഴിഞ്ഞ വര്ഷം ആദ്യമായി ചൈനയിലെ ജനസംഖ്യ താഴ്ന്നിരുന്നു. എന്നാല് ദീര്ഘകാലത്തേക്കുള്ള ഈ ജനസംഖ്യാ നിയന്ത്രണം ചൈനയുടെ സാമ്പത്തീക സ്ഥിതിയെ രൂക്ഷമായി ബാധിക്കുമോ എന്ന ആശങ്ക ഉയര്ന്നിരിക്കുകയാണ്. രാജ്യത്തെ ജനനനിരക്ക് 1000 പേര്ക്ക് 6.77 എന്നതാണ് കഴിഞ്ഞ വര്ഷം രേഖപ്പെടുത്തിയത്. 2021ല് 1000 ന് 7.52 ആയിരുന്നു ജനനനിരക്ക്. സമ്പന്നരാകുമ്പോള് ചൈനയ്ക്ക് പ്രായം കൂടുമെന്നാണ് വിദഗ്ദ്ധര് നല്കുന്ന മുന്നറിയിപ്പ്. തൊഴില് ശക്തി കുറയുകയും വൃദ്ധരുടെ ക്ഷേമത്തിനായി പ്രാദേശിക സര്ക്കാരുകള്ക്ക് കൂടുതല് പണം ചെലവഴിക്കേണ്ടി വരികയും ചെയ്യുന്ന സാഹചര്യത്തില് പ്രാദേശിക സര്ക്കാരുകള് കടക്കെണിയിലേക്ക് പോകുന്ന സ്ഥിതിയുണ്ടാകുമെന്നാണ് വിലയിരുത്തുന്നത്.
