കൊച്ചി: വ്യാജരേഖാക്കേസില് പ്രതി കെ. വിദ്യയുടെ മുന്കൂര്ജാമ്യഹര്ജി ഹൈക്കോടതി ഇന്നു പരിഗണിച്ചേക്കും. ഒരാഴ്ച പിന്നിട്ടിട്ടും ഒളിവില്ക്കഴിയുന്ന വിദ്യയെ കണ്ടെത്താന് പോലീസിനായിട്ടില്ല. അവര് എറണാകുളത്തു തന്നെയുണ്ടെന്നാണു പോലീസിനു ലഭിച്ച വിവരം. ഒളിവിലിരുന്നു വിദ്യ അഭിഭാഷകരെയും സുഹൃത്തുക്കളെയുമൊക്കെ നിരന്തരം ബന്ധപ്പെടുമ്പോഴാണു പോലീസിന്റെ ഒന്നുമറിയില്ലാവാദം.
മുന്കൂര്ജാമ്യഹര്ജിയില് കോടതിയുടെ തീരുമാനമറിഞ്ഞശേഷം അറസ്റ്റ് ഉള്പ്പെടെയുള്ള നടപടിയിലേക്കു കടക്കാനാണു പോലീസ് നീക്കം. അന്വേഷണവുമായി പൂര്ണമായും സഹകരിക്കാമെന്നു മുന്കൂര്ജാമ്യഹര്ജിയില് വിദ്യ പറയുന്നു. വ്യാജരേഖ ഉപയോഗിച്ച് തട്ടിപ്പ് നടന്നിട്ടില്ലാത്തതിനാല് ജാമ്യമില്ലാക്കുറ്റമായ ഐ.പി.സി. 468-ാം വകുപ്പ് നിലനില്ക്കില്ലെന്നാണു ഹര്ജിയിലെ പ്രധാനവാദം.
മറ്റ് വകുപ്പുകളായ വ്യാജരേഖ ചമയ്ക്കല് (465), വ്യാജരേഖ ഉപയോഗിച്ച് വഞ്ചനയ്ക്കു ശ്രമിക്കല് (471) എന്നിവ ജാമ്യം ലഭിക്കുന്ന കുറ്റങ്ങളാണെന്നും മുതിര്ന്ന അഭിഭാഷകന് പി. വിജയഭാനു മുഖേന ഫയല് ചെയ്ത ഹര്ജിയില് ചൂണ്ടിക്കാട്ടുന്നു. 27 വയസ് മാത്രമുള്ള അവിവാഹിതയായ തന്നെ അറസ്റ്റ് ചെയ്തു ജയിലിലാക്കുന്നതു നീതിനിഷേധമാണെന്നും കേസ് രാഷ്ട്രീയപ്രേരിതമാണെന്നും ഹര്ജിയില് വിദ്യ ആരോപിക്കുന്നു.
