ടെസ്റ്റ് ബൗളര്മാരുടെ റാങ്കിംഗില് നമ്പര് വണ്ണായിട്ടും ടെസ്റ്റ് ലോകചാംപ്യന്ഷിപ്പ് ഫൈനലിനുള്ള ടീമില് നിന്നും ആര് അശ്വിനെ ഒഴിവാക്കിയത് ആരാധകരുടെ കണ്ണു തള്ളിച്ചിരുന്നു. ഇന്ത്യ ഈ മത്സരത്തില് ഓസ്ട്രേലിയയോട് പടുകൂറ്റന് തോല്വിയാണ് നേരിട്ടത്. 209 റണ്സിന് തോറ്റ് കപ്പ് കൈവിട്ട ഇന്ത്യന് ടീം അശ്വിനെ ഉള്പ്പെടുത്താതിരുന്നതിലൂടെ വലിയ ചര്ച്ചയ്ക്കാണ് ഇട നല്കിയിരിക്കുന്നത്.
നാലു സീമര്മാരെ കളിപ്പിക്കാന് തീരുമാനിച്ച ഇന്ത്യന് ടീം ടീമില് ഏക സ്പിന്നറായി ഉള്പ്പെടുത്തിയതാകട്ടെ രവീന്ദ്ര ജഡേജയെയും. തന്നെ ടീമില് നിന്നും ഒഴിവാക്കാനുള്ള തീരുമാനം കളിയുടെ രണ്ടു ദിവസം മുമ്പ് മാത്രമായിരുന്നു അറിഞ്ഞതെന്നും അത് തന്നെ ഞെട്ടിച്ചെന്നും താരം ഇന്ത്യന് എക്സ്പ്രസിന് നല്കിയ അഭിമുഖത്തില് പറഞ്ഞു. അതേസമയം താന് ഇന്ത്യയുടെ നിര്ണ്ണായക മത്സരത്തിന് മുമ്പ് ഒഴിവാക്കപ്പെടുന്നത് ഇതാദ്യമല്ലെന്നും പറഞ്ഞു. 2021/22 ല് ഇന്ത്യയുടെ ഇംഗ്ളീഷ് ടൂറില് അഞ്ചു മത്സരങ്ങളുടെ പരമ്പരയില് അശ്വിന് ടീമില് ഉള്പ്പെട്ടിരുന്നില്ല.
ലോക ടെസ്റ്റ് ചാംപ്യന്ഷിപ്പിന്റെ ആദ്യ സീസണിലെ ഫൈനലില് ന്യൂസിലന്റിനെതിരേ കളിച്ചതാണ് താന് അവസാനമായി ഇംഗ്ളണ്ടില് കളിച്ച കളിയെന്നും താരം പറഞ്ഞു. രണ്ട് ഇന്നിംഗ്സുകളിലായി 45 ന് നാലു വിക്കറ്റ് വീഴ്ത്തുകയും ചെയ്തിരുന്നു. ഇന്ത്യയെ ഫൈനല് വരെ എത്തിക്കാന് കഴിഞ്ഞ കാര്യത്തില് ഏതെങ്കിലും തരത്തില് സംഭാവന നല്കാന് തനിക്ക് ഇഷ്ടമായിരുന്നുവെന്നും അശ്വിന് കൂട്ടിച്ചേര്ത്തു.
കഴിഞ്ഞ നാലഞ്ചു വര്ഷം മുതല്, തന്റെ രാജ്യത്തിനായി ഗെയിമുകള് വിജയിപ്പിക്കാന് കഴിഞ്ഞതിനാല് വിദേശത്തെ ബൗളിംഗ് നന്നായി മെച്ചപ്പെട്ടതായും അദ്ദേഹം പറഞ്ഞു. 2018-19 മുതല്, തന്റെ വിദേശമണ്ണിലെ ബൗളിംഗ് അതിശയകരമാണെന്ന് പ്രതികരിച്ച അശ്വിന് അവസാന ഫൈനലില് പോലും ഞാന് നാല് വിക്കറ്റ് നേടി, നന്നായി ബൗള് ചെയ്തതായും പറഞ്ഞു.
