തിരുവനന്തപുരം: അനില് കാന്തിനു പകരം പുതിയ സംസ്ഥാന പോലീസ് മേധാവിയെ നിശ്ചയിക്കാനുള്ള അന്തിമ പട്ടികയില് ജയില് മേധാവി കെ. പത്മകുമാര്, ഫയര്ഫോഴ്സ് തലവന് ഷേഖ് ദര്വേഷ് സാഹിബ്, ഹരിനാഥ് മിശ്ര ( കേന്ദ്ര ഡെപ്യൂട്ടേഷന്) എന്നിവര് ഉള്പ്പെടുമെന്നാണു സൂചന.
ഇന്ന് വൈകിട്ട് 4ന് ഡല്ഹിയില് യു.പി.എസ്.സി. ചെയര്മാന്റെ അധ്യക്ഷയില് യോഗം ചേരും. യോഗത്തിന്റെ അവസാന നിമിഷം അപ്രതീക്ഷിത മാറ്റങ്ങള് സംഭവിച്ചാല് കേന്ദ്ര ഡെപ്യൂട്ടേഷനില് പ്രവര്ത്തിക്കുന്ന രവഡാ എ. ചന്ദ്രശേഖറിന്റെ പേര് കൂടി പട്ടികയില് ഉള്പ്പെടുത്തും. അതാകട്ടെ ഹരിനാഥ് മിശ്ര മടങ്ങി വരാന് തയാറാല്ലെങ്കില് മാത്രം. ഹരിനാഥ് മിശ്രയെ കേന്ദ്ര ഡി.ജി.പി: റാങ്കിനു തുല്യമായ സെക്രട്ടറി പാനലില് ഉള്പ്പെടുത്തിയിട്ടുണ്ട്. കേന്ദ്ര സേനയുടെ തലപ്പത്ത് ഏത് സമയത്തും അദ്ദേഹം അവരോധിക്കപ്പെടാം.
സംസ്ഥാന പോലീസ് മേധാവിയായി ജയില് മേധാവി കെ. പത്മകുമാര് നിയമിക്കപ്പെടുമെന്നാണു സൂചന. സര്ക്കാര് നല്കിയ എട്ടുപേരുടെ പട്ടികയില്നിന്ന് നിഥിന് അഗര്വാള് ബി.എസ്.എഫ്. ഡയറക്ടറായി നിയമിതനായതോടെ പത്മകുമാര് പട്ടികയില് ആദ്യത്തെ പേരുകാരനായി മാറി. ഈ മാസം 30 ന് ഡി.ജി.പി: അനില്കാന്ത് വിരമിക്കും. അദ്ദേഹത്തെ സി.എ.ടിയില് അംഗമാക്കും. ചീഫ് സെക്രട്ടറി വി.പി. ജോയിയും ഈ മാസം 30ന് വിരമിക്കും. ഇന്നു ചേരുന്ന ഉന്നതതല യോഗത്തിന്റെ മുന്നിലുള്ള എട്ട് ഐ.പി.എസുകാരുടെ പട്ടികയില്നിന്നു മൂന്നു പേരെ ഉന്നതസമിതി സംസ്ഥാന സര്ക്കാരിനോട് നിര്ദേശിക്കും. ഇതില്നിന്നും ഒരാളെ സംസ്ഥാന മന്ത്രിസഭാ യോഗം ചേര്ന്ന് തീരുമാനിക്കും.
അതേ സമയം ജയില്മേധാവി കെ. പത്കുമാര്, ഫയര്ഫോഴ്സ് മേധാവി ഷെയ്ക്ക് ദര്വേസ് സാഹിബ് എന്നിവര്ക്ക് തുല്യസാധ്യതയാണ് ഉള്ളതെന്ന വിലയിരുത്തലും ശക്തമാണ്. രണ്ടുപേര്ക്കും രണ്ടു വര്ഷം സര്വീസ് ബാക്കിയുണ്ട്. യു.പി.എസ്.സി. ചെയര്മാന്, കേന്ദ്രസര്ക്കാര് പ്രതിനിധി, ഐ.ബി. ജോയിന്റ് ഡയറക്ടര്, ചീഫ് സെക്രട്ടറി, ഇപ്പോഴത്തെ ഡി.ജി.പി. എന്നിവടങ്ങുന്ന സമിതിയാണ് പുതിയ പാനല് തയാറാക്കുക.
ചീഫ് സെക്രട്ടറി വി.പി ജോയ് സ്ഥാനമൊഴിയുമ്പോള് ആഭ്യന്തര സെക്രട്ടറി ഡോ. വേണു ചീഫ് സെക്രട്ടറിയാകും. പൊതുഭരണ സെക്രട്ടറി കെ.ആര്. ജ്യോതിലാല് ആഭ്യന്തര സെക്രട്ടറിയായേക്കും. ചീഫ് സെക്രട്ടറി വി.പി. ജോയിയെ പൊതുമേഖല സ്ഥാപനങ്ങളുടെ റിക്രൂട്ടെ്മന്റ് ബോര്ഡ് ചെയര്മാനായി നിയമിക്കും. ഒരു വനിതയെ താക്കോല് സ്ഥാനത്ത് നിയമിക്കുന്ന കാര്യവും സര്ക്കാര് പരിഗണിക്കുന്നു.
