തിരുവല്ല: കുടുംബകോടതിയിലെ കേസ് വിസ്താരത്തിനിടെ പ്രകോപിതനായ വ്യക്തി ജഡ്ജിയുടെ ഔദ്യോഗിക വാഹനം തല്ലിത്തകര്ത്തു. കുടുംബകോടതി ജഡ്ജി ജി.ആര്. ബില്കുലിന്റെ കാറാണ് തകര്ത്തത്.
സംഭവത്തില് ബംഗളൂരു ശിവഗിരിനഗറില് അതുല്യസാഗറില് താമസിക്കുന്ന മലപ്പുറം തേഞ്ഞിപ്പലം കടയ്ക്കാട്ടുപാറ അമൃത്സാഗറില് ഇ.പി. ജയപ്രകാശി(55)നെ പോലീസ് കസ്റ്റഡിയില് എടുത്തു. ഇന്നലെ വൈകിട്ട് നാലരയോടെയാണു സംഭവം.
ഭാര്യയുമായുള്ള വിവാഹമോചനക്കേസ് കാലങ്ങളായി നീട്ടിവയ്ക്കുന്നതാണു പ്രകോപനത്തിന് കാരണമായതെന്നാണ് പോലീസില് നല്കിയ മൊഴി. നീതി ലഭിച്ചില്ലെന്നു പറഞ്ഞ് വിസ്താരത്തിനിടെ പല തവണ ഇയാള് പ്രകോപിതനായിരുന്നു.
തുടര്ന്ന്, പുറത്തിറങ്ങി മണ്വെട്ടി വാങ്ങിക്കൊണ്ടുവന്ന് ജഡ്ജിയുടെ കാറിന്റെ ചില്ലുകള് അടിച്ചു തകര്ത്തു. നിരവധി തവണ കാറിന്റെ പിന്ഭാഗത്തും വശങ്ങളിലും വെട്ടി. പത്തനംതിട്ട കുടുംബകോടതിയിലായിരുന്നു കേസ് നടത്തിക്കൊണ്ടിരുന്നത്.
ഫെബ്രുവരിയില് ഹൈക്കോടതിയില്നിന്നും പ്രത്യേകാനുമതി വാങ്ങിയാണ് തിരുവല്ല കുടുംബകോടതിയിലേക്കു കേസ് മാറ്റിയത്. മുന് മര്ച്ചന്റ് നേവി ഉദ്യോഗസ്ഥനായ ജയപ്രകാശ് സ്വന്തമായാണു കേസ് വാദിക്കുന്നത്. സ്ത്രീധനം തിരിച്ചുനല്കല്, ജീവനാംശം നല്കല് തുടങ്ങിയവയാണ് കേസുകള്.
