മലപ്പുറം: ലൈഫ് പദ്ധതിയില് വീട് കിട്ടാത്തതിന്റെ നിരാശയില് നാല്പ്പത്തിയേഴുകാരന് കീഴാറ്റൂര് പഞ്ചായത്ത് ഓഫീസിനു തീയിട്ടു. തുടര്ന്ന് ആത്മഹത്യാശ്രമം നടത്തിയ ഇയാളെ മേലാറ്റൂര് പോലീസ് അറസ്റ്റ് ചെയ്തു.
ഇന്നലെ ഉച്ചയ്ക്കു രണ്ടോടൊണു ആനപ്പാങ്കുഴി ചുള്ളിയില് മുജീബ് റഹ്മാന്(47) ഓഫീസിന് തീയിട്ടത്. കമ്പ്യൂട്ടറുകള്, ഓഫീസ് രേഖകള്, ലാപ്ടോപ്പുകള്, പ്രിന്ററുകള്, ഫോണുകള് അടക്കം നിരവധി സാമഗ്രികള് കത്തിനശിച്ചു.
ചെയ്യുന്നതു തെറ്റാണോ, ശരിയാണോ എന്നറിയില്ലെന്നും ഉദ്യോഗസ്ഥരുടെ അനാസ്ഥ കാരണം പാവപ്പെട്ട ഒരുപാട് കുടുംബങ്ങള് തന്നെപ്പോലെ വിഷമം അനുഭവിക്കുകയാണെന്നും ഫെയ്സ്ബുക്ക് പോസ്റ്റിട്ട ശേഷമായിരുന്നു കയ്യാങ്കളി.
പഞ്ചായത്തിന്റെ പട്ടികയില് 94-ാം റാങ്കുകാരനാണ് മുജീബ് റഹ്മാന്. നിലവില് ആദ്യ 50പേര്ക്കാണ് വീട് നല്കുന്നത്. റാങ്ക് ക്രമമനുസരിച്ചേ വീട് നല്കാനാകൂവെന്ന് പരാതിയുമായി എത്തിയ മുജീബ് റഹ്മാനോട് പഞ്ചായത്ത് സെക്രട്ടറിയും മെമ്പറും വ്യക്തമാക്കിയിരുന്നു.
ഉദ്യോഗസ്ഥര് ഭക്ഷണം കഴിക്കാന് പോയ സമയത്താണ് ഇന്നലെ മുജീബ് എത്തിയത്. വളരെ കുറച്ചുപേര് മാത്രമേ ഓഫീസിലുണ്ടായിരുന്നുള്ളു. കയ്യില് കരുതിയ കാനിലെ പെട്രോള് ഒഴിച്ചാണ് ഇയാള് തീയിട്ടത്.
തുടര്ന്ന് ശുചിമുറിയില് കയറി വലതു കൈത്തണ്ട കത്തികൊണ്ടു മുറിച്ച് ആത്മഹത്യക്കു ശ്രമിച്ചു. സംഭവം അറിഞ്ഞെത്തിയ മേലാറ്റൂര് സി.ഐ: കെ.ആര്. രഞ്ജിതാണു ശുചിമുറിയില്നിന്നു പ്രതിയെ പിടികൂടിയത്. തുടര്ന്ന് പെരിന്തല്മണ്ണ ജില്ലാ ആശുപത്രിയിലേക്കു കൊണ്ടുപോയി.
സാഹചര്യം ഏറെ മോശമാണെന്നും ലൈഫ് പദ്ധതിപ്രകാരം വീട് ലഭിക്കാത്തതാണ് കൃത്യത്തിനു പ്രേരിപ്പിച്ചതെന്നും മുജീബ് റഹ്മാന് പോലീസിനോടു പറഞ്ഞു. ഭാര്യയും രണ്ടുകുഞ്ഞുങ്ങളുമുണ്ട്.
പെട്ടി ഓട്ടോറിക്ഷയില് പച്ചക്കറി വില്പന നടത്തിയാണ് ഉപജീവനമെന്നും വീടിന്റെ സ്ഥിതി ഏറെ ശോചനീയമാണെന്നും നാട്ടുകാര് പറഞ്ഞു. മുജീബ് റഹ്മാനെതിരേ പൊതുമുതല് നശിപ്പിച്ചതിനും തീയിട്ടതിനും വധശ്രമത്തിനും മേലാറ്റൂര് പോലീസ് കേസെടുത്തു. പെരിന്തല്മണ്ണയില് നിന്നും അഗ്നിശമനസേന എത്തിയാണ് തീയണച്ചത്. പ്രതിയെ ഇന്നു കോടതിയില് ഹാജരാക്കും.
