നാട്ടുകാരെയും പ്രാദേശിക അധികാരികളെയും വട്ടം കറക്കിയ കുരങ്ങിനെ ഒടുവില് പിടികൂടി. മധ്യപ്രദേശിലെ ഉജ്ജയിനിയിലാണ് സംഭവം. പ്രാദേശിക ഉദ്യോഗസ്ഥരും നാട്ടുകാരും ചേര്ന്നാണ് കുരങ്ങിനെ പിടികൂടിയത്. രണ്ടാഴ്ചയ്ക്കിടെ രാജ്ഗഡ് നഗരത്തിലെ 20 പേരെ ആക്രമിച്ച കുരങ്ങിനെ മോസ്റ്റ് വാണ്ടഡ് എന്നാണ് അധികാരികള് വിശേഷിപ്പിച്ചത്. അത്രത്തോളം അക്രമണകാരിയായായിരുന്നു പിടിയിലായ കുരങ്ങ്.
കുരങ്ങിനെ കണ്ടെത്താന് ഡ്രോണ് അടക്കമുള്ള ഉപകരണങ്ങള് ഉപയോഗിച്ചിരുന്നു. എന്നാല് കണ്ടെത്താന് കഴിയാതെ വന്നത് ഏതാണ്ട് രണ്ടാഴ്ചയോളം പ്രദേശത്ത് ഭീകരാവസ്ഥ സൃഷ്ടിക്കുകയുണ്ടായി. ഇതിന് പിന്നാലെയാണ് കുരങ്ങിനെ പിടികൂടുന്നവര്ക്ക് 21,000 രൂപ പാരിതോഷികം പ്രഖ്യാപിച്ചതും നാട്ടുകാരുടെ സഹായത്തോടെ അധികൃതര് കുരങ്ങിനെ പിടികൂടിയതും. രണ്ടാഴ്ചയ്ക്കിടെ കുരങ്ങ് ആക്രമിച്ച 20 പേരില് എട്ട് പേര് കുട്ടികളാണ്. വീടുകളുടെ മേല്ക്കൂരകളിലും മറ്റും മറഞ്ഞിരിക്കുന്ന കുരങ്ങ്, അവിചാരിതമായി ആളുകളുടെ മേലേയ്ക്ക് ചാടിയാണ് അക്രമണങ്ങള് നടത്തിയതെന്ന് പ്രദേശിക ഉദ്യോഗസ്ഥര് പറഞ്ഞു. പരിക്കേറ്റവരില് പലര്ക്കും ആഴത്തിലുള്ള പരിക്കേറ്റിരുന്നെന്നും പലര്ക്കും ഒന്നില് കൂടുതല് തുന്നലുകള് ആവശ്യമായി വന്നെന്നും റിപ്പോര്ട്ടുകള് പറയുന്നു.
പൊതുശല്യമായ ആക്രമിയെ പിടികൂടാനുള്ള നിരവധി ശ്രമങ്ങള് പാഴായതിന് ശേഷമാണ് പ്രാദേശിക അധികാരികള് കുരങ്ങിനെ പിടിക്കൂടിയാല് 21,000 രൂപ സമ്മാനം നല്കാമെന്ന് പ്രഖ്യാപിച്ചത്. തുടര്ന്ന് ഒരു പ്രത്യേക റെസ്ക്യൂ ടീമിനെ തയ്യാറാക്കുകയായിരുന്നു. 'കുരങ്ങിനെ പിടിക്കാന് മുനിസിപ്പാലിറ്റിക്ക് മാര്ഗമില്ല. അതിനാല് ഞങ്ങള് ജില്ലാ കളക്ടറെ സമീപിക്കുകയും അദ്ദേഹത്തിന്റെ സഹായത്തോടെ ഉജ്ജയിനില് നിന്ന് വനം വകുപ്പിന്റെ റെസ്ക്യൂ ടീമിനെ വിളിക്കുകയുമായിരുന്നു. മുനിസിപ്പാലിറ്റി ജീവനക്കാരും നാട്ടുകാരും അവരെ സഹായിച്ചു, ഒടുവില് നാല് മണിക്കൂറെടുത്താണ് കുരങ്ങിനെ പിടിക്കാന് കഴിഞ്ഞത്. കുരങ്ങിനെ ഏതെങ്കിലും വനം പ്രദേശത്ത് തുറന്നുവിടാനാണ് അധികാരികളുടെ തീരുമാനം.
