മുംബൈ: ഷാരൂഖിന്റെ മകള് സുഹാനയുടെ ഉന്നം സിനിമ തന്നെയാണെന്ന് ഇതിനകം ഏതാണ് ഉറപ്പായ കാര്യമാണ്. താരം നായികയായ സോയ അക്തറിന്റെ 'ദി ആര്ച്ചീസ്' നെറ്റ്ഫ്ളിക്സില് ഈ വര്ഷം അവസാനമാണ് റിലീസ് ചെയ്യാനിരിക്കുകയുമാണ്. എന്നാല് സിനിമാ അരങ്ങേറ്റത്തിന് മുമ്പായി റീയല് എസ്റ്റേറ്റ് ബിസിനസില് ഒരു വമ്പന് ഡീല് നടത്തി സുന്ദരിയായ താരപുത്രി.
മഹാരാഷ്ട്രയിലെ ആലിബൗഗിലെ താല് വില്ലേജില് 12.91 കോടി രൂപയുടെ ഒരു കൃഷിഭൂമി വാങ്ങിയിരിക്കുകയാണ് സുഹാനാ ഖാന്. 1.5 ഏക്കര് ഭൂമിയും അതിനൊപ്പമുള്ള 2,218 ചതുരശ്ര അടിവരുന്ന കെട്ടിടവും താരം വാങ്ങിയതായും ജൂണ് 1 ന് ഇതിന്റെ റജിസ്ട്രേഷന് നടപടികള് നടന്നതായുമാണ് വിവരം. ഇതിനായി സ്റ്റാമ്പ് ഡ്യൂട്ടി ഇനത്തില് മാത്രം സുഹാന 77.46 ലക്ഷം അടച്ചതായും വിവരമുണ്ട്.
അഞ്ജലി, രേഖ, പ്രിയ ഖോട്ട് എന്നിങ്ങനെ മൂന്ന് സഹോദരിമാരുടെ സ്വത്താണ് സുഹാന വാങ്ങിയത്. സഹോദരിമാര്ക്ക് പാരമ്പര്യമായി കിട്ടിയതാണ് ഈ വസ്തു. ഷാരൂഖിന്റെ ഭാര്യ ഗൗരിഖാന്റെ മാതാവും സഹോദരിമാരും ഡയറക്ടര്മാരായുള്ള ദേജാവു ഫാം പ്രൈവറ്റ് ലിമിറ്റഡിന്റെ പേരിലാണ് ഭൂമി റജിസ്ട്രേഷന് നടന്നിരിക്കുന്നത്. താലില് സുഹാനയുടെ പിതാവ് ഷാരൂഖിനും വസ്തുവുണ്ട്.
സ്വിമ്മിംഗ്പൂളും ഹെലിപ്പാഡുമുള്ള കടലിന് അഭിമുഖമായി നില്ക്കുന്ന കൂറ്റന് കെട്ടിടം ഇവിടെ ഷാരൂഖിന്റെ പേരിലുണ്ട്. അതേസമയം ഈ വര്ഷം ആദ്യമാണ് തന്റെ ആദ്യ വമ്പന് ഡീല് സുഹാന ഒപ്പുവെച്ചത്. ബ്യൂട്ടി ബ്രാന്റായ മേബെല്ലിന്റെ മുഖമായുള്ള കരാറിലാണ് സുഹാന ഒപ്പുവെച്ചത്.
ന്യൂയോര്ക്ക് സര്വകലാശാലയില് നിന്നും അഭിനയത്തില് മികവ് നേടിയ ശേഷമാണ് സുഹാന തന്റെ സിനിമാ അരങ്ങേറ്റത്തിനായി കാത്തിരിക്കുന്നത്. അമിതാഭ്ബച്ചന്റെ കൊച്ചുമകന് അഗസ്ത്യാ നന്ദയാണ് ദി ആര്ച്ചീസില് സുഹാനയ്ക്ക് നായകനായി വരുന്നത്. ശ്രീദേവിയുടെയും ബോണികപൂറിന്റെയും രണ്ടാമത്തെ മകള് ഖുഷിയും ചിത്രത്തില് പ്രധാന വേഷത്തിലെത്തുന്നുണ്ട്.
