ആലപ്പുഴ: വ്യാജസര്ട്ടിഫിക്കറ്റ് സംഘടിപ്പിച്ചു കൊടുത്ത കേസില് കേരളത്തില് പിടിയിലായ അബിന് സി രാജിനെ മാലിദ്വീപ് ഭരണകൂടം അധ്യാപക ജോലിയില് നിന്ന് പിരിച്ചുവിട്ടു. ഇന്നലെ രാത്രിയിലാണ് നെടുമ്പാശ്ശേരി വിമാനത്താവളത്തില് നിന്നും അബിനെ പോലീസ് കസ്റ്റഡിയില് എടുത്തത്.
മാലിദ്വീപ് അബിന്റെ സിമ്മും വര്ക്ക് പെര്മിറ്റും റദ്ദാക്കിയിട്ടുള്ളതായിട്ടാണ് വിവരം. എസ്എഫ്ഐ നേതാവ് നിഖില് തോമസിന് വ്യാജ സര്ട്ടിഫിക്കറ്റ് സംഘടിപ്പിച്ചു കൊടുത്തത് താന് തന്നെയാണെന്ന് പിടിയിലായ അബിന് സമ്മതിച്ചിട്ടുണ്ട്.
ഒറിയോണ് ഏജന്സിയില് നിന്നുമാണ് സര്ട്ടിഫിക്കറ്റ് സംഘടിപ്പിച്ചുകൊടുത്തത് എന്നാണ് പറഞ്ഞിരിക്കുന്നത്. അബിന് സി രാജ് അന്വേഷണമായി സഹകരിക്കുന്നുണ്ടെന്നാണ് പോലീസ് പറഞ്ഞത്. നിലവില് കൊച്ചിയിലെ ഒറിയോണ് എന്ന സ്ഥാപനം പ്രവര്ത്തിക്കുന്നില്ല.
വിസാതട്ടിപ്പുമായി ബന്ധപ്പെട്ട് സ്ഥാപനത്തിന്റെ ഉടമ നിയമനടപടി നേരിടുകയാണ്. തിരുവനന്തപുരത്ത് പഠിക്കുമ്പോള് ഒരു എക്സിക്യുട്ടീവ് വഴിയാണ് സ്ഥാനപനത്തെക്കുറിച്ച് അറിഞ്ഞതെന്നാണ് അബിന് പോലീസിന് നല്കിയിരിക്കുന്ന മൊഴി. ഈ സ്ഥാപനം വഴി കൂടുതല് പേര്ക്ക് വ്യാജ സര്ട്ടിഫിക്കറ്റ് സംഘടിപ്പിച്ചു കൊടുത്തിട്ടുണ്ടോ എന്നും പോലീസ് പരിശോധിക്കും.
രണ്ടുലക്ഷം മുടക്കി അബിനാണ് തനിക്ക് കലിംഗ സര്വകലാശാലയുടെ വ്യാജ സര്ട്ടിഫിക്കറ്റ് സംഘടിപ്പിച്ചു നല്കിയതെന്നാണ് നിഖില് നല്കിയ മൊഴി. നിഖിലിന്റെ വീട്ടില് നടത്തിയ പരിശോധനയില് വ്യാജ സര്ട്ടിഫിക്കറ്റും ബികോം ഫസ്റ്റ് ക്ലാസില് പാസായെന്ന വ്യാജ മാര്ക്ക് ലിസ്റ്റും കണ്ടെത്തിയിരുന്നു.
