ആലപ്പുഴ: യൂത്ത്കോണ്ഗ്രസില് സംഘടനാ തെരഞ്ഞെടുപ്പ് നടക്കാനിരിക്കെ വോട്ട് നേടാന് പാര്ട്ടി മാറി വരെ ആളെ പിടിക്കുന്നെന്ന് ആക്ഷേപം. സംഘടനാ തെരഞ്ഞെടുപ്പ് നടക്കാനിരിക്കെ ഗ്രൂപ്പുകള് തമ്മില് പോര് ശക്തമായ സ്ഥിതിയിലാണ് ഈ ആരോപണം. ലീഗ് പ്രവര്ത്തകരെ വരെ യൂത്ത് കോണ്ഗ്രസാക്കുന്നുവെന്ന പരാതി വ്യാപകമായതോടെ ഡിസിസികള് തന്നെ പ്രവര്ത്തകര്ക്ക് മുന്നറിയിപ്പ് നല്കി.
യൂത്ത് കോണ്ഗ്രസ് അംഗത്വ വിതരണം ജൂലൈ 28 നാണ് അവസാനിക്കുന്നത്. സംഘടനാ തിരഞ്ഞെടുപ്പില് ഗ്രൂപ്പുകള് തമ്മില് വാശിയേറിയ മത്സരമുണ്ട്. വോട്ടു നേടാന് പരമാവധി അംഗങ്ങളെ ചേര്ക്കാനാണ് പാര്ട്ടി മാറിവരെ ആളെ പിടിക്കുന്നത്. ലീഗ് പ്രവര്ത്തകരെ യൂത്ത് കോണ്ഗ്രസാക്കുന്നുവെന്നും ഇത് മുന്നണിബന്ധത്തെ തന്നെ ബാധിക്കുന്നെന്നും പരാതി ഉയര്ന്നതോടെ കോഴിക്കോട് ഡിസിസി പ്രശ്നത്തില് ഇടപെട്ടിട്ടുണ്ട്. അംഗത്വ വിതരണത്തിനായി കോണ്ഗ്രസുകാര് ലീഗുകാരുടെ വീട് കയറിയിറങ്ങിയതായി പരാതി ഉയര്ന്നിരുന്നു.
അരീക്കുളം പഞ്ചായത്തില് ഇത് മുന്നണിയെ ബാധിക്കുകയും ലീഗ് പ്രശ്നം ഉയര്ത്തുകയും ചെയ്തിരുന്നു. തുടര്ന്ന് കോണ്ഗ്രസ് നേതാക്കള് ഇടപെടുകയും നടപടി ആവര്ത്തിക്കില്ലെന്നും ഉറപ്പ് വാങ്ങിയിട്ടുണ്ട്. ഇതുവരെ 6,43,089 പേര് അംഗത്വം എടുത്തതായിട്ടാണ് റിപ്പോര്ട്ട്.
അംഗത്വ വിതരണം അവസാനിക്കുമ്പോള് എട്ട് ലക്ഷം പേര് സംഘടനയില് ചേരുമെന്നാണ് പ്രതീക്ഷ. 50 രൂപ ഫീസായി ഈടാക്കി 3.21 കോടി രൂപ ദേശീയ നേതൃത്വത്തിന്റെ അക്കൗണ്ടില് എത്തുമെന്നാണ് കരുതുന്നത്. അംഗത്വ ഫീസ് ഇനത്തിലൂടെ നാലുകോടി രൂപയാണ് യൂത്ത് കോണ്ഗ്രസ് ദേശീയനേതൃത്വം പ്രതീക്ഷിക്കുന്നത്. മൂന്ന് വര്ഷം മുന്പ് അഞ്ച് ലക്ഷം പേരാണ് അംഗത്വം എടുത്തിരുന്നത്.
