കോട്ടയം: കണ്ണീര്ക്കടലിന് നടുവിലൂടെ ഉമ്മന്ചാണ്ടിയുടെ അന്ത്യയാത്ര കോട്ടയത്തേക്ക് അടുക്കുന്നു. കഴിഞ്ഞ ദിവസം തിരുവനന്തപുരത്ത് നിന്നും തുടങ്ങിയ യാത്ര 24 മണിക്കൂറുകള് പിന്നിട്ടാണ് പൊതുദര്ശനത്തിന് വെയ്ക്കുന്ന തിരുനക്കര മൈതാനത്ത് എത്തുന്നത്. എം.സി. റോഡിലൂടെ പല സ്ഥലങ്ങളിലായി അനേകം മനുഷ്യസ്നേഹികളുടെ അന്ത്യാഞ്ജലി ഏറ്റുവാങ്ങിയാണ് ഉമ്മന്ചാണ്ടിയുടെ ഭൗതീകശരീരം കോട്ടയത്തേക്ക് നീങ്ങുന്നത്.
രാവിലെ ഒമ്പത് മണിയോടെ ഭൗതീകശരീരം വഹിച്ചുകൊണ്ടുള്ള ബസ് ഉമ്മന്ചാണ്ടിയുടെ സ്വന്തം നാടായ കോട്ടയത്ത് എത്തുമെന്നാണ് പ്രതീക്ഷിക്കുന്നത്. രാത്രിയില് ഉടനീളം പ്രിയനേതാവിനെ കാത്ത് തിരുനക്കരയും കോട്ടയം ജില്ലയും നഗരവും ഉറങ്ങാതെ കാത്തിരിക്കുകയായിരുന്നു. വടക്കന് കേരളത്തില് നിന്നുള്ള അനേകം കോണ്ഗ്രസ് നേതാക്കളാണ് തിരുനക്കര മൈതാനത്ത് അദ്ദേഹത്തിന് അന്ത്യാഞ്ജലി അര്പ്പിക്കാന് എത്തിയിരിക്കുന്നത്. ഇവരെല്ലാം ഇന്നലെ രാത്രി മുതല് ഉറങ്ങാതെ കാത്തിരിക്കുകയാണ്.
ലക്ഷങ്ങളുടെ ആദരമേറ്റുവാങ്ങിയാണ് തിരുവനന്തപുരത്ത് നിന്നും അഞ്ചു ജില്ലകള് പിന്നിട്ടുള്ള യാത്ര മുമ്പോട്ട് പോയത്. പ്രിയ നേതാവിനെ ഒരുനോക്ക് കാണാനായി എംസി റോഡിന്റെ ഇരുവശത്തുമായി വന് ജനാവലിയാണ് തടിച്ചുകൂടിയത്. വിങ്ങുന്ന ഹൃദയത്തോടെയാണ് ആള്ക്കാര് പ്രിയനേതാവിന് വിട നല്കിയത്. ഒന്നര മണിക്കൂറെങ്കിലും തിരുനക്കരയില് പൊതുദര്ശനത്തിന് വെയ്ക്കുമെന്നാണ് കരുതുന്നത്. ഇന്ന് ഉച്ചയ്ക്ക് 2 മണിയോടെ പുതുപ്പള്ളിയിലെ കുടുംബവീട്ടില് എത്തിക്കും. ഉച്ചയ്ക്ക് രണ്ടുമണിയോടെ പുതുപ്പള്ളി വലിയ പള്ളിയില് സംസ്ക്കാരം നടക്കും.
