പൂനെ: കുത്തനെ കുതിച്ചുയര്ന്ന തക്കാളിവില ഇന്ത്യയിലെ സാധാരണക്കാരന്റെ പോക്കറ്റ് പൊള്ളിച്ചപ്പോള് പൂനെയിലെ ഒരു കര്ഷകനെ തക്കാളി കോടീശ്വരനാക്കി മാറ്റി. തക്കാളി വില്പ്പനയിലൂടെ ഇയാള് ഒരു മാസം കൊണ്ട് ഉണ്ടാക്കിയത് മൂന്ന് കോടിയിലധികം രൂപ. മഹാരാഷ്ട്ര പൂനെ ജില്ലയിലെ പച്ചഗര് ഗ്രാമത്തിലെ 36 കാരന് കര്ണാകന് ഈശ്വര് ഗെയ്കറാണ് വന്ലാഭം കൊയ്തത്.
വില കുത്തനെ കൂടുന്നതിന് മുമ്പ് മെയ് യില് വിലയിടിഞ്ഞ് പലതരം വലിയ പ്രതിസന്ധി നേരിട്ടതിന് പിന്നാലെയാണ് ഈശ്വര് ഈ നേട്ടം ഉണ്ടാക്കിയത്. തിരിച്ചടികളില് തളരാതെ നിശ്ചയദാര്ഡ്യത്തോടെ തന്റെ 12 ഏക്കറില് തക്കാളികൃഷി ചെയ്ത ഈശ്വറിനെ തേടി പിന്നാലെ ഭാഗ്യം വന്നു. തക്കാളി വില കുതിച്ചു കയറിയ ജൂണില് വെറും ഒരാഴ്ച കൊണ്ടാണ് ഈശ്വറിന് മുന്ന് കോടി രൂപ ലാഭം കിട്ടിയത്.
18,000 പെട്ടി തക്കാളിയാണ് ഈ കാലയളവില് ഗെയ്ക്കര് വില്പ്പന നടത്തിയത്. ഓരോ പെട്ടിയും 20 കിലോ വീതം ഉണ്ടായിരുന്നു. ബാക്കിയുള്ള 4000 പെട്ടി തക്കാളി കൂടി വില്പ്പന നടത്തി 50 ലക്ഷം കൂടി സമ്പാദിക്കാനുള്ള നീക്കത്തിലാണ് ഈശ്വര്. ഗതാഗതചെലവ് ഉള്പ്പെടെ തക്കാളി കൃഷി ചെയ്യാന് ഈശ്വറിന് ചെലവായത് വെറും 40 ലക്ഷം രുപ മാത്രമാണ്. മൊത്തമുള്ള 18 ഏക്കര് നിലത്ത് 12 ഏക്കറില് മാത്രമാണ് ഇദ്ദേഹം കൃഷി ചെയ്തത്.
വില തീരെ കുറവുള്ള രണ്ടു മാസം മുമ്പാണ് ഈശ്വര് തക്കാളി കൃഷിയിറക്കിയത്. എന്നാല് കിലോയ്ക്ക് 37 രൂപ മുതല് 38 രൂപ വരെയായ ജൂണ് 11 ന് തക്കാളി ഒരു പെട്ടിക്ക് വില 770 ആയി ഉയര്ന്നു. കിലോയ്ക്ക് 110 ആയി ഉയര്ന്ന ജൂലൈ 18 ലേക്ക് എത്തിയപ്പോള് അത് പെട്ടിക്ക് 2,200 ആയി മാറി.
അതേസമയം കിലോയ്ക്ക് രണ്ടര രൂപ മാത്രം വെച്ച് പെട്ടിയ്ക്ക് 50 രൂപയുള്ള സമയത്ത് തക്കാളി കൃഷി വിട്ട സമയം പോലുമുണ്ടെന്നും ഇദ്ദേഹം പറയുന്നു. 2021 ല് 15 ലക്ഷം രൂപ നഷ്ടം വന്നിരുന്നതായും ഇയാള് പറയുന്നു. അതേസമയം 2022 ല് നേരിയ തോതില് ലാഭം കിട്ടി. ഈ വര്ഷം മെയ് യില് ആയിരുന്നു തക്കാളികൃഷി വീണ്ടും ഇറക്കിയത്. ഈ മേഖലയില് തക്കാളി വന്തോതില് കൃഷി ചെയ്ത മറ്റു കര്ഷകര്ക്കും വലിയ ലാഭമാണ് കിട്ടിയത്.
