ഡെറാഡൂണ്: ബ്രൂസ് ലീയുടെ കടുത്ത ആരാധകനായിരുന്ന ഉത്തരാഖണ്ഡുകാരന് ദേവ് രതുരിയ്ക്ക് അദ്ദേഹത്തെപ്പോലെ ഒരു വലിയ ഹീറോ ആകണമെന്നായിരുന്നു സ്വപ്നം. ഒരിക്കല് ഹിന്ദി സിനിമയില് തലകാണിക്കാന് മുംബൈയില് പോയി പരാജയപ്പെടുകയും ചെയ്തു. എന്നാല് ദേവ് ഇപ്പോള് ചൈനയിലെ അറിയപ്പെടുന്ന ഹോട്ടല് വ്യവസായിയും സിനിമാതാരമാണ്. ചൈനീസ് സിനിമയില് തന്റേതായ ഇടം സൃഷ്ടിക്കുക മാത്രമല്ല ചൈനയിലെ പാഠപുസ്തകത്തില് പാഠ്യവിഷയം കൂടിയായി മാറിയിരിക്കുകയാണ് ദേവ് രതുരി.
1998 ല് സിനിമാതാരമാകാന് മുംബൈയ്ക്ക് പോയി ഓഡീഷനില് പങ്കെടുത്തത് മലയാളത്തിലെ മോഹന്ലാല് സൂപ്പര്ഹിറ്റ് ചിത്രം യോദ്ധയിലെ വില്ലനായി എത്തിയയാളും മഹാഭാരതം സീരിയലില് ദുര്യോദനനായി അഭിനയിക്കുകയും ചെയ്ത പുനീത് ഇസ്സാറിന് മുന്നിലായിരുന്നു ഓഡീഷന്. അഭിനയം പാളിയെന്ന് മാത്രമല്ല അവസരം കിട്ടിയുമില്ല. ഈ സംഭവത്തില് പരാജയപ്പെട്ടതാരം പക്ഷേ ഇപ്പോള് പ്രചോദനം കഠിനാദ്ധ്വാനം തുടങ്ങിയ വാക്കുകളുടെ ഉദാഹരണമായി ഷാന്സി പ്രവിശ്യയിലെ സിയാന് നഗരത്തിലെ ഏഴാംക്ലാസ്സ് വിദ്യാര്ത്ഥികള്ക്കുള്ള ഇംഗ്ളീഷ് പാഠപുസ്തകത്തിലെ വിഷയമാണ്.
ആദ്യ ഓഡീഷനില് പരാജയപ്പെട്ട് 18 വര്ഷം കഴിഞ്ഞപ്പോള് ചൈനയില് ഒരു റസ്റ്റോറന്റില് ജോലിക്കെത്തിയ അദ്ദേഹം ചൈനീസ് സിനിമാവ്യവസായത്തിലെ തന്നെ വലിയ പേരുകളില് ഒന്നാണ്. ഉത്തരാഖണ്ഡിലെ ടെഹ്രി ഗര്വാളില് ഒരു കര്ഷക കുടുംബത്തില് ജനിച്ച ദേവ് ഇന്ത്യയില് വെച്ച് തന്നെ കരാട്ടേ അഭ്യസിച്ചിരുന്നു. മാര്ഷ്യല് ആര്ട്സ് കൂടുതല് പഠിക്കാന് ചൈനയില് അവസരം നോക്കുകയും ചെയ്തിരുന്നു.
ഡല്ഹിയില് ചെറിയ ജോലികളൊക്കെ ചെയ്തു ഒരു ദശകത്തോളം കഴിഞ്ഞ രാതുരി കുടുംബത്തെ സഹായിക്കുന്നതിനായി 2005 ലാണ് ചൈനയിലെ ഷെന്സെനിലെ ഇന്ത്യന് റസ്റ്റോറന്റിലേക്ക് ജോലിക്ക് പോയത്. മാസം 10,000 രൂപയായിരുന്നു പ്രതിഫലം. ചൈനീസ് ഭാഷയായ മന്ഡാരിനില് ആവഗാഹം നേടാന് സഹായിച്ചു എന്നതാണ് അതുകൊണ്ട് കിട്ടിയ ഏറ്റവും വലിയ ഗുണം. ജോലി സമയത്തിന് ശേഷം മാര്ഷ്യല് ആര്ട്സില് വൈദഗ്ദ്ധ്യം നേടുക സ്വപ്നം വെച്ച് രാത്രിയില് അലഞ്ഞുനടന്ന അദ്ദേഹത്തിന് ഷാവോലിന് ക്ഷേത്രത്തിലേക്ക് പോകാനായിരുന്നു പലരില് നിന്നും കിട്ടിയ ഉപദേശം.
ചാന് ബുദ്ധിസത്തിന്റെയും ഷാവോലിന് കുംഗ്ഫൂവിന്റെയും ഉറവിടമായ ഷാവോലിന് ക്ഷേത്രത്തിലെ പഠനം താങ്ങാവുന്നതായിരുന്നില്ല. പിന്നീട് കഠിനാദ്ധ്വാനത്തിന്റെയും സ്ഥിരോത്സാഹത്തിന്റെയും ഫലമായി റെസ്റ്റോറന്റില് മാനേജര് പദവിയില് ഏഴു വര്ഷം കൊണ്ട് എത്തി. 2013 ല് സിയാനിലെ റെഡ്ഫോര്ട്ടില് സ്വന്തം റസ്റ്റോറന്റും തുറന്നു. പിന്നാലെ സിനിമാഭാഗ്യവും എത്തി. 2017 ല് ഒരു ചൈനീസ് സംവിധായകന് രതുരിയുടെ റസ്റ്റോറന്റില് ഭക്ഷണം കഴിക്കാനായി എത്തി. സ്വാറ്റ് എന്ന ടെലിവിഷന് പരമ്പരയില് ഒരു ചെറിയ വേഷം വാഗ്ദാനം ചെയ്തു.
അത് ക്ലിക്കായി. അതിന് ശേഷം രതുരിയ്ക്ക് തിരിഞ്ഞുനോക്കേണ്ടി വന്നില്ല. ഇതിനകം 35 ചൈനീസ് സിനിമകളിലും വന് ഹിറ്റായ 'മൈ റൂംമേറ്റ് ഈസ് എ ഡിറ്റക്ടീവ്' അടക്കം ആവശ്യത്തിന് ടെലിവിഷന് സീരിയലുകളിലും വേഷമിട്ടു. മൈ റൂംമേറ്റ് ഈസ് എ ഡിറ്റക്ടീവില് പ്രധാനവേഷങ്ങളില് ഒന്നാണ് അദ്ദേഹം ചെയ്തത്. ഇപ്പോള് ചൈനയില് രതുരിയ്ക്ക് എട്ടിലധികം റസ്റ്റോറന്റായി കഴിഞ്ഞു.
ചൈനീസ് സിനിമകള് ഏറെ പ്രശസ്തി തനിക്ക് നേടിത്തന്നെന്ന് രതുരി പറയുന്നു. ഇത് കോവിഡ് കാലത്ത് സഹായങ്ങള് തന്നെ തേടിവരാനും കാരണമായി. സിയാനില് ഭാര്യ അഞ്ജലിയും മക്കളായ ആരവും അര്നവിനുമൊപ്പം താമസിക്കുന്ന രതുരി ചൈനീസ് ജനത തന്നെ അവരുടെ ആളായി ഏറ്റെടുത്തെന്നും പറയുന്നു. പോറ്റിയ നാടിനൊപ്പം പിറന്ന നാടിനെയും രതുരി മറന്നില്ല. താന് ജനിച്ചു വളര്ന്ന ഉത്തരാഖണ്ഡിലെ തന്റെ ഗ്രാമത്തില് നിന്നും ജോലിയും അവസരവും നല്കി 150 പേരെയാണ് രതുരി ചൈനയിലേക്ക് കൊണ്ടുവന്നത്. മൊത്തമുള്ള 70 ജീവനക്കാരില് 40 പേരും ഉത്തരാഖണ്ഡുകാരാണെന്ന് ഡല്ഹി കാലത്ത് രതുരിയുടെ ഏറ്റവും വലിയ കൂട്ടുകാരനായ മനോജ് റാവത്തും പറയുന്നു.
