ചെന്നൈ: സൈ്വര്യജീവിതത്തിന് തടസ്സമായതിനെ തുടര്ന്ന് കേരളം തമിഴ്നാട്ടിലേക്ക് നാടുകടത്തിയ അരിക്കൊമ്പന് അവിടെ കൂട്ടും കുടുംബവുമൊക്കെയായി സുഖവാസം. കേരളത്തിലും തമിഴ്നാട്ടിലുമായുളള അഗസ്ത്യാര്കൂടത്തില് വരുന്ന കോതയാര് വനമേഖലയില് അരിക്കൊമ്പന് സമാധാനമായി കഴിയുന്നു.
ചിന്നക്കനാലില് നിന്നും നാലുമാസം മുമ്പ് മയക്കുവെടി വെച്ച് കോതയാറിലേക്ക് കൊണ്ടുപോയ അരിക്കൊമ്പന് ജൂണ് മുതല് കോതയാറില് തന്നെ തുടരുകയാണ്. രണ്ടു കുട്ടിയാനകളുള്പ്പെടെ പത്തംഗ കാട്ടാന കൂട്ടത്തിനൊപ്പമാണ് അരിക്കൊമ്പനെന്നും ആനക്കൂട്ടവുമായി കൂട്ടായതോടെ കുഴപ്പമെല്ലാം മാറിയെന്നും തമിഴ്നാട് വനം വകുപ്പ് പറയുന്നു. കൊമ്പനെ നിരീക്ഷിക്കുന്നതിന് ഏര്പ്പെടുത്തിയ വാച്ചര്മാരുടെ എണ്ണം കുറച്ചു.
കടുവാസങ്കേതത്തില് കോതയാറില് പുല്ലെല്ലാം തിന്ന് ഉഷാറായി നില്ക്കുന്ന അരിക്കൊമ്പന്റെ ദൃശ്യങ്ങള് നേരത്തെ തമിഴ്നാട് വനം വകുപ്പ് പുറത്തുവിട്ടിരുന്നു. ചിന്നക്കനാലില് ആഴ്ചയിലൊരിക്കല് എന്ന കണക്കില് ജനവാസമേഖലയില് എത്തിയിരുന്ന അരിക്കൊമ്പന് അരിയും മറ്റും തിന്നുകയും കടകള് തകര്ക്കുകയും ചെയ്തിരുന്നു. ഇതോടെയാണ് മയക്കുവെടി വെച്ച് തമിഴ്നാട്ടിലേക്ക് കൊണ്ടുപോയത്.
അവിടെ നിന്ന് പിടികൂടി പെരിയാറിലേക്ക് മാറ്റിയപ്പോഴും അരി തേടിയുളള കൊമ്പന്റെ ശീലത്തില് മാറ്റം വരുത്തിയിരുന്നില്ല. മേഘമലയിലെ എസ്റ്റേറ്റില് ഇറങ്ങി നാശനഷ്ടങ്ങള് ഉണ്ടാക്കിയ അരിക്കൊമ്പന് കുമളിയിലേക്കും കമ്പത്തേക്കും നടന്നെത്തിയിരുന്നു. പിന്നീട് കമ്പത്ത് നിന്ന് മയക്കുവെടിവെച്ച് കളക്കാട്ടേക്ക് മാറ്റി. കേരളത്തിലെ വനമേഖലയിലേക്ക് ഇറങ്ങാനുളള സാധ്യത തമിഴ്നാട് വനംവകുപ്പ് തളളിക്കളയുന്നില്ല.
