മലയാള സിനിമാമേഖലയില് കോമഡി കഥാപാത്രങ്ങളിലൂടെ തുടങ്ങി പിന്നീട് സീരിയസ് വില്ലന് വേഷങ്ങളിലൂടെ പ്രേക്ഷകരുടെ മനസ്സിലേക്ക് ആഴ്ന്നിറങ്ങിയ താരമാണ് സലീം കുമാര്. സോഷ്യല് മീഡിയയില് സജീവമായ താരം തന്റെ അഭിപ്രായങ്ങളും നിലപാടുകളുമൊക്കെ അതിലൂടെ പങ്കിടാറുണ്ട്. ഇപ്പോഴിതാ ശാസ്ത്രം, വിശ്വാസം എന്നിവയുമായി ബന്ധപ്പെട്ട വിവാദം കൊഴുക്കവെ, തന്റെ പ്രതികരണം ഫെയ്സ്ബുക്കിലൂടെ കുറിച്ചിരിക്കുകയാണ് സലീം കുമാര്. മാറ്റങ്ങള് ഭരണസിരാകേന്ദ്രങ്ങളില് നിന്ന് തന്നെയാണ് തുടങ്ങേണ്ടത് എന്നുപറഞ്ഞുകൊണ്ടാണ് താരത്തിന്റെ കുറിപ്പ് തുടങ്ങുന്നത്.
‘‘മാറ്റങ്ങള് തുടങ്ങേണ്ടത് ഭരണസിരാ കേന്ദ്രങ്ങളില് നിന്നും തന്നെയാണ്. മിത്തും റിയാലിറ്റിയും തമ്മിലുള്ള സംഘര്ഷം നിലനില്ക്കുമ്ബോള്, റിയാലിറ്റിയുടെ വിജയത്തിനു വേണ്ടി ദേവസ്വം വകുപ്പ് മന്ത്രിയെ മിത്തിസം വകുപ്പ് മന്ത്രി എന്നു വിളിച്ചു തുടങ്ങണം. ഭണ്ടാരത്തില് നിന്നും കിട്ടുന്ന പണത്തെ മിത്തുമണി എന്നും വിളിക്കണം എന്നാണ് എന്റെ ഒരു ഇത്...’’ കുറിപ്പിനൊപ്പം ദേവസ്വം മന്ത്രി കെ രാധാകൃഷ്ണന്റെ ചിത്രവും സലിംകുമാര് പങ്കുവച്ചിട്ടുണ്ട്.
സ്പീക്കര് എ എന് ഷംസീറിന്റെ മിത്ത് പരാമര്ശത്തില് പ്രതികരിച്ച് കോണ്ഗ്രസ് നേതാവ് ശശി തരൂരും രംഗത്തുവന്നിരുന്നു. താന് ഗണേശ ഭക്തനാണെന്നും ഗണപതിയെ പ്ലാസ്റ്റിക് സര്ജറിയുമായി ബന്ധപ്പെടുത്തിയതിനോടായിരുന്നു വിയോജിപ്പെന്നും ശശി തരൂര് പറഞ്ഞു. ‘പ്ലാസ്റ്റിക് സര്ജറിയുമായുള്ള നരേന്ദ്ര മോദിയുടെ താരതമ്യം ശാസ്ത്രത്തിന് എതിരാണ്. ആ നിലപാടില് മാറ്റമില്ല...’ തരൂര് വ്യക്തമാക്കി. നിലവിലെ വിവാദവുമായി തന്റെ പ്രസ്താവന കൂട്ടിക്കുഴയ്ക്കരുതെന്നും തരൂര് പറഞ്ഞു.
