കോഴിക്കോട്: വടകര അഴിയൂര് ചോമ്പാലയില് ക്ഷേത്ര ഭണ്ഡാരം കുത്തിത്തുറന്ന് മൂന്ന് തവണ പണം മോഷ്ടിച്ച സംഭവത്തിലെ പ്രതി പോലീസ് പിടിയില്. മട്ടന്നൂര് പേരോറ പുതിയ പുരയില് രാജീവന് എന്ന സജീവന് (44) ആണ് അറസ്റ്റിലായത്. ഇയാളെ ക്ഷേത്രത്തിലെത്തിച്ച് ഇന്നലെ പോലീസ് തെളിവെടുപ്പ് നടത്തി.
തെളിവെടുപ്പിനെത്തിയപ്പോള് മോഷ്ടാവ് പോലീസിനോട് പറഞ്ഞ പരാതി കേട്ട് നാട്ടുകാരും ചിരിച്ചു. 'നാട്ടുകാര് ശരിയല്ലട്ടാ, ആരും പൈസ ഇടുന്നില്ല' എന്നായിരുന്നു പോലീസുകാരോട് കള്ളന്റെ പരാതി.
ചോമ്പാല് ബംഗ്ളാവില് ദേവസ്ഥാനം ക്ഷേത്രത്തിലെ ഭണ്ഡാരമാണ് മോഷ്ടാവ് കുത്തിത്തുറന്ന് മൂന്ന് തവണയായി കവര്ന്നത്. ആദ്യം കവര്ച്ച നടക്കുമ്പോള് ക്ഷേത്രത്തില് സി.സി.ടിവി ഇല്ലായിരുന്നു. വീണ്ടും മോഷണം നടന്നതോടെ ക്ഷേത്രഭാരവാഹികള് സി.സി.ടിവി സ്ഥാപിച്ചു.
കഴിഞ്ഞ ദിവസം കള്ളന് സിസിടിവിയില് കുടുങ്ങുകയായിരുന്നു. സിസിടിവിയില് പതിഞ്ഞ ചിത്രത്തിന്റെ അടിസ്ഥാനത്തില് നടത്തിയ അന്വേഷണത്തിലാണ് പ്രതി സജീവന് വലയിലായത്.
ഇയാള് കണ്ണൂര് ജില്ലയിലെ പോലീസ് സ്റ്റേഷനുകളില് നിരവധി കളവ് കേസുകളില് പ്രതിയാണെന്ന് പോലീസ് പറഞ്ഞു. താനല്ല മോഷ്ടിച്ചതെന്നും മട്ടന്നൂരുകാരനായ താന് ഭണ്ഡാരം മോഷ്ടിക്കാനായി ഇവിടെ വരെ വരുമോയെന്നും ഒരാളെ പോലെ ഏഴ് പേരില്ലേ എന്നെല്ലാം പ്രതി പോലീസിനോട് ചോദിക്കുന്നുണ്ടായിരുന്നു. ഇതിനിടെയിലാണ് കള്ളന്റെ പരാതിയെത്തിയതും.
ഭണ്ഡാരത്തില് പണം കുറവാണെന്നും നാട്ടുകാര് ശരിയല്ല, ആരും പൈസ ഇടുന്നില്ലെന്നുമായിരുന്നു സജീവന്റെ കമന്റ്. ഇത് നാട്ടുകാരിലും പ പോലീസിലും ചിരിയുണര്ത്തി. നാട്ടുകാര് പകര്ത്തിയ ഈ വീഡിയോ ദൃശ്യംഇപ്പോള് സാമൂഹിക മാധ്യമങ്ങളില് വൈറലാണ്.
ചോമ്പാല സിഐ ബി കെ സിജു, എസെ്എ രാജേഷ്, എസ് പിയുടെ ക്രൈം സ്ക്വാഡ് അംഗങ്ങളായ വി വി ഷാജി. പ്രമോദ്, സുമേഷ് എന്നിവരാണ് അന്വേഷണ സംഘത്തിലുണ്ടായിരുന്നത്.
