കാന്സര് ഡോക്ടര് പോലീസിനെയൂം ആംബുലന്സിനെയും വീട്ടിലേക്ക് വിളിച്ചു വരുത്തിയ ശേഷം നാലുമാസം പ്രായമുള്ള പിഞ്ചുകുഞ്ഞിനെ വെടിവെച്ചു കൊലപ്പെടുത്തി മാതാവും ആത്മഹത്യ ചെയ്തു. ന്യൂയോര്ക്കിലെ സോമേഴ്സില് നടന്ന ഞെട്ടിക്കുന്ന സംഭവത്തില് 40 വയസ്സുള്ള ഡോ. ക്രിസ്റ്റല് കാസ്കെറ്റയാണ് ജീവനൊടുക്കിയത്. കൊലപാതകത്തിന് തൊട്ടുമുമ്പ് ഇവര് ആംബുലന്സിനെയൂം പോലീസിനെയും വിളിച്ചു.
ശനിയാഴ്ച രാവിലെ വെസ്റ്റ് ചെസ്റ്റര് കൗണ്ടിയിലെ വീട്ടില് ഏഴു മണിയോടെ കുഞ്ഞു കിടന്നുറങ്ങുന്ന റൂമിലേക്ക് പ്രവേശിച്ച കാസ്കെറ്റ അതിനെ വെടിവെച്ചു കൊലപ്പെടുത്തി. അതിന് ശേഷം സ്വയം നിറയൊഴിച്ചു. സംഭവം നടക്കുമ്പോള് കാസ്കെറ്റയുടെ 37 കാരനായ ഭര്ത്താവ് വീട്ടില് ഉണ്ടായിരുന്നില്ല. എന്നാല് കാസ്കെറ്റയുടെ സ്വന്തം മാതാപിതാക്കള് വീട്ടിലുണ്ടായിരുന്നു താനും. അതേസമയം ഇവര് പോലീസിനെയും ആംബുലന്സിനെയും ആവശ്യപ്പെടുന്ന ആദ്യ സംഭവം അല്ലാത്തതിനാല് അയല്ക്കാരും കാര്യമായിട്ട് എടുത്തില്ല.
വളരെ സ്വകാര്യമായി ജീവിക്കുന്നവരാണ് കാസ്കെറ്റയും ഭര്ത്താവുമെന്നും നാട്ടുകാര് പറഞ്ഞു. അതുകൊണ്ടു തന്നെ ഡോക്ടര് ഗര്ഭിണിയാണെന്ന കാര്യം പോലും അയല്ക്കാര് അറിഞ്ഞില്ല. കുഞ്ഞിന്റെ പ്രായമോ ലിംഗമോ ഒന്നും അധികൃതര് വെളിപ്പെടുത്തിയിട്ടില്ല. എന്നാല് ഓണ്ലൈന് റജിസ്ട്രി പ്രകാരം കുട്ടിയുടെ പ്രായം നാലോ രണ്ടോ മാസം മാത്രമാണ്. അതേസമയം കുട്ടി പെണ്കുട്ടിയാണെന്നും കാസ്കെറ്റയുടെ ഏക കുട്ടിയാണെന്നും വിവരമുണ്ട്. കൊലപാതകത്തിന് കാരണം എന്താണെന്നും വ്യക്തമായിട്ടില്ല. ന്യൂയോര്ക്ക് നഗരത്തിലെ അറിയപ്പെടുന്ന ഓങ്കോളജി വിദഗ്ദധയായ ഡോക്ടറുടെ മരണമറിഞ്ഞ് സഹപ്രവര്ത്തകരും ചികിത്സ നടത്തിയിരുന്നവരുമായ അനേകര് എത്തുന്നുണ്ട്.
ന്യൂയോര്ക്ക് നഗരത്തിലെ മൗണ്ട് സിനായി ആശുപത്രിയിലാണ് ജോലി ചെയ്തിരുന്നത്. ബ്രെസ്റ്റ് കാന്സര് സ്പെഷ്യലിസ്റ്റായിരുന്നു കാസ്കെറ്റ്. ഭര്ത്താവ് ടാറ്റ്ലിയ്ക്ക് സ്വന്തമായി ഒരു എനര്ജിബാര് കമ്പനിയുണ്ട്. 2019 ലാണ് ഇരുവരും വിവാഹിതരായത്. ഇരുവരും ഒരുമിച്ചുള്ള നിമിഷങ്ങള് ടാറ്റ്ലി സാമൂഹ്യമാധ്യമ പേജില് പങ്കുവെച്ചിരുന്നു. ഇവരുടെ പ്രണയനിമിഷങ്ങള്ക്കൊപ്പം കാസ്ക്കറ്റ് ചികിത്സയുമായി ബന്ധപ്പെട്ട വിവരമൊക്കെ പങ്കുവെച്ചിരുന്നതിനാല് ഇരുവരുടേയും പേജിന് ഫോളോവേഴ്സും ഏറെയായിരുന്നു.
