ഭോപ്പാല്: തെരഞ്ഞെടുപ്പ് തൊട്ടടുത്തു നില്ക്കേ മദ്ധ്യപ്രദേശില് ദളിത് നവോത്ഥാന നായകന് ക്ഷേത്രം നിര്മ്മിക്കാനൊരുങ്ങി ബിജെപി. 14 ാം നൂറ്റാണ്ടിലെ ദളിത് സാമൂഹ്യപരിഷ്ക്കര്ത്താവ് സന്ത് രവിദാസിന്റെ പേരില് വന്തുക ചെലവാക്കിയുള്ള ക്ഷേത്രമാണ് നിര്മ്മിക്കുന്നത്. ക്ഷേത്ര നിര്മ്മാണത്തിനുള്ള തറക്കല്ല് നാളെ പ്രധാനമന്ത്രി നരേന്ദ്രമോദി സാഗറില് ഇടും.
സാഗര് ജില്ലയില് 10,000 ചതുരശ്ര അടിയില് നാഗശൈലിയില് പ്ലാന് ചെയ്തിരിക്കുന്ന ക്ഷേത്രത്തിന് 100 കോടിയാണ് ചെലവ് കണക്കാക്കുന്നത്. മ്യൂസിയം, ഗ്യാലറി, ലൈബ്രറി എന്നിവയും മീറ്റിംഗ് ഹാളും ജലസംഭരണിയും ഭക്തര്ക്കുള്ള താമസ സൗകര്യവും 15,000 ചതുരശ്ര അടി വിസ്തീര്ണ്ണം വരുന്ന ഭക്ഷണശാലയുമാണ് പ്ലാനിലുള്ളത്. ഇതിന് പുറമേ പടുകൂറ്റന് പ്രവേശന കവാടങ്ങളും സിസിടിവി ക്യാമറകളും പ്രകാശ സംവിധാനങ്ങളും ഏര്പ്പെടുത്തും.
സംസ്ഥാനത്തെ മൊത്തം 16 ശതമാനത്തോളം ദളിതരുള്ള മദ്ധ്യപ്രദേശില് സാഗര് ജില്ല ദളിതുകള്ക്ക് വോട്ടുകള് കൂടുതലുള്ള സ്ഥലം കൂടിയാണ്. ഇവിടെ 25 ശതമാനമാണ് ദളിത് വോട്ടുകള്. കഴിഞ്ഞ തെരഞ്ഞെടുപ്പില് ദളിത് മേഖലകളില് നിന്നുള്ള സീറ്റുകള് ബിജെപിയ്ക്ക് കുറഞ്ഞുപോയിരുന്നു. 2018 ലെ തെരഞ്ഞെടുപ്പില് 35 സംവരണ സീറ്റില് 18 സീറ്റുകളാണ് ബിജെപിയ്ക്ക് കിട്ടിയത്. അതിന് മുമ്പ് 35 ല് 28 ലും വിജയം നേടാന് ബിജെപിയ്ക്കായിരുന്നു.
മദ്ധ്യകാലത്തെ ഭക്തിപ്രസ്ഥാനങ്ങളില് ഏറ്റവും പ്രശസ്ത വ്യക്തികളില് ഒരാളായ രവിദാസ് കവിയും സാമൂഹ്യപരിഷ്ക്കര്ത്താവുമാണ്. തെരഞ്ഞെടുപ്പ് അടുത്തു നില്ക്കുന്ന സമയത്തുള്ള ക്ഷേത്രനിര്മ്മാണം ദളിതുകളുടെ വോട്ടുകള് പിടിക്കാനാണെന്നാണ് പ്രതിപക്ഷത്തിന്റെ വിമര്ശനം. മുന്പ് സത്ന ജില്ലയിലെ മൈഹാറിലും സന്ത് രവിദാസ് ക്ഷേത്രം പണിതിരുന്നു. അന്ന് ബിജെപി സര്ക്കാര് മൂന്നരക്കോടിരൂപ ചെലവാക്കി.
