ഏതന്സ്: കാത്തുകാത്തിരുന്ന യുവേഫ സൂപ്പര്കപ്പ് ഒടുവില് ഇംഗ്ളീഷ് ക്ലബ്ബ് മാഞ്ചസ്റ്റര് സിറ്റി സ്വന്തമാക്കി. ഏതന്സില് നടന്ന പോരാട്ടത്തില് സ്പാനിഷ് ക്ലബ്ബ് സെവിയ്യയെയാണ് അവര് വീഴ്ത്തിയത്. സാധാരണ സമയത്ത് ഇരു ടീമുകളും ഓരോഗോളുകള് വീതം നേടി തുല്യത പലിച്ചതിനെ തുടര്ന്ന് നടന്ന പെനാല്റ്റി ഷൂട്ടൗട്ടിലായിരുന്നു മാഞ്ചസ്റ്റര്സിറ്റിയുടെ വിജയം.
സെവിയ്യയുടെ നെമാഞ്ഞാ ഗുഡേല്ജിന്റെ ഷോട്ട് ബാറില് തട്ടിത്തെറിച്ചതോടെയാണ് സിറ്റിയ്ക്ക് കിരീടം നേടാനായത്. സാധാരണസമയത്ത് 25ാം മിനിറ്റില് ആദ്യം ഗോളടിച്ചത് സെവിയ്യ ആയിരുന്നു. അക്യൂണ നല്കിയ പന്തില് എന് നെസ്റിയായിരുന്നു സ്കോറര്. എന്നാല് 63 ാം മിനിറ്റില് റോഡ്രി നല്കിയ പന്ത് പാല്മെര് വലയിലാക്കി. ഷൂട്ടൗട്ടില് ഒരു പെനാല്റ്റി പോലും സിറ്റി പാഴാക്കിയതുമില്ല.
ഇരു ടീമുകളുടെയും ഗോള്കീപ്പര്മാര് നടത്തിയ ഉജ്വല സേവുകളാണ് കളി പെനാല്റ്റിയിലേക്ക് നീട്ടിയത്. നേരത്തേ കമ്യൂണിറ്റി ഷീല്ഡില് ആഴ്സണലിനോട് തോറ്റവരാണ് സിറ്റി. എന്നാല് ഇത്തവണ പിഴച്ചില്ല. മൂന്ന് ടീമുകള്ക്കൊപ്പം ഈ കിരീടം നേടിയ താരമായിട്ടാണ് സിറ്റി പരിശീലകന് പെപ്പ് ഗ്വാര്ഡിയോള മാറിയത്. ബാഴ്സിലോണയ്ക്കും ബയേണ് മ്യൂണിക്കിനും ഒപ്പം ഗ്വാര്ഡിയോള ഈ കിരീടം നേടിയിട്ടുണ്ട്.
മൂന്ന് വിവിധ ക്ലബ്ബുകള്ക്കൊപ്പം ഈ കിരീടം നേടിയ ആദ്യ പരിശീലകനായും ഗ്വാര്ഡിയോള മാറി. കഴിഞ്ഞ സീസണില് ഗ്വാര്ഡിയോളയ്ക്ക് കീഴില് ഉജ്വല പ്രകടനമാണ് സിറ്റി നടത്തിയത്. യുവേഫാ ചാംപ്യന്സ് ലീഗ്, ഇംഗ്ളീഷ് പ്രീമിയര്ലീഗ്, എഫ്എ കപ്പ് എന്നിവ പെപ് ഗ്വാര്ഡിയോള കഴിഞ്ഞ സീസണില് സിറ്റിയില് എത്തിച്ചിരുന്നു. എന്നാല് കമ്യൂണിറ്റി ഷീല്ഡില് മാത്രം ആഴ്സണലിന് മുന്നില് സിറ്റി കീഴടങ്ങിയിരുന്നു.
