ലണ്ടന്: ബ്രിട്ടീഷ് പ്രധാനമന്ത്രി ഋഷി സുനക് പാര്ലമെന്റ് പെരുമാറ്റച്ചട്ടം ലംഘിച്ചുവെന്ന് റിപ്പോര്ട്ട് പാര്ലമെന്റ് ചട്ടങ്ങളുടെ നിരീക്ഷണ സമിതിയായ പാര്ലമെന്റ്സ് കമ്മീഷനര് ഫോര് സ്റ്റാന്റാര്ഡ്സിന്റെതാണ് ഈ റിപ്പോര്ട്ട്. ഒരു ചൈല്ഡ് കെയര് കമ്പനിയില് ഭാര്യയ്ക്കുള്ള ഓഹരി പങ്കാളിത്തം വ്യക്തമായി വെളിപ്പെടുത്തിയില്ലെന്നാണ് ആരോപണം. സര്ക്കാരിന്റെ പുതിയ നയങ്ങളുടെ ആനുകൂല്യങ്ങള് ഈ കമ്പനിക്ക് ലഭിക്കുന്നുണ്ടെന്നും റിപ്പോര്ട്ടില് പറയുന്നു. ഋഷി സുനകിന്റെ ഭാഗത്തുനിന്നും മനഃപൂര്വ്വമല്ലാത്ത വീഴ്ചയുണ്ടായി എന്നാണ് റിപ്പോര്ട്ട്.
സുനകിന്റെ ഭാര്യ അക്ഷത മൂര്ത്തിയ്ക്ക് ഓഹരിപങ്കാളിത്തമുള്ള കമ്പനി സര്ക്കാരില് നിന്ന് ആനുകൂല്യങ്ങള് ലഭിച്ചുവെന്ന് പ്രതിപക്ഷ കക്ഷികള് മാധ്യമങ്ങളിലൂടെ ആരോപണമുന്നയിച്ചിരുന്നു. ഇതേതുടര്ന്നാണ് പാര്ലമെന്റ്സ് കമ്മീഷനര് ഫോര് സ്റ്റാന്റാര്ഡ്സ് പരിശോധന നടത്തിയത്.
ഭാര്യയുടെ ഓഹരി പങ്കാളിത്തത്തെ കുറിച്ച് അദ്ദേഹം പാര്ലമെന്റിനെ അറിയിക്കേണ്ടതായിരുന്നു. എന്നാല് അതില് അദ്ദേഹത്തിന് പിശക് പറ്റി. അത് മനഃപൂര്വ്വമായിരുന്നില്ലെന്നും കമ്മീഷണര് ഡാനിയേല് ഗ്രീന്ബര്ഗ് വ്യക്തമാക്കി. അതുകൊണ്ട് വിഷയം ഇവിടെ അവസാനിക്കുകയാണെന്നും അദ്ദേഹം റിപ്പോര്ട്ടില് പറയുന്നു.
