ഉപ്പുതറ: എ.ടി.എം. മിഷനില്നിന്നും ലഭിച്ച 10,000 രൂപ ഉടമസ്ഥന് നല്കി ഓട്ടോറിക്ഷാ തൊഴിലാളികള് മാതൃകയായി. ഉപ്പുതറ പാലം ജംക്ഷനിലെ ഓട്ടോറിക്ഷാ തൊഴിലാളികളായ ഷൈജു, സബിന്, സജി, ദിനീഷ് എന്നിവരാണ് കീരിക്കര സ്വദേശി ദിപുവിന് പണം തിരികെ നല്കി നന്മയുടെ പ്രതികമായത്. കഴിഞ്ഞ ശനിയാഴ്ച വൈകിട്ട് ഏഴോടെ പണം പിന്വലിക്കാന് ദിപു ഫെഡറല് ബാങ്കിന്റെ ഉപ്പുതറ ശാഖയുടെ എ.ടി.എം. കൗണ്ടറില് എത്തിയത്.
കാര്ഡ് മിഷനിലിട്ട് പിന് നമ്പര് അടിച്ചെങ്കിലും ഏറെ നേരം കഴിഞ്ഞിട്ടും പണം കിട്ടിയില്ല. അല്പ്പ നേരം കഴിഞ്ഞപ്പോള് പണം അക്കൗണ്ടില് നിന്നും നഷ്ടമായതായി ഫോണില് സന്ദേശമെത്തി. വീണ്ടും കുറേ നേരം കാത്തുനിന്നിട്ടും പണം കിട്ടിയില്ല. സാധാരണ സംഭവിക്കാറുള്ളതുപോലെ രണ്ടുമൂന്നു ദിവസം കഴിയുമ്പോള് പണം തിരികെ അക്കൗണ്ടില് കയറുമെന്നും, അതല്ലങ്കില് അതിനു ശേഷം ബാങ്കില് പരാതി നല്കാം എന്നു കരുതി മടങ്ങുകയും ചെയ്തു. ഇതിന് പിന്നാലെ ഏഴരയോടെ ഷൈജുവും കൂട്ടുകാരും പണം പിന്വലിക്കാനെത്തി. ഈ സമയം രൂപ മിഷന്റെ കവാടത്തിലിരിക്കുന്നത് ശ്രദ്ധയില്പ്പെട്ടു. ഇതിനുമുന്പ് പണം പിന്വലിക്കാന് കൗണ്ടറില് വന്നവരുടേതാണെന്നു മനസിലായി.
10000 രൂപയുണ്ടന്ന് എണ്ണി ബോധ്യപ്പെടുകയും തിങ്കളാഴ്ച രാവിലെ തുക ബാങ്ക് മാനേജരെ ഏല്പ്പിക്കുകയും ചെയ്തു. തുടര്ന്ന് സാമൂഹിക മാധ്യമങ്ങളിലൂടെ പ്രചാരണം നല്കി. വിവരമറിഞ്ഞ് ദിപു വ്യാഴാഴ്ച രണ്ടോടെ ബാങ്കിലെത്തി. തുടര്ന്ന് ബാങ്ക് മാനേജര് ഓട്ടോ റിക്ഷ തൊഴിലാളികളെ വിളിച്ചുവരുത്തി. മാനേജരുടെ സാന്നിധ്യത്തില് ദീപുവിന് െഷെജു പണം െകെമാറി. ഓട്ടോ റിക്ഷാതൊഴിലാളികളോട് ദിപു നന്ദി പറഞ്ഞു. തൊഴിലാളികളുടെ സല്പ്രവൃത്തിയെ ബാങ്ക് മാനേജര് പി.ആര്. ആതിര അഭിനന്ദിച്ചു.
