കാസര്കോഡ്: അപകടത്തില് പരിക്കേറ്റ് ചികിത്സയിലായിരുന്ന വിദ്യാര്ത്ഥി മരിച്ച സംഭവത്തില് പോലീസിനെതിരേ പ്രതിഷേധവുമായി മുസ്ളീംലീഗ്. കാസര്കോഡ് പൊലീസ് സ്റ്റേഷനിലേക്ക് യൂത്ത് ലീഗ് സംഘടിപ്പിച്ച മാര്ച്ച് സംഘര്ഷം. പോലീസും യൂത്ത്ലീഗ് പ്രവര്ത്തകരും ഏറ്റുമുട്ടി.
പൊലീസ് പിന്തുടരുന്നതിനിടെ കാര് മറിഞ്ഞാണ് വിദ്യാര്ത്ഥിക്ക് പരിക്കേറ്റത്. അംഗഡിമൊഗര് ജിഎച്ച്എസ്എസിലെ പ്ലസ് ടു വിദ്യാര്ഥി ഫര്ഹാസാണ് മരിച്ചത്. മംഗളൂരുവിലെ ചികിത്സയിലിരിക്കെ ഇന്ന് രാവിലെയായിരുന്നു മരണം സംഭവിച്ചത്. സ്കൂളിലെ ഓണാഘോഷം കഴിഞ്ഞ് മടങ്ങുന്ന വിദ്യാര്ഥികളെ വാഹന പരിശോധനയ്ക്ക് ഇടയില് പൊലീസ് തടഞ്ഞിരുന്നു.
പോലീസിനെ കണ്ട വിദ്യാര്ഥികള് വെപ്രാളത്തില് വാഹനമെടുത്ത് പോകുകയുമായിരുന്നു. പൊലീസ് വാഹനം കാറിനെ പിന്തുടന്നെന്നും കുമ്പള കളത്തൂര് പള്ളത്ത് വെച്ച് കാര് അപകടത്തില് പെട്ടു വിദ്യാര്ഥികള്ക്ക് പരിക്കേല്ക്കുകയും ചെയ്തെന്നുമാണ് ആരോപണം.
മരണത്തിന് കാരണം പോലീസാണെന്നും നടപടിയില്ലെങ്കില് പ്രതിഷേധം ശക്തമാകുമെന്ന് പോലീസിന് യൂത്ത് ലീഗ് പ്രവര്ത്തകര് മുന്നറിയിപ്പ് നല്കിയിരിക്കുകയാണ്. വിദ്യാര്ത്ഥികള് സഞ്ചരിച്ച കാറിനെ പോലീസ് കിലോമീറ്ററോളം പിന്തുടര്ന്നതായും പോലീസിന്റെ ഭാഗത്ത് നിന്നും ഗുരുതര വീഴ്ച സംഭവിച്ചതായും യൂത്ത് ലീഗ് ആരോപിച്ചു. വിദ്യാര്ഥിയുടെ മാതാവ് മനുഷ്യാവകാശ കമ്മീഷനും മുഖ്യമന്ത്രിക്കും പരാതി നല്കിയിട്ടുണ്ട്.
