പത്താന് ശേഷം മറ്റൊരു വമ്പന് തരംഗത്തിന് ഒരുങ്ങുന്ന ഷാരൂഖിന്റെ ജവാന് റിലീസിംഗിന് ദിവസങ്ങള് മാത്രമാണ് അവശേഷിക്കുന്നത്. പത്താന്റെ വന്വിജയം കണ്ട ആരാധകര് ജവാനിലും വലിയ പ്രതീക്ഷയാണ് വെച്ചുപുലര്ത്തിയിരിക്കുന്നത്. സിനിമയുടെ അഡ്വാന്സ് ബുക്കിംഗും തുടങ്ങിയിരിക്കെ സിനിമയുടെ സ്പെഷ്യല് ഷോ മുംബൈയില് പുലര്ച്ചെ 6 മണിക്ക് വെക്കുന്നതിനെക്കുറിച്ച് ആലോചിക്കുകയാണ് അണിയറ പ്രവര്ത്തകര്.
മുംബൈയിലെ പ്രസിദ്ധമായ ഗെയ്റ്റി ഗാലക്സി തീയറ്ററിലാണ് സിനിമയുടെ സ്പെഷ്യല് ഷോ നടക്കുക. അതേസമയം മാസങ്ങള്ക്ക് മുമ്പാണ് പത്താന് വേണ്ടിയും തീയറ്ററില് സമയം മാറ്റി വെച്ചത്. ഹിന്ദിസിനിമയുടെ ചരിത്രത്തില് ഇത്രയും നേരത്തേ ഒരു സിനിമയുടെ പ്രദര്ശനവും നടന്നിട്ടില്ല എന്നതാണ് പ്രത്യേകത. ദക്ഷിണേന്ത്യയില് ഇത്രയും പുലര്ച്ചെ സിനിമ നടക്കുന്നത് സാധാരണയാണ്. വിജയ് യുടേയും രജനീകാന്തിന്റേയുമൊക്കെ സിനിമകള് ഈ രീതിയില് നടന്നിട്ടുണ്ട്. എന്നാല് ജവാന് പുലര്ച്ചെ 6 മണിക്ക് പ്രദര്ശിപ്പിച്ചാല് ബോളിവുഡില് അത് ആദ്യമാകും.
ട്വിറ്ററില് ഷാരൂഖിന്റെ ഫാന് ക്ലബ്ബ് വിവരം ഷെയര് ചെയ്തിട്ടുണ്ട്. പത്താന് മുമ്പ് ഫാന് ക്ലബ്ബ് ഈ രീതിയിലുള്ള പ്രചരണം നടത്തിയിരുന്നു. സ്പെഷ്യല് ഷോയില് പങ്കാളികളാകാന് ആള്ക്കാര്ക്ക് വ്യക്തിപരമായി സന്ദേശങ്ങളും അയയ്ക്കാന് തുടങ്ങിയിട്ടുണ്ട്. അതേസമയം സിനിമയ്ക്ക് വലിയ പ്രചരണമാണ് അധികൃതര് നല്കുന്നത്. ആഗസ്റ്റ് 31 ന് സിനിമയുടെ ട്രെയ്ലര് ദുബായിലെ ബുര്ജ് ഖലീഫയില് പുറത്തിറക്കുമെന്ന് ഷാരൂഖ് തന്നെ ട്വിറ്ററില് കുറിച്ചിരുന്നു. ഷാരൂഖിന് പുറമേ നയന്താര, വിജയ് സേതുപതി, സാന്യ മല്ഹോത്ര, പ്രിയാമണി എന്നിവരും പ്രധാനവേഷത്തില് വരുന്ന സിനിമ ആറ്റ്ലിയാണ് സംവിധാനം ചെയ്യുന്നത്. കിംഗ് ഖാന്റെ റെഡ്ചിലീസാണ് സിനമ നിര്മ്മിച്ചിരിക്കുന്നത്. സെപ്തംബര് 7 നാണ് സിനിമയുടെ റിലീസ്.
