പാരീസ്: അര്ജന്റീനയുടെ സൂപ്പര് സ്ട്രൈക്കര് കാര്ലോസ് ടെവസ് ലോക ഫുട്ബോളര്മാരായ ക്രിസ്ത്യാനോ റൊണാള്ഡോയേക്കാളും മെസ്സിയേക്കാളും കേമന്. അന്താരാഷ്ട്ര ഫുട്ബോളില് മുഖം മിനുക്കാന് ലോകത്തെ പ്രമുഖ താരങ്ങളെയെല്ലാം വലയിലാക്കി ചൈന ഇറങ്ങുമ്പോള് ഒരു സീസണില് പോര്ച്ചുഗലിന്റെ റയല്മാഡ്രിഡ് താരത്തേക്കാളും ബാഴ്സിലോണയുടെ ദേശീയ ടീമിലെ തന്റെ പങ്കാളിയെക്കാളും മികച്ച പ്രതിഫലം പറ്റുന്ന താരമായി മാറിയിരിക്കുകയാണ് ടെവസ്.
മാഞ്ചസ്റ്റര് യുണൈറ്റഡിന്റെയും മാഞ്ചസ്റ്റര് സിറ്റിയുടെയും മുന് താരമായ ടെവസ് ഒരു സീസണില് ഉണ്ടാക്കുന്നത് 38 ദശലക്ഷം യൂറോയാണ്. പോര്ച്ചുഗീസ് മാധ്യമങ്ങള് പറയുന്ന റിപ്പോര്ട്ട് പ്രകാരം റൊണാള്ഡോ ഒരു സീസണില് വാങ്ങുന്നത് 23.6 ദശലക്ഷം യൂറോയാണ്. ലയണേല് മെസ്സിയാകട്ടെ 20 ദശലക്ഷം യൂറോയും. ചൈനീസ് ഫുട്ബോളിലേക്ക് കുടിയേറിയ ബ്രസീലിന്റെ ഓസ്ക്കറും ക്രിസ്ത്യാനോയേയും മെസ്സിയേയും പിന്നിലാക്കി. 24 ദശലക്ഷം യൂറോയാണ് ചെല്സിയില് നിന്നും ഷംഗ്ഹായി എസ്ഐപിജിയിലേക്ക് മാറിയപ്പോള് ഓസ്ക്കര് വാങ്ങിയത്.
ഇതേ ക്ളബ്ബിലേക്ക് ചേക്കേറിയ ഓസ്ക്കറിന്റെ ദേശീയ ടീമിലെ കൂട്ടാളി ഹള്ക്കാണ് പ്രതിഫലം ഉണ്ടാക്കുന്ന കാര്യത്തില് അഞ്ചാമന്. ഒരു സീസണില് മെസിക്ക് സമാനമായ പ്രതിഫലം വാങ്ങുന്ന ഹള്ക്കും 20 ദശലക്ഷം യൂറോ വാങ്ങുന്നു. ടെവസിന്റെ കാര്യത്തില് ചൈനയില് നിന്നും കിട്ടുന്നത് കൂടാതെ അര്ജന്റീനയിലെ സ്വന്തം ക്ളബ്ബ് ബൊക്കാ ജൂനിയേഴ്സില് നിന്നും മറ്റൊരു ഇരുപത് ലക്ഷം യൂറോ കൂടി ഒരു സീസണില് ടെവസിന് കിട്ടും.
