കോഴിക്കോട്: നിലമ്പൂര് എംഎല്എ പി.വി അന്വറിനെതിരെ ഗുരുതര കണ്ടെത്തലുകളുമായി താലൂക്ക് ലാന്ഡ് ബോര്ഡ്. ഭൂപരിധി നിയമം മറികടക്കാന് പി.വി അന്വര് ക്രമക്കേട് നടത്തി. പിവിആര് എന്റര്ടെയിന്മെന്റ് എന്ന പേരില് ഭാര്യയുമായി ചേര്ന്ന് പാര്ട്ണര്ഷിപ്പ് സ്ഥാപനം തുടങ്ങിയത് ഭൂപരിധി ചട്ടം മറികടക്കാന് വേണ്ടിയാണെന്നാണ് ഓതറൈസ്ഡ് ഓഫീസറുടെ റിപ്പോര്ട്ട്.
അന്വറിന്റെയും ഭാര്യയുടെയും പേരില് സ്ഥാപനം രൂപീകരിച്ചതില് ചട്ടലംഘനമുണ്ടെന്നും കണ്ടെത്തലുണ്ട്. പാര്ട്ണര്ഷിപ്പ് ആക്ടിലെയും സ്റ്റാമ്പ് ആക്റ്റിലെയും വ്യവസ്ഥകള്ക്ക് വിരുദ്ധമായാണ് അന്വറിന്റെയും ഭാര്യയുടെയും പേരില് സ്ഥാപനം രൂപീകരിച്ചത്. അന്വറിന്റെ പക്കല് 27.61 ഏക്കര് ഭൂമിയാണുള്ളത്. ഇതില് 61 സെന്റ് ഒഴിവാക്കി ഭൂപതിവ് ചട്ടമനുസരിച്ചുള്ള 12 ഏക്കര് കൈവശം വയ്ക്കാം. അവശേഷിക്കുന്ന 15 ഏക്കര് ഭൂമി മിച്ചഭൂമിയായി ഏറ്റെടുക്കാമെന്നും ഓതറൈസ്ഡ് ഓഫീസറുടെ റിപ്പോര്ട്ടില് പറയുന്നു. റിപ്പോര്ട്ടിന്മേല് ആക്ഷേപം ഉണ്ടെങ്കില് അറിയിക്കാന് കക്ഷികള്ക്ക് ഏഴ് ദിവസത്തെ സാവകാശവും നല്കിയിട്ടുണ്ട്.
അതേസമയം, ബോര്ഡുമായി സഹകരിക്കുമെന്ന് അന്വര് പറയുമ്പോഴും കൈവശമുള്ള ഭൂമിയുടെ കണക്ക് ലാന്ഡ് ബോര്ഡ് തേടിയിട്ട് ഇതുവരെ കൈമാറിയിട്ടില്ല.
