ന്യൂഡല്ഹി: ഇന്ത്യ ആതിഥേയത്വം വഹിക്കുന്ന ജി 20 ഉച്ചകോടിയില് ലോകനേതാക്കളെ അഭിസംബോധന ചെയ്തു. ന്യൂഡല്ഹിയിലെ പ്രഗതി മൈതാനിയിലെ ഭാരതമണ്ഡപത്തില് ലോകനേതാക്കളെ സ്വീകരിച്ചു. ആഫ്രിക്കന് യൂണിയന് ജി 20 യില് അംഗത്വം നല്കുകയും റഷ്യന് - ഉക്രെയിന് യുദ്ധത്തെക്കുറിച്ചു പരാമര്ശിക്കുകയും മൊറാക്കോ ഭൂചലനത്തില് മരിച്ചവര്ക്ക് ആദരാഞ്ജലികളും അര്പ്പിച്ചു.
രാവിലെ 9.30 യോടെ ന്യൂഡല്ഹിയിലെ പ്രഗതി മൈതാനത്തെ വേദിയിലേക്ക് എത്തിയ ലോകനേതാക്കളെ പ്രധാനമന്ത്രി സ്വീകരിച്ചു. 10 മണിയോടെ വണ് എര്ത്ത് എന്ന സെഷനായിരുന്നു ആദ്യം തുടങ്ങിയത്. ഇതിനെ അഭിസംബോധന ചെയ്തപ്പോള് രാജ്യത്ത് വിശ്വാസരാഹിത്യം കൂടിയെന്ന നിലപാടാണ് എടുത്തത്. കോവിഡിന് ശേഷം ലോകത്ത് വിശ്വസരാഹിത്യം രാജ്യങ്ങള്ക്കിടയില് കുടിയെന്നും യുദ്ധം അതിന്റെ ഗതിവേഗം കൂട്ടിയെന്നും പറഞ്ഞു. വിശ്വാസരാഹിത്യം ലഘൂകരിക്കാനുള്ള നടപടികള് വേണമെന്നും പറഞ്ഞു.
റഷ്യ - ഉക്രെയിന് യുദ്ധവും അമേരിക്ക - ചൈന - റഷ്യ എന്നീ പ്രമുഖ രാജ്യങ്ങള്ക്കിടയിലെ പ്രശ്നങ്ങളുമെല്ലാം ഉള്ക്കൊള്ളുന്ന നിലയിലുള്ള പരാമര്ശമായിട്ടാണ് ഇതിനെ വിലയിരുത്തുന്നത്. അതേസമയം റഷ്യയുടേയും ചൈനയുടേയും പ്രസിഡന്റുമാര് ഉച്ചകോടിയില് പങ്കെടുക്കുന്നില്ല. ഇതിനൊപ്പം മൊറാക്കോ ഭൂചലനത്തില് മരിച്ചവര്ക്ക് ആദരാഞ്ജലി അര്പ്പിച്ച പ്രധാനമന്ത്രി സാധ്യമായ എല്ലാ സഹായവും ചെയ്യുമെന്നും പറഞ്ഞു. വണ് എര്ത്ത് എന്ന സെഷനില് ആഫ്രിക്കന് യൂണിയന് അംഗത്വം നല്കുന്ന കാര്യം ചര്ച്ച ചെയ്യുകയും അംഗീകരിക്കുകയും ചെയ്തു.
മോദിയുടെ മുന്നിലെ ബോര്ഡില് ഇന്ത്യ എന്നതിന് പകരം ഭാരത് എന്നാണ് എഴുതിയിരുന്നത്. ഇന്ത്യ എന്ന പേര് വിവാദമായതിന് പിന്നാലെ ജി 20 യില് നടക്കുന്ന അത്താഴവിരുന്നിനുള്ള ക്ഷണക്കത്തില് ഭാരത് എന്നായിരുന്നു കുറിച്ചിരുന്നത്. അദ്ധ്യക്ഷപദവിയിലുള്ള പ്രധാനമന്ത്രിയുടെ നെയിംബോര്ഡില് ഇന്ത്യ എന്ന് എഴുതുന്നതിന് പകരം ഭാരത് എന്നായിരുന്നു കുറിച്ചിരുന്നത്.
