ന്യുഡല്ഹി: കുട്ടികള് തമ്മിലുള്ള വഴക്കിനിടെ മകനെ രക്ഷിക്കാന് ശ്രമിച്ച 38കാരന് ഇഷ്ടിക കൊണ്ട് തലയ്ക്കടിയേറ്റ് മരിച്ചു. വെള്ളിയാഴ്ച ഡല്ഹിയിലെ ഒക്ല ഫേസ് ടുവിലെ സഞ്ജയ് കോളനി ഏരിയയിലാണ് സംഭവം. ചുമട്ടുതൊഴിലാളിയായ മുഹമ്മദ് ഹനീഫ് ആണ് കൊല്ലപ്പെട്ടത്.
സംഘര്ഷത്തില് മുഹമ്മദ് ഹനീഫിന്റെ രണ്ട് മക്കള്ക്ക് പരിക്കേറ്റു. വെള്ളിയാഴ്ച രാത്രി 11 മണിയോടെയായിരുന്നു സംഭവം. തെരുവില് വച്ചിരുന്ന തന്റെ ബൈക്ക് എടുക്കാന് ഇയാളുടെ 14കാരനായ മകന് രാത്രി പുറത്തേക്ക് പോയി. ഈ സമയം കുറച്ച് കുട്ടികള് ഈ ബൈക്കില് ഇരിക്കുകയായിരുന്നു. ഇവര് മുഹമ്മദിന്റെ മകനെ തടഞ്ഞു. ഇതേചൊല്ലിയുള്ള തര്ക്കമാണ് വഴക്കില് കലാശിച്ചത്.
ശബ്ദംകേട്ട് മുഹമ്മദ് ഹനീഫ് സ്ഥലത്തേക്ക് ചെന്നു. മകനെ രക്ഷിക്കാന് ശ്രമിക്കുന്നതിനിടെ കുട്ടികളുടെ സംഘം മുഹമ്മദ് ഹനീഫിനെതിരെ തിരിയുകയും അയാളെ ഇഷ്ടിക കൊണ്ട് തലയ്ക്കടിച്ച് വീഴ്ത്തുകയുമായിരുന്നു. വിവരമറിഞ്ഞ പോലീസ് ഉടന്തന്നെ സ്ഥലത്തെത്തി മുഹമ്മദ് ഹനീഫിനെ എയിംസ് ആശുപത്രിയില് പ്രവേശിപ്പിച്ചെങ്കിലും മരണം സംഭവിച്ചിരുന്നു.
പ്രതികള്ക്കെതിരെ കേസെടുത്തതായും തിരിച്ചല് നടക്കുകയാണെന്നും പോലീസ് അറിയിച്ചു. ജി20 ഉച്ചകോടി നടക്കുന്നതിനാല് ഡല്ഹിയുടെ ഓരോ മുക്കുംമൂലയും പോലീസ് വലയത്തില് ആയിരിക്കവേയാണ് ഈ കൊലപാതകം നടക്കുന്നത്.
