കോട്ടയം: തൃക്കാക്കരയ്ക്ക് പിന്നാലെ പുതുപ്പള്ളിയിലും കനത്ത തോല്വി നേരിട്ടതോടെ ഇടതുപക്ഷം മന്ത്രിസഭ പുന:സംഘടന പരീക്ഷിച്ചേക്കുമെന്ന് അഭ്യൂഹം. വരാനിരിക്കുന്ന ലോക്സഭാ തെരഞ്ഞെടുപ്പിനെ ഈ തോല്വികള് ബാധിക്കുമോ എന്ന ആശങ്ക മുന് നിര്ത്തിയാണ് തീരുമാനമെന്നും പിഴവുകള് തിരുത്തി മുമ്പോട്ട് പോയില്ലെങ്കില് ഇതിനേക്കാള് വലിയ വീഴ്ചയാകും നേരിടേണ്ടി വരിക എന്നത് കൂടി കണക്കിലെടുത്ത് മന്ത്രിസഭയിലും സിപിഎം മന്ത്രിമാരുടെ വകുപ്പുകളിലും അഴിച്ചുപണി വന്നേക്കുമെന്ന തരത്തിലാണ് വര്ത്തമാനങ്ങള്.
പുതുപ്പള്ളിയിലെ വന് തോല്വിയ്ക്ക് പിന്നാലെ തോല്വിയുടെ കാരണം പരിശോധിക്കുമെന്നും പഠിക്കുമെന്നും നേതാക്കള് ഒന്നൊന്നായി പ്രതികരിച്ചിരുന്നു. നേരത്തേ തൃക്കാക്കരയിലേറ്റ തിരിച്ചടി പരിശോധിക്കാന് സിപിഎം കമ്മീഷനെ വെച്ചിരുന്നു. ലോക്സഭാ തിരഞ്ഞെടുപ്പിന് മുമ്പ് വീഴ്ചകള് തിരുത്തി മുന്നോട്ടുപോകാനാണ് തീരുമാനമെങ്കില് ഭരണത്തിലെ പ്രശങ്ങള് കൂടി ചര്ച്ച ചെയ്യേണ്ടി വരും. വരാനിരിക്കുന്ന ഇടതുമുന്നണി യോഗത്തിലും സിപിഎം സംസ്ഥാന സെക്രട്ടറിയേറ്റിലും പിന്നാലെ നടക്കുന്ന സംസ്ഥാന സമിതി യോഗം, സംസ്ഥാന എക്സിക്യുട്ടീവ് എന്നിങ്ങനെ ഈ മാസം 20 മുതല് 27 വരെ നടക്കുന്ന പരിപാടികളില് തെരഞ്ഞെടുപ്പ് പരാജയം പ്രധാന ചര്ച്ചകളാകുമെന്ന് ഉറപ്പാണ്. ഇതിനൊപ്പം ഇടതുമുന്നണി ധാരണയിലുള്ള മന്ത്രിസഭാ പുനസംഘടനയും നടക്കേണ്ടതുണ്ട്.
ആന്റണി രാജുവിനും അഹമ്മദ് ദേവര്കോവിലിനും പകരക്കാര് വരുന്ന സാഹചര്യം ഉപയോഗിച്ച് സിപിഎം മന്ത്രിമാരുടെ വകുപ്പുകളിലും മാറ്റം വരുമോ എന്ന് അറിയേണ്ടതുണ്ട്. അടുത്ത കാലത്തായി സിപിഎം മന്ത്രിമാര് പോലും പൊതുവേദിയില് വിമര്ശിക്കപ്പെടുന്ന സാഹചര്യമുണ്ട്. കളമശ്ശേരിയില് നടന്ന കാര്ഷിക മേളയില് നടന് ജയസൂര്യ അടക്കമുള്ളവര് മന്ത്രിമാരെ വിമര്ശിച്ച് രംഗത്ത് വന്നതും ഇടതുമുന്നണിക്കുള്ളില് തന്നെ എംഎല്എ മന്ത്രിയെ വിമര്ശിച്ച് രംഗത്ത് വന്നതുമെല്ലാം വലിയ വിവാദമാണ് വിളിച്ചു വരുത്തിയത്.
